1 Jò aih, mangai tiaq èh rai bàc, dài haq mangai Hêlenit mamùc ka mangai Hêbru, majah qmang aih wì ùh hmàng axong ka ƀài mangai hadrô da wì haq dahwèq acaq. 2 Wì Mòeq jàt baiq ngai creo tagop dìq dŏng ƀài mangai tiaq hŏc, wì doe: Cađac trong hnài bàu Boc Plình đòeq hu patìh trong ranenh acaq aih joq ùh troq. 3 Manòeq kô oh daq ràih yŏc taqne cla pì qmat tapèh ngai ma i tìang, bình Yiang Hadròeh, i kan rabiaq, khoe aih nhèn hi đòeq wì haq patìh trong kô. 4 Aih èh nhèn jah toq waiq khàn jah dìq ka manoh broq dèh bìac. 5 Bàu kô hatroq manoh dìq dŏng oh daq, wì hi patô Êtien, aih mangai bình manoh lùi xam Yiang Hadròeh, Philip, Bôcoro, Nicanô, Timôn, Bamêna xam Nicôla, aih mangai Antiôt neo wìh tiaq trong mangai Juđa; 6 wì aràng tapèh ngai aih loh enh ngèa ƀài mangai tiaq cla. Ƀài mangai tiaq cla waiq khàn khoe aih roh tì ta wì aih.

7 Bàu Boc Plình chàc rai èh rai hangai, ta Jêrusalem mangai tiaq rai bàc. I bàc ngai pajàu hanoh tiaq.

8 Jò aih, Êtien jah bình xôq yiang xam cwìang itai, broq bàc trong halac taqne phù cròng. 9 Mahaq i toq ƀiaq ngai enh hnim tagop wì ma creo dèh: Tagop da mangai pi tawac, xam ƀài mangai ta Siren, mangai gùng Alecxanđo, xam mangai Juđa oe ta Silisi, gùng Asi, ƀài aih yòng tarahen ka Êtien. 10 Mahaq wì ùh blêq kan rabiaq enh Yiang Hadròeh am ka haq jò haq capoch. 11 Aih ìq wì hi lam baxrùq wì qnoeq, rameh: Nhèn khoe tàng haq kô tapoch qmèq ka Môise xam Boc Plình. 12 Wì patùt ƀài phù cròng, ƀài gucraq xam ƀài mangai hnài ranenh, khoe aih wì hi clàm cadêh mùt rùp Êtien, aràng haq loh yòng enh ngèa nòe hadrah. 13 Wì hi qnoh dèh ƀài mangai yòng tapoch qmùt ka haq, ƀài aih doe rameh: Mangai kô toq capoch troq nòe hadròeh xam ranenh. 14 Majah qmang aih nhèn khoe tàng haq doe: Jesus mangai Naxaret raliang cađac nòe kô èh rai broq tablòq hlài ranenh rìh acaq Môise ma khoe đòeq hlài ka bèn. 15 Jò aih ƀài mangai hangui tanòe hadrah dìq chrìh ngan Êtien, hnoq hadrò haq tìah ka hadrò ƀình plình.