4
Rìh dìq manoh ka Chuaq
1 Ƀài kan loq tajênh tarahen taqne pì aih loh enh leq? ma ùh xài loh enh kan loq ònh da manoh cla ma xan àu tablêq yôt ta chac oh daq raq qmòh? 2 Oh daq ònh mahaq ùh jah trong đeh ma enh, oh daq jêh đac mangai, tarènh mahaq dua ùh jah cleq, oh daq i kan ta pagìq taqmiaq. Oh daq majah ùh jah cleq pàng oh daq ùh waiq bòch Boc Plình. 3 Oh daq waiq bòch mahaq ùh jah cleq, pàng pì bòch ùh troq trong, đòeq toq racaih tiaq manoh cla enh.
4 Wùih ƀài mangai ja tango tau! pì ma ùh qnì taqmùt ti crŏng taneh kô aih pì tablêq hlài ka Boc Plình? Dài qmang aih, cabô enh broq bua ka crŏng taneh kô, haq aih loh mangai tablêq ka Boc Plình. 5 Ahìaq pì hèm Hset Hadròeh capoch dech ùh loh lùa cleq qmòh? Yiang Hadròeh da Boc Plình ma thê oe ta manoh cliac bèn, haq bêh bèn loh qmòe ka tarènh, 6 mahaq Haq tam ka bèn kan tabàih yeo kàn hòm. Dài qmang aih Hset Hadròeh majah achìh: “Boc Plình tablêq ka mangai loq catèh rađeh, mahaq am xôq ramot ka mangai loq hamon rađeh.”
7 Qmang aih thê drah iu Boc Plình. Drah tablêq hlài kan kiac aih èh haq hi wia hangai ka oh daq. 8 Drah thia haten ka Boc Plình aih èh Haq hi thia haten ka oh daq. Mangai ma i yiniq lui drah qnheo hreo dèh ti kŏng beq, cabô baiq manoh, drah broq hreo dèh manoh beq, 9 drah hnoq dèh kan habo, drah ta-oeh hmoe, drah halìh bàu do loh bàu crò hmoe, halìh kan lem bùi loh kan mangò. 10 Drah caqnìh rađeh enh ngèa Chuaq, aih èh haq hi dèch atŏc oh daq.
Trong capoch troq dabau ChCn 3:34
TT 11 Oh daq ùh dùh capoch qmèq ka dabau. Cabô capoch troq dèh oh daq qnì, ti hadrah dèh oh daq qnì, haq aih capoch qmèq ka ranenh, tah hadrah ka ranenh. Tàng pì hadrah hlài ka ranenh, aih pì ùh xài mangai iu tiaq ranenh, mahaq mangai hadrah ranenh. 12 Dìq dèh mòeq Ngai raq broq loh ranenh, mòeq Ngai raq ma hadrah ranenh aih la Mangai dèch di jah, jêh đac hadai jah. Mahaq ìh kô ìq cabô, gleq majah hùa hadrah deh mangai haten hatìa?
Cabô jah loq ka hì da èh
13 Tamàng kô, ìh mangai ma doe: Hì kô tàng ùh meh hì da èh, au lam ta gùng tau, oe ta aih mòeq hanam, ti padro hi jah bac jènh, 14 mahaq hì da èh qmang leq, oh daq ma loq! Majah qmang aih, qnhòng rìh da oh daq aih cleq? Bu dàng diac ngom, i đeh mòeq hyàc raq hi hnhung. 15 Oh daq khòh doe qmang kô ma troq: Tàng joq Chuaq ma enh, tàng joq au ma oe rìh, aih èh au jah broq yiniq kô, yinq tau. 16 Aih ìq, oh daq dèch bàu catèh đòeq hu panhòm! Catèh panhòm qmang aih dìq qmèq. 17 Dài haq, cabô loq trong lem mahaq ùh waq broq tiaq, aih i tuiq.