3
Jon Baptit, mangaipalauq trong
1 Jò aih, Jon Baptit trùh tanòe hawit gùng Juđê hnài bàu lem 2 rameh: “Drah loq raxach beq! majah qmang aih diac plình trùh khoe haten” 3 Jon Baptit aih raq mangai pajàu Êsai ma khoe anoe:
“I bàu creo tanòe hawit:
Drah padon trong am ka Chuaq,
Broq ma tamang trong da Haq”.
4 Jon caxùnh eo broq enh xàc lŏcđa, kàt caxy qnam broq xam akia, acaq toq lìp xam diac xùt ta rôm wang. 5 Jò aih, dìq dŏng ka mangai ma oe ta Jêrusalem, xam dìq dŏng mangai oe gùng Galili, hloe xam gùng trong cròng diac Jôđan trùh dìq ti haq. 6 Jò wì khoe paqnoh dèh yiniq lui, wì dôq haq broq ƀaptem ka rađeh ta cròng diac Jôđan.
7 Mahaq jò haq hnoq bàc ngai nang noe Pharisi xam mangai Sađusê trùh đòeq hu jah broq ƀaptem, haq doe: Ƀài nang noe bìh plŏng meh, cabô hnài pì ma khoe loq wia đeh ka kan noèh hì atìq meh? 8 Qmang qmat, thê pì loh plì lem, dôq ùh hìaq qngwan ka pì ma khoe loq raxach, 9 èh apaq catèh: “Apraham aih kan cadraq nhèn, majah qmang aih au doe ka pì, enh hmo kô, Boc plình thê haq loh nang noe ka Apraham dua jah. 10 Manòeq kô, chòng khoe roh đòeq jang xèm long, long leq ma ùh loh plì lem, long aih èh kau hu bùh đac. 11 Da au kô, au yŏc diac broq ƀaptem am ka pì, mahaq i Mangai ma trùh atìq ka au, haq aih cwìang yeo haqnhèq ka au, au kô ùh tajì ka jah broq mangai wê da haq jep. Haq aih èh ma broq ƀaptem ka pì xam Yiang Hadròeh xam ùnh. 12 Tì Haq wê tŏnh đòeq hu dè palem dèh qmau ta haneh, lênh qmau Haq don đòeq ta hapom, manùh bùh ta ralùng ùnh ùh pat.”
Ƀaptem ka Chuaq Jesus
13 Jò aih, Jesus loh enh gùng Galili trùh ti Jon oe ta cròng diac Jođan, dôq Jon broq ka rađeh ƀaptem. 14 Mahaq Jon hangah rameh: Au kô ma khòh dôq Ìh broq ƀaptem ka rađeh, hagleq Ìh majah trùh glòq ti au? Chuaq Jesus padreo bàu: 15 Manòeq kô broq beq, bèn khòh broq ma gêh geo trong taq atoq qmang qmat. Jon hi broq tiaq ƀàu Chuaq Jesus. 16 Broq ƀaptem bu khoe, Chuaq Jesus loh khoe ka diac, tajòe qmòe diac plình tapèh, Chuaq Jesus hnoq Yiang Hadròeh Boc Plình, tìah ka trù pan loh jràp ta chac Haq. 17 I bàu enh plình doe: “Kô kon da au, mangai au ma loq waq dèh, lem manoh au rìm trong.”