1 Atìq ka aih padam hì, Anania mangai pajàu haqnhèq xam ƀiaq ngai gucraq lam pajùm ti mòeq ngai rabiaq ka capoch acaq, yiniq haq Tectulu, am ka cwan haqnhèq jàiq wì haq khoe achìh đòeq tah hadrah ka Phaulô. 2 Jò khoe creo ka Phaulô mùt, Tectulu hi doe: 3 “Cwan haqnhèq Phêlit, canòm đeh ka ìh nhèn ma khoe jah rìh catèm rìm trong, canòm kan rabiaq, kan loq hnoq hangai enh ìh ƀài kan qmèq khoe wìa kan lem am ka nhèn, jò leq jò meh yac ka oe taleq dua nhèn toq hmàng toq manè ìh. 4 Mahaq đòeq ùh hìaq pangài hrìn đeh ka ìh, broq qmang leq ìh hai tamàng da nhèn ƀiaq nà. 5 Nhèn hnoq haq kô mangai enh chaq toq yiniq, toq ti jrôq chiu mangai Juđa jàp ta crŏng taneh. Haq pagàu ƀài bua mangai Naxaret, 6 Haq hadai khoe hwaq broq kan amùa ta hnim kùh waiq, dài nhèn ma jah rùp haq, nhèn enh hadrah haq qmat tiaq ranenh cla nhèn. 7 Mahaq Lysia, cwan cla craq lình, haq aih ngang haraya khoe blah mangai qmat enh tì kŏng nhèn. 8 Thê dìq ka mangai hadrah lam glàm qmòe cla ìh, manòeq kô cla ìh bòch haq qmat beq, aih ìh hi loq gleq nhèn majah qnang tah hadrah ka haq. 9 Ƀài mangai Juđa hadai wiang mòeq bàu ka Tectulu, wì doe hiloq qmang aih raq.

10 Cwan haqnhèq hnhè tì thê Phaulô capoch, Phaulô padreo bàu: “Au loq ìh broq cwan hadrah ta taneh diac kô khoe bàc hanam, aih ìq dài au majah lem bùi hu capoch cwaih rađeh. 11 Ìh ti bòch beq, ìh hi loq au neo tŏc ta Jerusalem đòeq kùh waiq, qnhòq tem jah mòeq jàt baiq hì. 12 Wì qnhòq hmaq hnoq au tanòe hnim kùh waiq, tanòe hnim tagop qyoh, ta roc phôq, tarahen ka cabô đòeq jrôq chiu thê wì broq manhài. 13 Manòeq kô wì ùh yŏc cleq aleq hu patô am ka ìh hnoq đòeq panhìn bàu wì ma tah hadrah ka au.

14 Enh ngèa cwan, au ùh hangah rađeh joq au kùh waiq Boc Plình boc yaq nhèn ma lùi dèh enh nèh, au lùi rìm bàu achìh ta hset ranenh xam hset pajàu, 15 au hadai lùi tìah qmang ka wì haq ma lùi nòe Boc Plình diq, aih lùi i kan rìh hlài da mangai taq atoq xam mangai dù. 16 Dài aih ìq raq, enh ngèa Boc Plình enh ngèa kon mangai au majah àu wèq dèh manoh cliac dôq haq jah hliang lem. 17 Au arù hangai khoe bàc hanam, au hlài ta Jêrusalem hu qnàng dahwèq tabàih am ka oh daq au ƀài mangai ma pa đeh, rai dèch ramènh ka Boc plình. 18 Jò aih, i ƀài mangai Juđa oe ta gùng Asi hnoq au qnang broq ramènh basròeh ka rađeh ta hnim kùh waiq, ùh i broq cleq lìq làn, ùh i mangai enh leq ma bàc. 19 Tàng joq wì aih i yiniq cleq enh tah hadrah ka au, aih ajoq wì haq trùh anoe enh ngèa ka cwan kô ma troq. 20 Tàng ùh meh, ƀài pì ma yòng tacô ep doe beq, pì khoe hnoq au i broq yiniq cleq ùh troq jò au yòng tanòe hadrah da mangai Juđa, 21 enh gùng ka mòeq bàu au ma khoe capoch dêh enh ngèa wì haq: Hì kô au majah ep yòng ajang kô tamàng bàu pì bòch aih taiq au lùi kan rìh hlài da mangai cachìt.

22 Phêlit khoe loq Trong Phaulô ma anoe aih, dài haq majah taqnhùa, haq doe: “Hêq gòm jò leq Lysia mangai cla craq lình trùh tacô, brì ka au tamàng yiniq kô”. 23 Khoe aih, Phêlit thê mangai đaiq đôiq rùp đòeq Phaulô mahaq ep am haq jah lam hlài đeh toq ƀiaq, apaq tàt ƀài bua Phaulô jò wì lam hmàih rai aràng ka haq dahwèq haq ma i yiniq waq. 24 Biaq hì atiq ka aih, Phêlit xam Đorusi cadrì haq, aih mangai Juđa, trùh thê wì creo ka Phaulô, tamàng haq anoe trùh kan lùi nòe Chuaq Jesus Christ. 25 Mahaq jò tàng Phaulô anoe trùh kan taq atoq, kan loq wèq rađeh xam kan hadrah hì atìq, Phêlit crè picajaq, haq doe: “Hêq hì kô anoe pang kô raq, gòm hì qnoeq au dòh au hi creo ònh”. 26 Phêlit hadai toq tangèh ka Phaulô am ka haq ƀac jèn, dài haq majah ti hawet creo capoch tuàng yôt ka Phaulô. 27 Baiq hanam atìq ka aih, Bôtiu-Phêtu trùh broq thai ka Phêlit. Taiq Phêlit enh yŏc manoh mangai Juđa dài haq majah ùh caqnaih Phaulô.