1 Ƀài mangai Pharisi xam mangai Sađusê trùh ti Chuaq Jesus đòeq qnhro haq, wì bòch Chuaq Jesus broq kan halac loh enh plình am ka wì haq hnoq. 2 Mahaq Chuaq Jesus padreo bàu: “Jò trŏc ten xèq, pì doe: Trŏc kô èh lem, majah qmang aih trŏc gòh. 3 Yàng di sroq, aih pì doe: Hì kô èh i cayeo dêh, majah qmang aih hì kô trŏc clam ùh dai gòh. Pì loq hadro ngan trŏc qmang leq, laiq pì ùh qnì hadro ngan jò! 4 Qnang noe ngang dù, tango anang kô bòch ngan moeq yiniq cleq ma halac, mahaq ùh i kan halac leq enh gùng kan halac da pajàu Jôna.” Khoe aih Chuaq Jesus hi wia lam ta qnoeq.

5 Jò ƀài mangai tiaq hŏc tŏc khoe trùh pah tau diac, ùh hmàng wê ƀênh. 6 Chuaq Jesus doe ka wì haq: “Rabiaq haq, wèq rađeh khoe ka blo da ƀài mangai Pharisi xam mangai Sađusê.” 7 Mangai tiaq hŏc hèm ta manoh rai hatuàng ti dabau: Kô jao bèn ùh hmàng wê ƀênh. 8 Chuaq Jesus loq qmang aih, haq doe ka wì: Joq ƀài mangai biaq manoh lùi, hagleq pì ma hèm jao pì ùh i ka ƀênh? 9 Pì ma qnhòq loq, pì ma ùh hmàng padam toq ƀênh am ka padam muàn mangai acaq, rah haq pì toch bình jah toq leq rajo qmòh? 10 Ji laiq pì ma ùh hmàng tapèh toq ƀênh am ka pôn muàn mangai acaq, rah haq pì toch bình jah toq leq rajo? 11 Pì ma ùh tem? Ùh xài au enh anoe trùh ƀênh, mahaq pì ep ngan wèq rađeh khoe ka blo da mangai Pharisi xam mangai Sađusê. 12 Pang aih, mangai tiaq hŏc hi tem bàu Chuaq Jesus, haq ùh i anoe trùh blo broq ƀênh, mahaq haq enh ràu trùh bàu mangai Pharisi xam mangai Sađusê ma hnài.

13 Jò Chuaq Jesus khoe mùt ta gùng Sêsarê Philip, haq bòch ƀài mangai tiaq hŏc rameh: Tiaq bàu wì ma anoe aih, Kon mangai kô ìq cabô? 14 Mangai tiaq hŏc tèu bàu: Qnah ngai doe Ìh kô Jon Baptit, qnah ngai doe Jêrêmi, tàng ùh meh pajàu qnoeq. 15 Chuaq Jesus bòch: “Pì qmang leq? Pì doe au kô cabô.” 16 Simôn Phiero doe: Ìh kô raq Christ kon Boc Plình rìh halình. 17 Jò aih, Chuaq Jesus doe: “Simôn kon da Jôna, ìh qmat jah xôq ramot, mahnu kô ùh xài enh xech akia enh mahim am ka ìh loq, mahaq mahnu kô loh enh nòe Baq au oe ta plình. 18 Au hòm, au creo ka ìh: Ìh kô Phiero, kô èh au dèch paqnàng dèh Tagop Hadròeh enh crŏng hmo kô, ƀài qmang kan cachìt ùh jò leq hlàt blêq haq. 19 Kô èh au am ka ìh gahlòng diac plình, waq toq yiniq cleq ìh clênh padràng oe ta crŏng taneh, yiniq aih hanoh clênh padràng ta diac plình, èh hòm yiniq cleq ìh pèch caqnaih oe ta crŏng taneh, yiniq aih hanoh pèch caqnaih oe ta diac plình.” 20 Khoe aih haq ùh lòh mangai tiaq hŏc doe ka cabô loq ka rađeh aih Christ.

21 Pang aih, Chuaq Jesus men anoe ka magai tiaq hŏc loq kô èh haq ep tŏc ta Jêrusalem, ta aih haq ep chìuq bàc kan xalep enh tì kŏng ƀài gucraq, ƀài pajàu kàn xam ƀài mangai hnài ranenh, ta aih èh wì jêh cađac haq ka cachìt, trùh hì piq aih èh haq hi rìh hlài. 22 Phiero qnàng Chuaq Jesus lam takênh, haq tagàih: Ùh đòh Craq au, Boc Plình ma manaq taleq, ƀài yiniq aih ùh i trùh ti Ìh. 23 Chuaq Jesus wìh hlài rai tapoch ka Phiero: “Wia loh oe enh rù ka au! Satan, ìh qnang broq kan catoeh ka au, tagàu ìh ùh i hèm trùh trong da Boc plình, mahaq hèm trùh toq trong da kon mangai.”

24 Chuaq Jesus doe ka ƀài mangai tiaq hŏc: “Mangai leq enh tiaq au, ep tamùa rađeh, ep xùi dèh long pagat hu tiaq au. 25 Majah qmang aih, mangai leq enh dŏng dèh kan rìh, kan rìh aih èh hnhung, mangai leq jao au chìuq cađac qmòe rađeh, kan rìh mangai aih èh jah hlài. 26 Mangai leq jah dìq dŏng crŏng taneh kô mahaq cađac hnhung dèh mahua yiang, aih jah cleq? Haq aih èh yŏc cleq hu baxon yŏc hlài dèh mahua yiang? 27 Majah qmang aih, kô èh Kon mangai oe ta qne kan ranhòm dèh Baq, pajùm ti ƀài ƀình plình đòeq hu loh crŏng taneh, jò aih èh haq baha am ka tang ngai tiaq tang yiniq wì ma khoe broq. 28 Joq qnàng au doe ka pì: Taqne ƀài pì ma yòng jang kô, i qnah ngai ùh cachìt adroe ka jah hnoq Kon mangai trùh dèh enh diac haq.”