7
Jesus tahì ramènh hla
1 Atìq ka aih, Chuaq Jesus lam dudan gùng Galili. Haq ùh enh lam tagùng Juđê, majah qmang aih mangai Juđa toq chaq trong hu jêh đac haq.
2 Mahaq hì Ramènh hla da mangai Juđa khoe ten trùh. 3 Wì oh Chuaq Jesus doe ka haq: Drah loh enh kô hu lam tagùng Juđa beq, đòeq mangai tiaq hŏc jah hnoq yiniq ìh broq. 4 Jò enh ka mangai qnoeq loq ka rađeh, ùh i cabô cadoc deh yiniq broq ta nòe hlèp. Patep pang hì ìh ma broq ƀài bìac aih, drah lam paqnoh rađeh am ka phù cròng beq. 5 Majah qmang aih wì oh haq hadai ùh lùi haq. 6 Aih ìq Chuaq Jesus majah doe ka wì haq: “Jò da au qnhòq troq, da pì jò leq ma ùh troq.” 7 Wì phù cròng ùh i tagit ka pì, mahaq git ka au, majah qmang aih au anoe patô qnoh trong da wì haq broq aih trong dù. 8 Pì tŏc hàu ramènh aih beq, au qnhòq tŏc ta ramènh aih majah qmang aih qnhòq troq jò da au. 9 Atìq ka anoe bàu aih, haq dua oe raq ta Galili.
10 Hnoq anoe qmang aih, khoe ka wì oh haq lam hàu ramènh, haq hanoh lam, haq lam laiq ka hlèp, ùh dôq cabô loq. 11 Oe tanòe ramènh, ƀòe gucraq Juđa ti rinh chaq Chuaq Jesus, wì bòch dabau: Taleq haq? 12 Tanòe mangai bàc i bàu wì ta anoe ka dabau. Qnah ngai doe: Haq aih mangai lem, qnah ngai doe: Ùh! haq aih mangai toq ti qnùt wì phù cròng. 13 Mahaq ùh i cabô hùa anoe hloh trùh Chuaq Jesus, majah qmang aih wì crè ka ƀài gucraq Juđa.
Jesus hnài jò Ramènh
14 Qne ramènh, Chuaq Jesus tŏc hnài ta hnim kùh waiq. 15 Mangai Juđa ta aih dìq jaq hamàih wì bòch dabau: Mangai kô qnhòq lah hŏc, gleq haq majah rabiaq ka hset Hadròeh qmang meh? 16 Chuaq Jesus doe: “Bàu au hnài ùh xài loh eh cla au, mahaq loh enh Mangai ma khoe thê au. 17 Mangai leq broq tiaq manoh Boc Plình, aih èh hi canau bàu au ma hnài loh enh Boc Plình loq loh enh cla au. 18 Mangai leq capoch tiaq deh manoh, aih haq chaq kan ranhòm toq ka dađeh, mahaq mangai leq broq ka Mangai ma thê dađeh jah ranhòm, aih mangai ma joq qnàng, tanòe haq ùh i yiniq cleq jùh jùn. 19 Ma ùh joq Môise khoe am ka pì ranenh? I cabô leq taqne pì broq tiaq ranenh! Hagleq pì chaq trong hu jêh cađac au? 20 Ƀài wì doe: Ìh qmat kiac khoe pawè, cabô ma chaq jêh đac ìh? 21 Chuaq Jesus padreo bàu: “Au khoe broq mòeq yiniq, pì mangai leq mangai meh hamàih đeh hra. 22 Môise thê pì wèq ranenh kat akia (ranenh aih ùh i loh enh Môise, mahaq loh enh wì kan cadraq) pì broq ranenh aih ka mangai gucalô ta hì Sabat! 23 Tàng joq mangai gucalô kat akia ta hì Sabat waq ka hatroq tiaq ranenh Môise, aih hagleq pì majah nòeh ka au jò au broq ka chac mangai yinìq jah brêh ta hì Sabat? 24 Apaq ngan toq enh gùng đòeq hu hadrah mangai qnoeq, mahaq ep hadrah tiaq trong ma taq toq.
Mangai Juđa enh rùp Jesus
25 I qnah ngai oe ta Jêrusalem doe: Meh raq ùh xài mangai wì ma chaq jêh cađac? 26 Ngan meh haq ma i capoch rai amot, atàng i cabô tapoch mòeq nà bàu cleq ka haq. Ahìaq ƀài cwan khoe doe haq meh raq Christ joq qnàng? 27 Mahaq mangai meh trùh enh leq bèn loq, Yàng jò Christ hi trùh, i cabô maloq haq trùh enh leq.
28 Jò aih Chuaq Jesus oe raq hnài tanòe hamlang hnim kùh waiq, Haq capoch qmòe cadêh: “Pì canau ka au, loq ka au trùh enh leq, ùh xài au trùh đeh ajang kô, mahaq Mangai ma khoe thê au aih joq qnàng. Pì ùh qnì ka haq, 29 mahaq au loq ka haq, majah qmang aih au loh enh haq, haq khoe thê au”. 30 Aih ìq raq, wì majah ti àu chaq trong rùp Chuaq Jesus, mahaq ùh i mòeq ngai leq hùa poh ta chac Jesus, majah qmang aih jò da haq qnhòq trùh; 31 mahaq i bàc ngai lùi haq. Wì doe: Jò Christ trùh, haq i broq bàc trong halac ùh hnau ka mangai kô ùh? 32 Mangai Pharisi tàng bàc ngai ta aih ta hatuàng trùh Chuaq Jesus ti dabau. Aih, wì haq hi mòeq manoh ka ƀài pajàu kàn wiang thê ƀài lình wèq hnim kùh waiq lam rùp haq.
33 Chuaq Jesus doe: “Au oe ti pì toq biaq hòm, khoe aih au hi hlài deh ta Mangai ma khoe thê au. 34 Pì hi ti chaq au, mahaq ùh hnoq au, èh hòm tanòe au ma oe, ta aih pì trùh ùh jah”. 35 Mangai Juđa doe ka dabau: Mangai kô enh lam taleq haq ma doe bèn chaq ùh hnoq haq? Ahìaq haq lam trùh ti ƀài mangai bèn ma haprah priang taqne mangai Gorec, đòeq hu hnài mangai Gorec qmòh? 36 Haq khoe doe: Pì ti chaq au, mahaq ùh glàm au, èh hòm tanòe au oe pì enh trùh ta aih ùh jah, bàu aih qmang leq?
37 Hì atìq pulùch, aih hi ma yeo nhet dìq dŏng ta hì ramènh, Chuaq Jesus yòng rai tapoch bàu dêh: “Mangai leq croh ranŏng, drah trùh ti au hu ôq. 38 Mangai leq lùi au, qmang ka bàu Hset Hadròeh khoe anoe: cròng diac kan rìh plôh loh qmòe enh dalam ka wì haq”. 39 Bàu aih, Haq anoe trùh Yiang Hadròeh mangai leq ma lùi haq atìq kô èh hi jah, jò aih qnhòq ùc qnoh Yiang Hadròeh, majah qmang aih Chuaq Jesus qnhòq jah ranhòm. 40 Ta aih bàc ngai tàng, wì doe: Mangai kô pajàu joq qnàng. Mangai qnoeq doe: Qmat raq Christ. 41 Mangai qmoeq hòm doe: Wìa ka Christ ma loh enh gùng Galili? 42 Ma ùh joq hset Hadròeh doe: Christ ep loh enh nang noe Dawit, enh plài Bêtlehem aih plài da bùa qmòh? 43 Taiq ajang nòe Chuaq Jesus, wì haq majah talah đac dabau. 44 Qnah ngai enh rùp haq, mahaq ùh i cabô hùa hnho deh mòeq apah tì ta chac haq.
45 Qmang aih, ƀài lình tawìh hlài nòe ƀài pajàu kàn xam ƀài mangai Pharisi. Wì aih bòch: Hagleq pì ma ùh ahlài mangai aih tacô? 46 Ƀài lình padreo bàu: Qnhòq lah i cabô capoch tìah ka mangai kô. 47 Mangai Pharisi goh bàu ƀài aih: Ahìaq haq aih khoe padô hloe xam pì qmòh? 48 I ka cwan leq, mangai Pharisi leq lùi haq aih ùh? 49 Ùh! mahaq ƀài mangai bình qmòe ka calùh chàm joq ùh lòm loq qmòe ka ranenh cleq, joq jìang toq ra òh hamaiq! 50 Nicôđem (mangai adroe ka aih i trùh ti Chuaq Jesus, haq hanoh oe mòeq bua ti ƀài aih) doe: 51 Ranenh da bèn ma rùp mangai leq bèn qnhòq bòch, qnhòq qnì ka yiniq haq aih broq qmòh? 52 Wì doe ka haq: Ìh kô ma hadai mangai Galili qmòh? Ìh ngan beq! ìh hi hnoq ùh lah i mangai pajàu leq ma loh enh gùng Galili.
53 Khoe aih, dìq ka wì hi hlài deh hra ta hnim.