20
Wì bòch Jesus yŏc cwìang enh leq
1 I mòeq hì ta bài hì aih Chuaq Jesus qnang hnài wì tanòe hnim kùh waiq rai anoe ka wì trong Bàu lem, i ƀài pajàu kàn, ƀài mangai hnài ranenh, taqmùt ti ƀài gucraq trùh ta haq, 2 wì bòch: Anoe ka nhèn cwìang enh leq ìh majah broq qmang kô, cabô ma am ka ìh cwìang aih? 3 Haq padreo bàu: “Au hanoh bòch pì mòeq bàu. Drah anoe ka au: 4 Ƀaptem da Jon trùh enh Plình loq loh enh mangai? 5 Wì aih ta hatình ka dabau: Tàng bèn doe: Trùh enh Plình, aih èh haq bòch bèn: Qmang aih gleq pì ma ùh lùi bàu haq? 6 Tàng bèn doe: Loh enh mangai, aih èh dìq ka mangai bàc wì yŏc hmo đàp bèn, majah qmang aih wì khoe lùi Jon aih joq mangai pajàu. 7 Qmang aih wì padreo bàu doe: Nhèn ùh qnì haq loh enh leq. 8 Chuaq Jesus doe: “Au hadai ùh doe ka pì loq cwìang enh leq au ma broq ƀòe yiniq kô.”
Bàu patìah trùh mangai pìt nho
9 Haq alìah hloe ka wì qmang kô: “I mòeq ngai pìt mòeq wuàn plì nho, am ka wì broq axong wuàn nho aih khoe èh cla haq lam gùng hangai dùnh hì. 10 Trùh jò git plì, cla haq thê deh mòeq ngai hapŏng trùh ta ƀài pìt nho hu ta axon yŏc plì, mahaq ƀài mangai pìt nho jêh hapŏng aih, hnan haq hlài tì dech. 11 Wì craq thê hapŏng maqnoeq hòm, mahaq wì hadai jêh, hanip, èh hnan haq aih hlài tì dech. 12 Wì craq thê hapŏng yàng piq, wì hadai jêh haq aih loh habau rai hnan đac. 13 Craq wuàn nho aih doe: Au broq qmang leq kô? Au thê deh kon calô au ma loq waq, lam, broq braiq wì camaih iu ka haq.” 14 Mahaq jò ƀài mangai pìt nho hnoq kon calô aih trùh, wì hatuàng ka dabau: Hatau mangai kon majah waq dŏng kùng hang, beq bèn jêh cađac haq, aih èh kùng hang haq jah dŏng bèn. 15 Wì hi khwênh qnoh haq enh gùng ka wuàn nho rai jêh cađac hloe. Aih èh craq wuàn nho broq cleq ka ƀài aih? 16 Haq trùh jêh dŏng ƀài mangai pìt nho aih khoe èh yŏc wuàn aih am ka mangai qnoeq abèq.
Ƀài mangai ma tàng bàu aih wì doe: Boc Plình ùh i manaq taleq! 17 Chuaq Jesus ngan wì haq rai bòch: “Tàng qmang aih bàu ma achìh:
Hmo mangai thòq broq hnim cađac,
Khoe wìa hmo mùm hnim, bàu aih anoe cleq?
18 Mangai leq ta clìh ta hmo kô èh, hech loh dàc, hmo kô tùc troq cabô, mangai aih èh hech hoch dŏng. 19 Wop jò aih, ƀài pajàu kàn xam ƀài mangai hnài ranenh chaq trong jêh cađac haq, majah qmang aih wì loq bàu Chuaq Jesus alìah aih anoe trùh wì haq raq. Mahaq wì ùh hùa ka ƀài mangai bàc ta aih.
Am
Thèq ka Sêsa
20 Wì ti hanhoe ngan haq, wì thê ƀài mangai ti rinh broq patìah mangai khôn khauq, đòeq chaq trong hu goh haq ajang bàu tapoch, hu rùp haq am ka ƀài mangai i cwìang, mangai gàu ƀài cwan. 21 Wì aih bòch Chuaq Jesus bàu kô: Mangai hnài! Nhèn loq trong bàu tapoch, trong hnài da ìh tiaq trong jang, ùh loq waq tang ngai, yŏc bàu joq qnàng đòeq hnài trong Boc plình. 22 Nhèn akhòh am thèq ka Sêsa ùh? 23 Mahaq Chuaq Jesus loq ka manoh wì, haq doe: 24 “Am ka au ngan mòeq đo-ni-ê beq, Kô ìq qmù cabô, yiniq cabô?” Wì padreo bàu: Sêsa. 25 Haq doe ka wì: “Padreo da Sêsa yiniq cleq da Sêsa, am da Boc Plình yiniq cleq da Boc Plình.” 26 Enh ngèa mangai bàc wì bahlac bàu haq ùh jah. Toq hamàih ka bàu haq ta hatèu, wì hi loh ka hatinh.
Jò rìh hlài
27 I qnah ngai Sađusê, aih ƀài mangai loq doe ùh i kan rìh hlài, wì trùh haten ka Chuaq Jesus rai bòch: 28 Mangai hnài, Môise khoe đòeq ka nhèn ranenh qmang kô: Tàng mangai i daq yŏc mai, khoe haq cachìt, ùh i đeh kon, mangai oh aih ep yŏc mai deh daq aih đòeq haqmot hlài xinoe ka daq haq. 29 Qmang aih, i tapèh ngai oh daq. Mangai daq ramua yŏc mai, èh cachìt qnhòq i kon. 30 Mangai hatìa yŏc mai aih, 31 èh trùh mangai atìq, dìq dŏng wì tapèh ngai dìq yŏc mangai aih, wì dìq cachìt mahaq ùh lòm i kon. 32 Pulùch, mangai cadrì aih hanoh cachìt. 33 Qmang aih èh trùh hì rìh hlài gucadrì aih broq mai cabô? Majah qmang aih dìq dŏng tapèh ngai aih hanoh khoe yŏc gucadrì aih broq mai. 34 Chuaq Jesus doe: “Mangai qnhòng kô yŏc ŏng yŏc mai, 35 mahaq ƀài mangai ma khoe troq ka jah kan rìh hlài qnhòng atìq, jò rìh hlài enh kan cachìt, aih pi i yŏc ŏng yŏc mai hòm. 36 Majah qmang aih wì haq pi cachìt hòm, wì haq tìah ka ƀình plình, wì haq aih kon Boc Plình, aih kon da kan rìh hlài. 37 Mahaq da mangai cachìt rìh hlài aih Môise khoe am loq jò anoe hlài ùnh cheo ramù yila, jò haq doe Chuaq aih Boc Plình da Apraham, Boc Plình da Ysac, Boc Plình da Jacôp. 38 Haq ùh xài Boc Plình da mangai cachìt, mahaq da mangai rìh, majah qmang aih rìm ngai dìq rìh ka haq.” 39 I ƀài mangai hnài ranenh anoe ka haq: Mangai hnài, bàu Ìh anoe dìq jaq troq. 40 Wì pi hùa bòch tam haq mòeq bàu leq hòm.
Christ aih kon cabô
41 Khoe aih Chuaq Jesus bòch wì haq: “Hagleq wì ma doe Christ aih kon bùa Đawit? 42 majah qmang aih cla Đawit raq khoe anoe ta hset calêu plình rameh:
Boc Plình doe ka Chuaq au:
Hangui enh apah qma ka au,
43 Trùh jò au rùp mangai tagit ka ìh broq radua roh jènh ìh.
44 Đawit khoe crêu ka haq aih Chuaq, atìq ka aih haq wìa kon Đawit qmang leq?”
45 Jò dìq dŏng ka wì ta aih qnang tamàng, Chuaq Jesus doe ka mangai tiaq hŏc: 46 “Ngan oq! ƀài mangai hnài ranenh, aih ƀài mangai enh toq caxùnh eo yôh, ti lam dauq hawàt, enh wì kùh gàu ka rađeh taqne chòq, ta hnim tagop enh toq hangui nòe yi haqnhèq, jò acaq yiniang enh toq hangui enh qnhèq; 47 waiq khàn broq deh waq ka yôh, mahaq lŏnh apom hnim gucadrì hadrô. Ƀài aih èh Boc plình taqmòq kan baxa ka wì haq yeo bàc.”