1 Mahaq ep loq qmang kô, oe ta hì atìq lùch kô èh i bàc jò nanxa. 2 Majah qmang aih kon mangai wì loq waq toq ka rađeh, loq waq toq ka ƀac jènh, toq panhòm, ratauq, capoch qmèq, ùh iu miq baq, ùh qnì manè cabô, ùh rìh tiaq manoh Boc Plình, 3 ùh ha-och, xa ka hatroq, capoch cheo, ùh loq palap, ngang dù, git ka mangai broq lem, 4 gôpla, loq nòeh, padèch toq rađeh, enh toq trong pagôq ta qnhòng kô yi hnao ka loq waq ka Boc Plình, 5 enh gùng aih broq deh wèq tiaq trong lem, yàng enh dalam aih wì cađac cwìang itai da trong lem aih. Ƀài mangai qmang aih kon wia ma hangai haq. 6 Ta wì aih i ngai ti achop mùt da wì ta hnim, ti padô alùan ƀài mangai gucadrì ùh wìa cleq ƀài mangai ma bình bauq toq yiniq lui, ƀài mangai khoe dôq kan qmèq qnung rađeh, 7 yac ka hŏc yôt mahaq dua ùh loq ka bàu joq qnàng. 8 Calah nèh Ja-net, xam Jambe tablêq ka Môise dàng leq, ƀài wì kô hadai tablêq ka bàu joq qnàng dàng aih: gàu ngoc wì haq khoe om ech, manoh lùi wì haq khoe pi dràng qnhro. 9 Mahaq wì pi broq jah tam pang leq hòm, majah qmang aih kô èh kan ratùt da wì haq rìm ngai jah hnoq dŏng tìah ka da wa tau diq.

10 Mahaq da kon aih, kon khoe tiaq dua bàu au hnài, tiaq dua rìh acaq, manoh enh, manoh lùi, loq kèm, ùh tagah lep ka trong loq ha-och da au, 11 ƀài kan khech rùp, nanxa ma khoe trùh ka au ta Antiôt ta Ycôni ta Lit-tro. Ƀài kan khech rùp aih au chìuq dìq dŏng mahaq Chuaq khoe dèch paclaih au yôt. 12 Ma joq qnàng aih, rìm ngai enh rìh lem alàng enh dalam ka Chuaq Jesus Christ, dìq ep glàm kan khech rùp baxa. 13 Mahaq ƀài mangai ngang, mangai patìah toq enh gùng kiang rai èh rai cram ta kan dù, ti qnùt mangai qnoeq èh qnùt hloe xam cla.

14 Da kon hòm, ep yòng ma cajap ta ƀài yiniq kon ma khoe hŏc, ma khoe lùi dèh joq qnàng, majah qmang aih kon loq đeh khoe hŏc ƀài yiniq aih ajang cabô, 15 qnah hòm, patep enh oe nga kon khoe loq ka Hset Hadròeh jah broq ka kon rabiaq đòeq jah dèch claih xi manoh lùi enh dalam ka Chuaq Jesus Christ. 16 Dìq ka Hset Hadròeh aih dìq jah Boc Plình hi hèm qmùt, i lòeq đòeq hu hnài, gùt bàt, ti palauq, hnài mangai trong taq atoq. 17 Dôq mangai da Boc Plình jah geo gua, jah padon đòeq hu broq ƀài yiniq lem.