4
Wa Phiero wa Jon ta hnim hadrah
1 Jò Phiero xam Jon qnang capoch tuàng ka wì ta aih, i ƀài pajàu, cwan wèq hnim tagop xam mangai Sađusê trùh. 2 Wì nòeh pi cajaq jò hnoq wa haq hnài rai doe enh dalam ka Chuaq Jesus i kan rìh hlài da mangai cachìt. 3 Ƀài aih rùp clêh wa haq ta hnim cadrong trùh sroq atìq, majah qmang aih trŏc khoe clam. 4 Yac ka qmang aih, i bàc ngai lùi jò khoe tàng bàu wa aih hnài, mangai lùi tŏc jah padam muàn.
5 Sroq atìq, ƀài cwan, ƀài gucraq xam ƀài mangai hnài ranenh tagop ti dabau ta Jêrusalem, 6 xam Anne, aih pajàu haqnhèq, Caiphe, Jon, Alexanđo xam dìq dŏng ƀài nang noe pajàu haqnhèq. 7 Wì rùp qnoh wa Phiero wa Jon yòng enh ngèa wì haq, wì bòch: Yŏc cwìang enh leq, tàng ùh meh canòm ka yiniq cabô chôp ma broq qmang kô? 8 Jò aih, Phiero, bình halùih Yiang Hadròeh, haq doe: “Dìq dŏng ƀài cwan xam ƀài gucraq, 9 tàng joq hì kô pì creo ka ma yòng ajang kô đòeq hu tah hadrah ma, taiq ma khoe broq lem ka mangai pen, èh bòch ma broq qmang leq haq ma khoe jah brêh. 10 aih dìq ka pì xam ƀài mangai Isorali khòh loq rameh aih canòm ka yiniq Chuaq Jesus Christ mangai Naxaret, Mangai pì khoe tiang đình talong pagat, Boc plình khoe broq haq rìh hlài enh mangai cachìt, canòm ka haq aih mangai kô khoe jah brêh lem, manòeq kô qnang yòng enh ngèa ka pì. 11 Chuaq Jesus aih:
“Hmo ƀài pì mangai broq hnim ma khoe khwênh cađac,
Khoe wìa hmo mùm hnim.”
12 Ùh ih kan dèch dech ajang cabô qnoeq, majah qmang aih enh caqnàm plình kô, ùh i ka yiniq ma qnoeq am ka mangai đòeq bèn ep canòm ajang aih hu jah dèch”.
13 Jò wì hnoq kan tanoq da Phiero xam Jon, loq ka wa aih mangai blùng ùh qnì đeh cleq, wì toq hamàih, èh wì loq wa aih hmaq oe ti Chuaq Jesus. 14 Mahaq patep pang jò wì hnoq mangai khoe jah brêh yòng pajùm ti wa ta aih, wì pi oe jah tapoch cleq. 15 Wì hi thê wa aih loh enh gùng ka nòe hadrah, wì hatình ka dabau: 16 “Wa kô èh bèn broq qmang leq? Dìq ka Jêrusalem mangai loq đeh hra wa kô khoe broq kan halac kàn, yac ka bèn enh cadoc dua ùh jah. 17 Mahaq dôq yiniq kô pi hìaq prai tam yi hangai, bèn taqnhùq hacam ka wa haq, ùh lòh wa haq, pang kô ta èh pi jah yŏc yiniq aih đòeq hu hnài cabô hòm. 18 Wì hi creo ka wa mùt hòm, wì doe: Pi jah ràu yiniq Chuaq Jesus đòeq anoe đòeq hnài cabô hòm. 19 Mahaq Phiero xam Jon padreo bàu: Cla pì hèm beq, maleq ma yeo troq enh ngèa ka Boc plình, tamàng bàu pì, loq tamàng bàu Boc plình? 20 Majah qmang aih da nhèn kô, ùh jah tàng ùh anoe trùh yiniq nhèn ma khoe hnoq khoe tàng!” 21 Aih ìq, wì hi taqnhùq hacam tam ka wa, khoe hi caqnaih, pi chaq trong hu rùp wa hòm, majah qmang aih mangai ta aih dìq hnoq kan halac neo loh, mangai leq mangai meh manè apôi đeh hra Boc plình. 22 Mangai ma khoe jah brêh aih khoe loe pôn jàt hanam.
23 Loh enh aih, wa bròc dèh ti ƀài oh daq, taqmon hlài dìq dŏng bàu ƀài pajàu kàn xam ƀài gucraq ma anoe ka wa. 24 Jò dìq ka wì tàng bàu aih, wì mòeq bàu ti dabau waiq khàn ka Boc plình: “Boc Plình ma dìq jaq haqnhèq, Ìh khoe broq plình, taneh, diac rasìq xam rìm yiniq oe ta aih. 25 Ìh khoe canòm ka Yiang Hadròeh, tapoch ajang hacùng kan cadraq nhèn, aih bùa Đawit hapŏng ìh, rameh:
“Hagleq rìm diac ma plôh nòeh,
Hagleq phù cròng wiang hatình trong ùh loh qmòe cleq?
26 Ƀài bùa ma padinh yòng.
Ƀài cwan hangui pajùm ti dabau,
Đòeq hu tablêq ka Chuaq aih Mangai ìh khoe xùt dàu”…
27 Joq qnàng Herôt xam Bônso Philat, mangai diac wì xam mangai Isorali khoe tagop ti dabau ta kô đòeq hu tablêq ka Hapŏng hadròeh ìh aih la Chuaq Jesus ìh ma khoe xùt dàu, 28 đòeq hu broq rìm yiniq tì kŏng xam manoh ìh khoe thê deh adroe. 29 Manòeq kô, ìh tamàng bàu wì ma khoe hacam aih, am ka mangai hapŏng ìh bình manoh tanoq đòeq hnài trong da ìh. 30 Hnhu qnoh tì kŏng ìh đòeq broq brêh kan yinìq, broq kan halac canòm ajang nòe yiniq hapŏng hadròeh ìh aih la Chuaq Jesus. 31 Khoe ka waiq khàn, nòe wì haq tagop loh qmòe ka ralàng. Mangai leq mangai meh jah bình halùih Yiang Hadròeh, ùh lòm yùq qmòe cleq ka anoe trong da Boc Plình.
Manoh loq waq ka dabau da ƀòe mangai tiaq Chuaq
32 Dìq dŏng ka ƀài mangai ma lùi, wì moeq manoh moeq cliac ti dabau. Pi cabô oe arènh kô dahwèq da au, mahaq dìq dŏng ka dahwèq wì pajùm dŏng ti dabau. 33 Ƀài tiaq cla yŏc kan itai kàn hu anoe kan rìh hlài da Chuaq Jesus Christ; dìq ka wì jah xôq ramot kàn. 34 Taqne wì ma lùi Chuaq Jesus pi oe i cabô leq nan cleq hòm, majah qmang aih i ruàng i hnim, wì tech dŏng, jah toq leq dua wì wê 35 aràng đòeq ajang jènh ƀài mangai tiaq cla, khoe aih cabô nan pang leq axong pang aih. 36 I mòeq ngai yiniq haq Jôsep, ƀài mangai tiaq cla yiniq ònh ka haq aih Banaba (Banaba aih la kon calô da kan alòng), xinoe Lêwi, gùng Chipro, 37 i mòeq haqnech ruàng, haq tech ruàng aih yŏc ƀac aràng đòeq ajang nòe jènh ƀài mangai tiaq cla.