HSET MŎC
1
Jon Baptit mangai palauq trong
1 Baxèm Bàu lem da Chuaq Jesus Christ, kon calô Boc Plình. 2 Tìah ka khoe achìh tanòe hset pajàu Êsai rameh:
Kô au thê dèh mangai wê bàu lam enh ngèa ka Ìh,
Haq aih mangai đòeq hu palauq ka Ìh trong.
3 I bàu creo tanòe hawit,
Palauq đòeq trong ka Chuaq,
Pajang trong lam ka haq.
4 Jon Ƀaptit khoe trùh tagùng hawit, hnài rai broq ka wì ramènh ƀaptem da kan raxach, dôq jah kan caqnaih yiniq lui. 5 Dìq dŏng cròng diac Juđa xam mangai oe ta Jêrusalem trùh dìq ta haq. Anoe paqnoh dèh yiniq lui rai dôq haq broq ƀaptem ka wì ta diac Jodan. 6 Jon caxùnh eo broq enh xàc lŏcđa, kàt caqnam xam caxi akia, acaq toq ƀài lìp rai ôq diac xùt rôm wang. 7 Haq hnài rameh: Atìq ka au kô èh, I mòeq ngai i cwìang ùh hnau ka au, au ùh tajì ka jah broq đeh mangai kùp lêh caxi jep haq, 8 au broq ƀaptem ka pì xam diac, mahaq Haq aih èh broq ƀaptem ka pì xam Yiang Hadròeh.
Ƀaptem ka Jesus
9 Jò aih Chuaq Jesus trùh enh Naxaret gùng Galili, haq dôq Jon broq ƀaptem ka rađeh ta diac Jodan. 10 Jò Jesus bu loh enh gùng ka diac, haq hnoq plình tapèh èh Yiang Hadròeh tìah ka trù, loh jràp ta haq. 11 Èh i bàu loh enh plình doe: “Kô Kon da Au loq waq dèh, haq lem manoh Au rìm trong.” 12 Jò aih raq, Yiang Hadròeh qmùt haq tagùng hawit. 13 Èh haq oe tanòe hawit aih pôn jàt hì, dôq Satan padô rađeh. Haq oe pajùm mòeq qmang ti ƀài ngè rôm, khoe èh i ƀình plình trùh patìh ka haq.
Jesush hnài ka wì loq bàu lem
14 Atìq ka wì rùp clêh Jon. Chuaq Jesus trùh ta Galili hnài Bàu lem da Boc Plình. 15 Haq doe: “Khoe trùh jò! Diac Boc Plình trùh khoe haten, drah raxach rai lùi Bàu lem beq.
Jesus creo ka mangai tiaq hŏc ma baxèm
16 Jeus lam jènh ti haqmai diac raxìq Galili, haq hnoq Simôn xam oh haq, qnang tang hlàm ta hlŏng, majah qmang aih wa aih dìq mangai ranang ka. 17 “Drah tiaq Au, dôq au hu thê chôp lam tang hlàm mangai.” 18 Jò aih raq, wa cađac dŏng dèh hlàm lam hloe ti haq. 19 Chuaq Jesus lam hi hangai ka aih toq biaq, haq hnoq Jaco kon Sêbêdê xam oh haq oe ta boang, qnang padon dèh hlàm. 20 Ùh lòm trò, Haq creo ka wa aih, èh wa oh daq aih đòeq Sêbêđê baq wa haq, oe ta boang ti ƀài mangai broq acaq kùng, đòeq tiaq haq.
Jesus drùh qnoh kan kan kiac
21 Wì haq lam ta Cabênaum, trùh hì Sabat, Chuaq Jesus mùt tanòe hnim tagop qyoh, haq hnài wì. 22 Dìq ka mangai oe ta aih hamàih ka bàu haq hnài, majah qmang aih bàu haq hnài wì tìah ka mangai i cwìang itai, ùh xài troeq da ƀài mangai hnài ranenh.
23 Hanoh jò aih, tanòe him tagop qyoh i moeq ngai kiac pawè, 24 haq creo: Jesus, mangai Naxaret, Ìh enh broq cleq ka nhèn, Ìh trùh hu palùng đac nhèn qmòh? Au loq Ìh qmat cabô: Ìh, Mangai hadròeh da Boc Plình. 25 Chuaq Jesus tapoch ka haq: “Oe ma hatinh haq! Drah loh khoe ka mangai kô!” 26 Kiac jròng rapôh mangai aih, rai cachech cadêh èh hi loh hloe enh gùng ka mangai aih. 27 Mangai leq mangai meh hamàih đeh hra, wì bòch dabau: Cleq kô ìq wa, kô trong hnài maneo qmòh? Mangai kô joq i cwìang, trùh kiac jròng dua iu bàu haq thê! 28 Yiniq haq wì ràu, maloq khoe jàp dudan gùng Galili.
Jesus broq brêh bàc ngai
29 Ƀu loh enh nòe hnim tagop, Chuaq Jesus xam mangai tiaq hŏc lam ti Jaco xam Jon mùt ta hnim Simôn xam An rê. 30 Miq mai Simôn tacat qnang caqnùng ta juàng, wì drah anoe ka Chuaq Jeus loq. 31 Chuaq Jesus lam trùh nòe haq kùi, carùp tì rai dèch haq yòng. Kan tacat hi hnhung, èh haq hi patìh ka wì.
32 Xèq aih, jò mahì khoe clìh, wì aràng ƀòe mangai ùh hrŏc xam ƀài mangai i kiac pawè trùh ka Chuaq Jesus. 33 Dìq dŏng ka mangai oe ta plài, tagop dabau yòng ajang qmang hnim, 34 Chuaq Jesus broq bàc ngai brêh ka yinìq. Haq hadai drùh qnoh bàc kiac, mahaq Haq ùh lòh ƀài kiac doe cleq, majah qmang aih ƀài kiac aih loq ka haq.
Jesus waiq khàn tanòe hawit
35 Sroeh sroq, jò trŏc oe raq clam, Chuaq Jesus loh enh hnim lam tanòe hawit, haq waiq khàn ta aih. 36 Simôn xam ƀài bua lam chaq haq, 37 Jò hnoq Haq, wì doe: Rìm ngai qnang ti chaq ìh. 38 Chuaq Jesus padreo bàu: “Beq bèn lam taqnoeq, trùh roc plài haten ta kô, dôq au hu hnài ta aih. Jao aih ìq raq au majah khoe trùh.” 39 Haq lam jàp gùng Galili, hnài ta hnim tagop qyoh rai drùh qnoh kan kiac.
Jesus broq brêh ka mangai bacùn
40 I mòeq ngai bacùn trùh ti Haq, rai hacùn cràng rai waiq: Waiq Chuaq! Tàng joq ìh ma waq, ìh broq au brêh. 41 Chuaq Jesus tamèt ta manoh, haq hnho tì bèq mangai bacùn aih, haq doe: “Au waq, brêh beq.” 42 Tajòe qmòe, kan bacùn hnhung hloe haq aih hi jah brêh. 43 Chuaq Jesus thê haq aih loh enh gùng rai tanap: 44 “Ngan oq! Ùh jah anoe ka cabô loq. Mahaq ìh lam patô rađeh enh ngèa ka ƀài pajàu, ìh khoe jah brêh qmat, ìh dèch ramènh troeq bàu Môise thê đòeq anoe patô ka wì.” 45 Yàng èh, loh enh gùng, haq bahìa yiniq kô, lam pang leq haq anoe pang aih, jaq Chuaq Jesus loh ka pi jah mùt ta plài ka lem, haq ep oe đeh enh gùng, oe tanòe hawit, èh wì phù cròng jàp jìa trùh ti haq.