1 Adroe ka hì ramènh Pancwa, Chuaq Jesus loq khoe ten trùh jò rađeh padon cađac crŏng taneh đòeq hu hlài deh ti Baq, haq khoe loq waq deh ka mangai da haq oe ta crŏng taneh kô aih haq loq waq trùh lùch trùh gêh.

2 Qnang jò acaq di xèq, kan kiac baxrùq manoh Juđa icariôt, kon Simôn đòeq haq blòq Chuaq Jesus. 3 Chuaq Jesus loq Baq khoe jao ta tì dađeh rìm yiniq, majah qmang aih haq khoe trùh enh Boc Plình, manòeq padon wìh hlài ta Boc Plình, 4 Jò acaq, haq padinh yòng, lêh deh eo enh gùng, yŏc mù kàt ajang caqnam. 5 Èh haq ùc diac ta khai hi qnheo jènh mangai tiaq hŏc, khoe aih haq yŏc mù ma kàt ti caqnam hi xùt waq ka srênh. 6 Haq trùh ajang Simôn Phiero, Phiero doe: Chuaq au! Wìa ka ìh qnheo jènh au qmòh? 7 Chuaq Jesus padreo bàu: “Manòeq kô ìh qnhòq qnì trong au ma qnang broq, mahaq atìq èh ìh hi loq”. 8 Phiero doe: Ùh đòh! ùh jò leq au dôq ìh qnheo da au jènh. Chuaq Jesus doe: “Tàng joq au ùh qnheo jènh ìh, aih èh ìh ùh i pajùm cleq ti au”. 9 Simôn padreo bàu: Chuaq au! Tàng qmang aih, ùh xài toq qnheo jènh, ìh qnheo hloe xam tì xam gàu au diq. 10 Chuaq Jesus doe: “Mangai khoe hùm, qnheo toq jènh raq hi hreo, pì khoe jah hreo, mahaq ùh xài rìm ngai”. 11 Majah qmang aih Chuaq Jesus loq cabô ma padon blòq haq, dài haq majah doe: “Ùh xài rìm ngai khoe jah hreo”.

12 Jò qnheo da wì jènh hi khoe, Chuaq Jesus caxùnh dèh eo, lam hangui hlài dèh anòe acaq, haq bòch wì: “Pì aloq yiniq au ma neo broq am ka pì qmat? 13 Pì doe au: Mangai hnài, creo au Chuaq pì, aih troq, au joq qmang aih, 14 tàng au Chuaq pì, mangai hnài pì, khoe qnheo jènh pì, qmang aih pì hadai ep qnheo jènh da bau. 15 Majah qmang aih, au khoe broq dua đòeq pì hnoq, dôq pì hadai broq qmang ka au khoe broq ka pì.” 16 Joq qnàng, joq qnàng au doe ka pì, hapŏng ùh yeo kàn hnau cla wì craq, mangai loh lam ùh yeo kàn hnau ka mangai thê lam. 17 Tàng pì loq ƀài yiniq kô rai broq tiaq aih èh pì jah xôq ramot. 18 Au ùh i anoe ka pì rìm ngai, au loq dèh mangai leq au khoe ràih, mahaq waq ka jah xìt qmang ka bàu Hset Hadròeh: Mangai hmaq acaq bênh au, dèch lùn jènh blòq au. 19 Manòeq kô au chônh anoe adroe ka pì jò ƀài yiniq aih qnhòq trùh, đòeq jò yiniq aih trùh, pì hu jah loq au kô raq Mangai aih. 20 Joq qnàng, joq qnàng au anoe ka pì, cabô đìh mangai au thê, aih đìh au, cabô đìh au aih đìh Mangai thê au”.

21 Atìq ka anoe bàu aih, Chuaq Jesus manhài ùh catèm ta manoh, Haq doe: “Joq qnàng, joq qnàng au doe ka pì, taqne pì i mòeq ngai padon blòq au”. 22 Mangai tiaq hŏc ti ngan dabau, ùh qnì qmòe haq ràu trùh cabô. 23 Taqne mangai tiaq hŏc i mòeq ngai Chuaq Jesus ma loq waq, jò aih haq hangui hatìa ka Chuaq Jesus. 24 Simôn Phiero kùh gàu ka haq thê haq aih bòch ngan Chuaq Jesus enh anoe trùh cabô. 25 Haq chinh rađeh angèn ajang rada Chuaq, haq hi bòch: Chuaq au! aih ìq cabô? 26 Chuaq Jesus padreo bàu “Aih mangai au padon am ka haq haqnech ƀênh au khoe chùq diac kô”. Èh Chuaq Jesus yŏc mòeq haqnech ƀênh chùq ta diac khoe aih am ka Juđa, kon da Simôn Icariôt. 27 Draq drình hloe jò Juđa hnhu tì yŏc ƀênh, Satan mùt enh dalam ka haq. Chuaq Jesus doe ka haq: “Ìh broq deh cleq, drah broq beq”. 28 Mahaq dìq ka wì hangui acaq ta aih, ùh i mangai leq qnì hagleq Chuaq Jesus majah thê haq qmang aih. 29 Majah qmang aih Juđa mangai wèq bac, qnah ngai hèm Chuaq thê haq lam rot dahwèq palauq đòeq ka hì ramènh, tàng ùh meh yŏc bac ti am ka mangai pa. 30 Juđa yŏc ƀênh hi loh lam. Jò aih trŏc khoe clam.

31 Jò Juđa khoe lam, Chuaq Jesus doe: “Manòeq kô khoe trùh jò Kon Mangai jah ranhòm, Boc Plình hadai jah kan ranhòm enh dalam ka haq. 32 Tàng joq Boc Plình ranhòm enh dalam ka haq, aih èh Boc plình hadai dèch kan ranhòm ka Kon Mangai enh dalam cla Boc Plình, Boc Plình broq qmòe manòeq kô raq. 33 Yôiq yôiq wì kon! Au oe tam ti pì toq biaq hòm, kô èh pì ti chaq au, tìah ka au anoe ka mangai Juđa: Nòe au lam pì lam ùh jah, manòeq au hadai anoe ka pì bàu aih. 34 Au am ka pì ranenh neo: aih pì ep loq waq ka dabau! tìah ka au khoe loq waq ka pì qmang leq, pì hadai loq waq ka dabau qmang aih”. 35 Tàng joq pì loq waq ka dabau, ajang aih èh wì phù cròng ma canau pì joq qnàng mangai tiaq hŏc da au”.

36 Simôn doe: Chuaq au! Ìh lam taleq? ChuaqJesus padreo bàu: Nòe au lam, manòeq ìh tiaq ùh jah, mahaq hì atìq èh ìh ma tiaq au”:

37 Phiero bòch: Chuaq au! Hagleq manòeq au ma ùh jah tiaq ìh? Au hùa tamùa hu tiaq Ìh. 38 Chuaq Jesus padreo bàu: “Ajoq ìh hùa tamùa hu tiaq au? Joq qnàng, joq qnàng, au doe ka ìh jò ia qnhòq rŏng ìh khoe piq yàng hangah đeh ùh qnì ka au”.