9
Saulo tawìh tiaq bàu lem
1 Jò aih, Saulo ùh hêq ka hacam ti chaq jêh cađac mangai tiaq Chuaq Jesus, haq trùh ti mangai pajaù haqnhèq, 2 bòch jàiq enh haq aih hu aràng roc hnim tagop qyoh ta gùng Đamat, waq toq hnoq magai leq tiaq Trong bàu lem yac ka mangai calô, mangai cadrì, kàt ahlài dìq ta Jêrusalem. 3 Mahaq jò Saulo qnang lam ten trùh ta Đamat, ka doe i kan qngah enh plình sreo qngah du danh ka haq. 4 Haq cro ta haqneq rai tàng bàu tapoch ka rađeh: “Saulo, Saulo, hagleq ìh majah ti chaq rùp au?” 5 Haq bòch: Waiq Chuaq, Ìh cabô? Bàu aih tèu: “Au kô raq Jesus mangai ìh ma chaq rùp baxa; 6 mahaq manòeq kô yòng beq, mùt ta plài, i mangai anoe ka ìh trong ìh ma ep broq. 7 Dìq ka mangai lam mòeq qmang ti haq, yòng ta aih hi haglènh pi jah tapoch qmòe cleq, wì tàng bàu tapoch mahaq ùh i hnoq qmòe cabô. 8 Saulo àu yòng enh taneh, mat aih blèch mahaq ùh xau hnoq qmòe cleq. Wì carùp tì haq qnung haq mùt ta Đamat 9 haq oe ta aih piq hì, mat ùh xau hnoq cleq, ùh dùh ka acaq ùh dùh ka ôq.
Ana-nia broq ƀaptem ka Saulo
10 Jò aih ta Đamat i mòeq ngai tiaq hŏc yiniq haq Ana-nia, ta kan mahno Chuaq creo ka haq: “Anania!” Haq padreo bàu: Chuaq au! hacô au kô. 11 Chuaq doe ka haq: “Drah yòng beq, lam ta trong wì ma creo Trong jang, chaq Saulo mangai Tacso, oe ta hnim Juđa, majah qmang aih haq qnang waiq khàn”, 12 haq khoe hnoq i mòeq ngai yiniq Ana-nia, mùt ta hnim yŏc tì bèq ta chac haq, dôq haq mat haq jah qngah hlài. 13 Anania padreo bàu: Waiq Chuaq au! Au tàng bàc ngai anoe hlài mangai kô khoe broq kan haƀo ka bàc ngai hadròeh ìh ta Jêrusalem. 14 Manòeq haq lam tacô, haq jah dŏng cwìang enh wì mangai pajàu haqnhèq, đòeq rùp kàt dìq dŏng mangai ma creo dang yiniq ìh. 15 Mahaq Chuaq doe ka Ana-nia: “Drah lam beq, majah qmang aih au khoe ràih mangai kô đòeq broq ranac da au, hu anoe yiniq au ka mangai diac wì, ka ƀài bùa, hloe xam mangai Isorali, 16 Au ji doe dôq haq loq kô èh taiq yiniq au haq ep chìuq xalep dàng leq cadèh.
17 Ana-nia hi yòng lam, haq mùt ta hnim, khoe aih haq yŏc tì roh ta chac Saulo rai doe: Daq Saulo, Chuaq aih Jesus ma khoe loh ti ìh ti trong jò ìh lam tacô, khoe thê au trùh, dôq mat ìh jah qngah hlài rai jah bình Yiang Hadròeh. 18 Tajòe qmòe jò aih i cleq tìah ka cachep clìh enh mat Saulo aih mat haq hi hnoq. Haq padinh yòng dôq wì broq ƀaptem ka rađeh. 19 Jò haq khoe acaq aih haq hi tadêh hlài.
Saulo oe ta Đamat xam Jêrusalem
Saulo oe ta Đamat toq biaq hì ti ƀài mangai tiaq hŏc. 20 Haq drah hnài roc him tagop qyoh: Chuaq Jesus aih kon Boc Plình. 21 Ƀài mangai tàng bàu haq aih, dìq loh ka hamàih, wì doe: Ma ùh xài haq qmat raq mangai yòng rùp baxa dìq dŏng ka oh daq ta Jêrusalem ma creo dang yiniq kô, ma ùh joq haq lam tacô hu rùp kàt ahlài wì ka ƀài mangai pajàu kàn qmòh? 22 Mahaq Saulo rai èh rai cajap manoh, haq goh bàu ƀài mangai Juđa ma oe ta Đamat, haq doe ka wì: Chuaq Jesus aih raq Christ.
23 Bàc hì atìq ka aih, ƀài mangai Juđa hatình ka dabau chaq trong jêh cađac Saulo. 24 Mahaq i mangai bahìa ka Saulo loq trong mangai Juđa ma ta hatình. Wì tàt dìq dŏng roc qmang ngo đoèq hu gòm jêh đac Saulo. 25 Yàng èh jò damang, ƀài mangai tiaq hŏc yŏc rajo kàn cadrai qnoh haq loh enh gùng ka panàt canàng.
26 Jò Saulo khoe trùh ta Jêrusalem, haq enh taqmùt ti mangai tiaq hŏc ta aih, mahaq wì hòq ka haq, ùh lùi haq hadai khoe broq mangai tiaq hŏc. 27 Ƀanaba hi ajèn haq, qnung haq trùh enh ngèa ƀài mangai tiaq cla rai taqmon dôq wì aih loq ti trong Chuaq Jesus khoe loh anoe ka Saulo qmang leq, ta Đamat haq khoe hnài yiniq Chuaq Jesus, ùh lòm yùq crè qmòe cleq. 28 Pang aih, Saulo thia lam hlài ti mangai tiaq hŏc ta Jêrusalem. 29 Canòm ka yiniq Chuaq Jesus haq capoch tuàng ùh yùq qmòe cleq. Haq hadai tarahen ka mangai Hêlênit, mahaq wì aih chaq trong hujêh cađac haq. 30 Jò oh daq hìa qmang aih, wì aràng haq trùh ta Sêsarê, èh thê haq lam ta gùng Tacso
Ênê jah brêh
31 Qmang aih, dìq ka Tagop Hadròeh tagùng Juđê, gùng Galili xam gùng Samari jah kan lem bùi catèm, jah hagau, rìh ta kan loq iu Chuaq, canòm ka Yiang Hadròeh wiang, mangai tiaq èh rai bàc tam.
32 Jò aih, Phiero lam jàp gùng, haq trùh hmàih ka mangai oh daq ta Chuaq tagùng Lyđa. 33 Ta aih i mòeq ngai pen yiniq haq Ênê, kùi mòeq nòe ta racoh khoe rahim hanam. 34 Phiero doe ka haq: Daq Ênê! Chuaq Jesus Christ broq ka ìh jah brêh, drah yòng beq, ti don da ìh racoh ìh ma kùi qmat. Draq adrình hloe jò aih, haq padinh yòng. 35 Dìq ka mangai ta Lyđa xam gùng sarôn hnoq qmang aih wì hi tawìh hlài ta Chuaq.
Tabitha rìh hlài
36 Oe ta Jopbê, taqne mangai tiaq hŏc, i mòeq ngai cadrì yiniq haq Tabitha, (bàu Gorec aih Đôca), haq broq bàc yiniq lem rai loq ti am ka mangai pa. 37 Jò aih, haq ùh hrŏc èh hi cachìt. Wì ti ti qnheo hanang haq, khoe hi ta qngùi haq tabluàng talàu qnhèq. 38 Mangai tiaq hŏc tàng doe Phiero qnang oe ta Lyđa, haten ka Jopbê, wì hi thê baiq ngai lam akhen ka haq, wa doe: Ìh drah lam rênh haq. 39 Phiero hi yòng lam ti wa aih. Jò trùh ta aih, wì atŏc haq ta bluàng haqnhèq, dìq dŏng ƀài mangai cadrì hadrô yòng dudan ka haq rai hmoe, wì patô ka haq ngan ƀài eo yôh xam ƀài eo hlaq, Đôca khoe jìp am ka wì jò haq oe rìh. 40 Phiero thê wì loh dŏng enh gùng, khoe aih haq hacùn cràng hu waiq khàn, haq wìh tajang ka hanang, rai doe: Tabitha, yòng beq! Mangai gucadrì aih hi blèch mat hnoq Phiero, haq drah yòng qmòe ka rênh. 41 Phiero hnhu tì ka haq carùp hu dèch haq yòng, èh haq ti creo ka wì ma lùi Chuaq ta aih, hloe xam ƀài mangai cadrì hadrô, dôq wì hnoq haq aih khoe rìh hlài. 42 Yiniq aih tagùng Jopbê wì hìa dìq dŏng. Aih ìq, majah i bàc ngai lùi Chuaq. 43 Phiero oe ta Jopbê bàc hì, haq oe ta hnim mangai thòq broq akia yiniq haq Simôn.