1 Kô èh yàng piq au padon trùh ta oh daq. Rìm yiniq jah dì tiaq bàu baiq piq ngai ma wiang panhìn. 2 Jò au trùh hmàih ka oh daq yàng baiq nèh, au khoe doe ka mangai adroe kô nèh ma khoe broq yiniq lui hloe xam ka mangai qmoeq, manòeq kô au yac ka au arù, mahaq dua au chônh doe hòm: Jò au trùh au pi oe taqnhùa cleq ka cabô hòm. 3 Patep pang jò oh daq bòch waq ka loq i nen cleq đòeq hu panhìn joq Christ i capoch hnài ajang au. Haq aih ùh xài mangai ùh loh cleq taqne pì, mahaq dêh haraya. 4 Majah qmang aih, haq khoe tiang đình talong pagat ta kan ùh nèn, mahaq haq khoe rìh ta cwìang i tai Boc Plình, hanoh qmang aih, nhèn ùh nèn enh dalam ka haq, mahaq nhèn rìh ti haq enh dalam cwìang itai da Boc Plình, đòeq hu abroq taqne oh daq.

5 Cla pì oh daq ngan hlài deh chiac beq, đoèq hu loq đeh i manoh lùi loq ùh? Nhro ngan rađeh beq, oh daq ma ùh hnoq i Chuaq Jesus Christ oe enh dalam ka oh daq ùh? Waq toq oh daq ùh hìaq khoe troq ka cađac. 6 Nhèn ngèh ka oh daq canau hnoq nhèn kô ùh xài mangai troq ka cađac. 7 Manòeq kô nhèn waiq khàn ka Boc Plình dôq oh daq ùh broq trong qmèq, ùh xài đòeq ka wì loq nhèn kô mangai khoe qnhrang ta kan qnhro, mahaq dôq pì oh daq jah broq trong lem, yac ka hnoq nhèn tìah gleq mangai khoe troq ka qnoh đac. 8 Majah qmang aih, nhèn ùh jah broq cleq ma pagau hlài ka bàu joq qnàng, mahaq toq hatroq tiaq bàu joq qnàng. 9 Yac ka nhèn ùh nac canèn, mahaq waq toq oh daq jah tadêh aih nhèn khoe lem bùi raya, bàu nhèn waiq khàn aih waq ka oh daq jah gêh geo rìm trong. 10 Aih ìq dài jò arù, au majah achìh ka oh daq ƀài trong kô, đòeq jò i mat au taqmat, au ùh hìaq ep broq nhang tiaq cwìang Chuaq ma am ka au, aih cwìang đòeq hu dèch paqnhrang ùh xài đòeq hu raliang đac.

11 Pulùch, oh daq drah bùi beq, drah hnan tiaq kan gêh geo, alòng dabau, pajùm mòeq manoh oe ma hatroq ti dabau, aih èh Boc Plình da kan loq waq xam kan catèm oe ti pì. 12 Yŏc nà hìp hadroèh đòeq hu hmàih dabau. Dìq dŏng mangai da Boc Plình tagùng kô i bàu bòch hmàih ka oh daq.

13 Waiq kan tabàih dech da Chuaq Jesus Christ, kan loq waq da Boc Plình, kan taqmùt da Yiang Hadròeh oe dìq ti oh daq.