Hset Hadròeh JON 1

HSET JON

Bàu plình wìh wìa xech akia

1 Ƀaxèm i Bàu, Bàu aih oe ti Boc Plình, èh Bàu aih raq Boc plình. 2 Haq oe ti Boc Plình enh jò baxèm. 3 Rìm yiniq khoe jah broq loh enh haq, ùh i yiniq cleq ma i đeh enh gùng ka haq. 4 Ta haq i kan rìh, èh kan rìh aih raq kan qngah am ka kon mangai. 5 Kan qngah sreo ta clam mahaq kan clam ùh waq kan qngah.

6 I moeq ngai Boc Plình thê haq trùh, yiniq haq Jon. 7 Haq trùh hu anoe panhìn ka kan qngah aih, dôq mangai lùi đeh hra. 8 Cla haq aih ùh xài kan qngah, mahaq anoe am ka kan qngah. 9 Kan qngah kô, aih raq joq kan qngah joq qnàng, jò haq trùh crŏng taneh kô sreo qngah ka rìm ngai. 10 Bàu aih oe crŏng taneh kô, crŏng taneh kô loh enh haq, crŏng taneh kô ùh canau ka haq. 11 Haq khoe trùh ta gùng cla, mahaq wì ta aih ùh waq ka haq. 12 Mahaq waq toq cabô hi lùi haq, aih haq hi am ka mangai aih cwìang đòeq hu wìa kon Boc Plình 13 aih ƀài mangai ùh xài loh enh mahim jan, ùh xài loh enh ŏng mai, enh manoh mangai, mahaq loh enh Boc Plình.

14 Bàu khoe wìh wìa xech akia, oe ta qne bèn, bình halùih kan tabàih xam trong joq qnàng, bèn khoe haqmiang hnoq kan ranhòm haq, joq kan ranhòm da Kon mòeq loh enh Baq. 15 Jò anoe trùh Haq, Jon dêh bàu doe: Kô raq Mangai au khoe ràu trùh jò au doe: Haq mangai trùh atìq ka au, mahaq ùh hnau ka au, majah qmang aih haq i adroe ka au. 16 Aih ìq, jao kan bình halùih ta haq bèn majah kan tabàih yeo bàc hòm. 17 Majah qmang aih, ranenh khoe paqnoh enh Môise, yàng kan tabàih xam trong joq qnàng aih trùh enh Jesus Christ. 18 Qnhòq i cabô hmaq hnoq Boc Plình, enh gùng ka Kon mòeq oe ta manoh Baq, Haq aih raq Mangai mahnu Baq am ka bèn.

Jon Baptit hangah đeh ùh xài Christ

19 Kô bàu Jon paqnoh, jò mangai Juđa thê bài mangai pajàu, ƀài mangai Lêwi enh Jêrusalem trùh bòch haq: Ìh kô ìq cabô? 20 Haq tapoch hloh ùh hangah moeq nà cleq, doe rađeh ùh xài Christ. 21 Wì bòch hòm: qmang aih ìh qmat kabô? Ìh qmat Êli ùh xài? Haq padreo bàu: Ùh xài! Ìh qmat pajàu ùh xài? Haq padreo bàu: Ùh xài. 22 Wì hi bòch: Qmang aih ìh kô ìq cabô? Dôq nhèn loq đòeq nhèn hu anoe hlài ka mangai ma thê nhèn lam. Ìh doe rađeh cabô? 23 Haq padreo bàu: Au kô bàu mangai creo ta gùng hawit: “Pajang trong ka Chuaq.” 24 Ƀài mangai wì ma thê trùh ta Jon, aih dìq mangai Pharisi. 25 Wì bòch clò hòm: Tàng joq ìh ùh xài Christ, ùh xài Êli, ùh xài pajàu, òq hagleq ìh ma jah broq ƀaptem ka wì? 26 Jon doe: Au broq ƀaptem xi diac, mahaq i moeq ngai oe ta qne pì mahaq pì ùh canau. 27 Aih raq Mangai trùh atìq ka au, au qnhòq tajì ka jah broq mangai kùp doeh caxi jep haq. 28 Ƀài yiniq kô dìq loh ta gùng Bêthani, apah tau cròng diac Jôđan, nòe Jon broq ƀaptem.

29 Trùh hì atìq, Jon hnoq Chuaq Jesus trùh ti rađeh, haq doe: Hatau, Kon trìu da Boc Plình, Mangai ma hu dèch dŏng yiniq lui ta crŏng taneh! 30 Haq qmat raq mangai au ma khoe doe i Mangai trùh atìq ka au, mahaq yiloe ka au, majah qmang aih haq i adroe ka au. 31 Cla au ùh qnì ka Haq, mahaq au khoe trùh broq ƀaptem xam diac dôq Haq jah mahnu qnoh ka mangai Isorali. 32 Jon anoe am hòm: Au khoe hnoq Yiang Hadròeh enh plình tìah ka trù loh jràp Haq. 33 Au joq ùh qnì ka Haq, mahaq Yiang ma thê au broq ƀaptem xi diac i doe ka au rameh: Mangai ìh ma hnoq Yiang Hadròeh loh jràp oe ti haq, aih raq Mangai broq ƀaptem xi Yiang Hadròeh. 34 Au khoe hnoq, au majah doe: Haq aih raq kon Boc Plình.

Mangai tiaq hŏc Jon tawìh tiaq Jesus

35 Hì da èh rameh, Jon oe ta aih ti baiq ngai tiaq hŏc haq. 36 Hnoq Chuaq Jesus pagat trong aih, haq doe: Hatau, Kon trìu Boc Plình. 37 Baiq ngai tiaq hŏc tàng bàu aih, wa hi lam tiaq Chuaq Jesus. 38 Chuaq Jesus wìh ngan, hnoq wa aih lam tiaq dađeh, haq bòch: “Chôp chaq cleq?” Wa aih padreo bàu: Rabi (aih mangai hnài). Ìh oe ta leq? 39 Chuaq Jesus tèu wa: “Lam ngan beq!” Wa aih hi lam, hnoq nòe Chuaq Jesus oe, wa haq hi oe ti haq, jò aih qnah ta pôn jò di xèq.

40 Wa baiq ngai ma tàng bàu Jon doe, èh lam tiaq hloe haq, aih moeq ngai yiniq haq Anrê, oh Simôn Phiero. 41 Angoe aih, haq lam chaq deh daq haq aih Simôn, haq hi anoe: Nhèn khoe glàm Mêsi (Mêsi aih Christ). 42 Haq hi qnung Simôn trùh ti Chuaq Jesus. Bu hnoq Simôn, Chuaq Jesus doe: “Ìh kô Simôn kon Jôna, pang kô èh jah creo ka ìh Sêpha” (aih Phiero).

43 Trùh hì atìq hòm, Chuaq Jesus tŏc ta gùng Galili, chaq Philip, haq creo: “Drah tiaq au.” 44 Philip aih oe gùng Bêtsai-đa, moeq gùng ka wa Anrê wa Phiero. 45 Philip chaq Natha-naên, haq doe: Nhèn khoe hnoq Mangai Môise ma achìh ta hset ranenh nèh, ƀài pajàu hanoh ràu trùh, aih Chuaq Jesus mangai ta Naxaret, kon da Jôsep. 46 Natha-naên bòch: A lah i cleq ma wìa loh enh gùng Naxaret ùh? Philip doe: Trùh ngan beq. 47 Jò Chuaq Jesus hnoq Natha-naên trùh ti dađeh, haq doe: “Kô, majoq mangai Isorali joq qnàng, enh dalam ka haq ùh i qmòe mòeq yiniq cleq jùh jùn”. 48 Natha-naên bòch: Enh leq ìh ma jah loq ka au? Chuaq Jesus padreo bàu: “Adroe ka Philip creo ka ìh, au khoe hnoq ìh jò ìh oe anòe xèm long pŏc. 49 Natha-naên hi doe: Rabi! Ìh kô joq kon calô Boc Plình! 50 Chuaq Jesus doe: “Au khoe doe au hnoq ìh oe anòe xèm long pŏc ìh majah lùi, kô èh ìh jah hnoq trong ùh hnau ka aih. 51 Haq anoe hòm: “Joq qnàng, au anoe dìq ka pì, kô èh pì jah hnoq plình tapèch, xam ƀaì bình plình Boc Plình tŏc loh ajang Kon mangai.