1 Khoe ka waiq khàn, Chuaq Jesus xam mangai tiaq hŏc pùh tŏc apah tau thòng diac Xêt-rôn. Ta aih i mòeq toq wuàn, Chuaq Jesus xam mangai tiaq hŏc mùt dŏng ta aih. 2 Juđa mangai ma blòq Chuaq Jesus hadai loq nòe aih, majah qmang aih Chuaq Jesus xam mangai tiaq hŏc bàc yàng tagop dabau ta aih. 3 Juđa qnung mòeq calùh lình, xam ƀài mangai enh wì pajàu kàn xam ƀài mangai Pharisi thê lam, wì haq wê hadreo xam ranac mùt ta aih. 4 Chuaq Jesus khoe loq i yiniq padon trùh ka dađeh, haq cadiang trùh bòch: “Pì chaq cabô?” 5 Wì aih padreo bàu: Nhèn chaq Jesus mangai Naxaret. Chuaq Jesus doe: “Au kô raq!” Juđa mangai blòq Chuaq Jesus hadai yòng ti wì ta aih. 6 Jò Chuaq Jesus doe: “Au kô raq” wì aih talùi tacro dŏng ta taneh. 7 Chuaq Jesus bòch hòm: “Pì enh chaq cabô?” Wì padreo bàu: Chaq Jesus mangai Naxaret! 8 Chuaq Jesus doe hòm: “Au khoe doe ka pì hacô raq au, tàng joq pì chaq rùp au, pì ep caqnaih wì kô lam. 9 Qmang aih dôq xìt troeq bàu cla haq doe: “Au ùh cađac hnhung mòeq ngai leq ìh ma khoe am ka au.” 10 Simôn Phiero i mòeq rala chang, haq doeh chang jêh mangai hapŏng da pajàu kàn, koh catech da mangai aih don pah qma. Mangai hapŏng aih yiniq haq Manchu. 11 Mahaq Chuaq Jesus thê Phiero: “Qmùt chang qmat ta caqnop beq, chrŏng Baq qnèp ka au wìa ka au ùh ôq qmòh?”

12 Khoe aih ƀài lình xam cla craq, hloe xam dìq dŏng ƀài mangai loh enh mangai Juđa wiang rùp kàt Chuaq Jesus. 13 Baxèm aih, wì aràng Chuaq Jesus trùh jang Anne, majah qmang aih haq aih baq mai da Caiphe, hanam aih haq qnang broq craq pajàu haqnhèq. 14 Caiphe aih raq mangai ma khoe doe ka mangai Juđa rameh: Dôq mòeq ngai raq cachìt am dìq dŏng ka mangai qnoeq, ma aih yeo troq.

15 Simôn Phiero xam mòeq ngai tiaq hŏc ma qnoeq lam tiaq atìq ka Chuaq Jesus. Mangai tiaq hŏc aih i canau ka craq pajàu haqnhèq, aih ìq haq jah mùt ti Chuaq Jesus ta hamlang hnim craq pajàu kàn. 16 Mahaq phiero aih haq yòng gòm enh gùng, haten ka trong qmang. Mangai tiaq hŏc mangai ma i canau ka craq pajàu haqnhèq loh poch tuàng ka mangai hapŏng cadrì ma gòm qmang, khoe aih haq hi qmùt Phiero mùt diq. 17 Mangai hapŏng cadrì ma gòm qmang aih bòch Phiero: Ìh kô, hadai mangai tiaq hŏc mangai tau, joq ùh? Mahaq Phiero doe: Au ùh xài. 18 Trŏc tanget, dìq ka ƀài hapŏng xam ƀài lình baxù tanùh ùnh, wì yòng dudan qnhìa ka hatôq. Phiero hadai yòng qnhìa ti wì.

Craq pajàu haqnhèq bòch Jesus

19 Craq pajàu haqnhèq ti àu bòch trùh ƀài mangai tiaq hŏc xam trong Chuaq Jesus loq hnài. 20 Chuaq Jesus doe: “Au hmaq anoe hloh yôt am ka wì phù cròng, jò leq au ma ùh hnài ta hnim tagop xam hnim kùh waiq, aih nòe dìq ka mangai Juđa tagop ti dabau, au qnhòq lah capoch cadoc qmòe yiniq cleq. 21 Hagleq pì ma ti àu bòch au? Drah lam bòch ƀòe mangai ma khoe lah tàng au hnài beq, wì aih loq au anoe cleq. 22 Jò Chuaq Jesus doe qmang aih, i mòeq ngai patìh ta hnim cwan yòng ten aih, dèch tì tep haq rai doe: Ìh hùa hatèu ka craq pajàu haqnhèq qmang aih ayòq? 23 Chuaq Jesus doe: “Tàng joq au capoch ajang leq ùh troq, patô beq, tàng au anoe troq gleq ìh ma jêh au? 24 Khoe aih, jò wì oe raq kàt, Anne thê wì aràng Jesus trùh ta hnim Caiphe aih craq pajàu haqnhèq.

25 Jò aih Simôn Phiero oe raq yòng qnhìa ùnh, i mangai bòch haq: Ìh kô hadai mangai tiaq hŏc haq tau joq ùh? Phiero hangah: Au ùh xài. 26 I mòeq ngai hapŏng da craq pajàu haqnhèq, hadròng ka mangai Phiero ma koh catech da haq don, doe: Ma ùh joq au hnoq ìh oe ta wuàn ôliu ti haq tau qmòh? 27 Mòeq yàng hòm Phiero hangah cađac hloe, wop jò aih raq ia hi rŏng.

28 Khoe aih, ƀài gucraq Juđa qnung Chuaq Jesus enh hnim Caiphe trùh tanòe hnim hadarh Rôma. Jò aih oe raq sroeh sroq. Cla wì haq ùh waq mùt tanòe hadrah, wì waq ka dađeh jah sròeh đòeq hu acaq ramènh Pancwa. 29 Qmang aih, Philat cadiang loh bòch wì: Pì tah hadrah ka haq kô yiniq lui cleq? 30 Wì padreo bàu: Tàng haq kô ùh xài mangai dù, nhèn ùh aràng haq trùh ta ìh. 31 Philat doe ka wì: Cla pì rùp ahlài hadrah tiaq deh ranenh da cla pì beq. Wì padreo bàu: Nhèn ùh i cwìang hadrah jêh đac cabô. 32 Qmang aih waq ka xìt qmang ka bàu Chuaq Jesus khoe anoe đeh cachìt qmang leq.

33 Philat wìh mùt tanòe hadrah, creo ka Chuaq Jesus hu bòch haq: Ìh kô ajoq bùa mangai Juđa? 34 Chuaq Jesus bòch: “Aih ìq cla ìh capoch tiaq deh manoh, loq khoe i cabô anoe ka ìh loq ka au? 35 Philat padreo bàu: Au kô ìq ma mangai Juđa qmòh? Mangai cla pì xam ƀài pajàu kàn rùp ìh aràng ka au. ìh khoe broq yiniq lui cleq? 36 Chuaq Jesus doe: “Diac au ùh xài oe ta crŏng taneh kô, tàng joq diac au oe ta crŏng taneh kô, ƀài bua au khoe tajêh đòeq tàt ƀài gucraq Juđa ùh dôq wì aih rùp au. Mahaq manòeq kô diac au ùh oe ta crŏng taneh kô”. 37 Philat bòch hòm: Tàng qmang aih ìh kô bùa joq qnàng qmòh? Chuaq Jesus tèu: “Joq qmang ka bàu ìh doe, au kô bùa, aih ìq raq au majah ha-uang loh ta crŏng taneh kô đòeq hu anoe bàu joq qnàng. Mangai leq mòeq bua da bàu joq qnàng, mangai aih èh tàng bàu au.” 38 Philat bòch: Bàu joq qnàng aih qmang leq?

Khoe aih haq loh hòm enh gùng doe ka ƀài mangai Juđa: Au ùh i hnoq qmòe haq kô i yiniq lui cleq. 39 Mahaq pì khoe hmòt, waq toq trùh hì Ramènh Pancwa, au hi caqnaih ka pì mòeq ngai loh enh hnim clêh, qmang aih pì i enh au caqnaih da pì bùa Juđa ùh? 40 Dìq dŏng ka wì cajiah cadêh: Apaq caqnaih haq qmat, mahaq caqnaih da nhèn Baraba! Baraba aih mangai loq ti atùng.