2
1 Qmang aih, kiang bèn ep wèq ka cajap trong bèn khoe jah tàng, dôq ùh hìaq hìu đac taqnoeq. 2 Majah qmang aih, tàng joq bàu da ƀình plình anoe aih khoe cajap cajình, cabô ùh iu ùh tiaq bàu aih khoe jah hnoq kan patem qmòe amat, 3 tàng bèn toq patrò kan dèch kàn kaiq qmang aih, broq qmang leq bèn ma claih? kan dèch kô Chuaq anoe qnoh adroe, i mangai ma tàng, anoe panhìn hlài ka nhèn. 4 Boc Plình hadai yŏc bàc trong bàc kan halac, yŏc kan tabàih dech enh Yiang Hadròeh axong tiaq manoh cla haq enh, đòeq hu panhìn ka wì aih.
IISa 2Sm 7:14 Thi Tv 104:4 Thi Tv 45:6, 7 Thi Tv 102:25-27
Jesus broq rađeh wìa kon mangai
5 Qmang aih, crŏng taneh ma padon trùh nhèn ma qnang anoe kô, Boc Plình ùh đòeq haq oe enh qneq ka cwìang ƀình plình. 6 Mahaq i ngai khoe doe rameh:
“Kon mangai kô ìq cleq, Chuaq ma hmàng trùh?
Kon mangai kô ìq cabô, Chuaq ma palàng?
7 Chuaq khoe đòeq haq yi qneq ka ƀình plình toq biaq,
Pa kui am ka haq kui cadoh plình ranhòm lem
8 Chuaq roh đòeq rìm yiniq enh qneq ka jènh haq”.
Boc Plình broq ka rìm yiniq dìq ep oe enh qneq ka Chuaq Jesus, qmang aih dôq ùh i mòeq cleq ùh iu haq, yàng manòeq kô bèn qnhòq hnoq rìm yiniq dìq iu haq. 9 Mahaq Chuaq Jesus kô, ma khoe oe qneq ka ƀình plình toq biaq, bèn hnoq haq manòeq kô khoe jah pacui cadoh diac plình lem ranhòm, pàng haq khoe chìuq cachìt. Qmang aih, taiq kan tabàih da Boc plình, Chuaq Jesus majah khoe cachìt am rìm ngai.
10 Joq Boc plình la mangai ma rìm yiniq ngeà diq ta haq rai canòm ka haq, pàng enh aràng bàc ngai kon trùh ta kan qngah qngai, aih haq broq joq khoe troq jò haq broq ka Chuaq Jesus aih xèm kan dèch da wì kon aih, jah gêh geo ajang kan chìuq xalep. 11 Qmang aih, Mangai ma broq ka hadròeh xam mangai jah hadròeh, aih dìq loh enh mòeq Baq raq. Aih ìq, Chuaq Jesus majah ùh camaih ka creo ka wì aih oh daq, 12 jò Haq doe:
“Au jah anoe yiniq Ìh ka oh daq au,
Oe taqne Tagop au calêu manè Ìh”.
13 Haq doe hòm: “Au hataq rađeh ka Chuaq. Èh hòm:
“Kô au xam ƀài kon Boc Plình ma khoe am ka au”
14 Qmang aih, taiq wì kon i xech i mahim dài cla Chuaq Jesus majah hadai waq ka i qmang aih diq, đòeq jò cachìt, haq jah raliang đac mangai ma wèq cwìang kan cachìt aih Satan, 15 rai paclaih am ka rìm ngai taiq crè ka kan cachìt dài majah ep broq đeh hapŏng lùch ka qnhòng. 16 Joq qnàng, haq trùh ùh xài đòeq hu wiang ka ƀài ƀình plình, mahaq đòeq hu wiang ka nang noe da Apraham, 17 Aih ìq, dài rìm trong haq majah ep broq tìah dèh ka oh daq, đòeq enh ngèa Boc Plình jah wìa Pajàu haqnhèq, loq ha-och, ùh tablòq manoh, đòeq cachìt ka yiniq lui da kon mangai. 18 Pàng cla haq khoe chìuq nanxa ta kan padô qnùt, dài haq majah i cwìang dèch ƀài mangai jò wì glàm kan padô qnùt.