1 Jò khoe ten trùh Jêrusalem, tanòe plài Bêphajê xam plài Bêthani tajang ka wang Oliu, Chuaq Jesus thê baiq ngai tiaq hŏc, 2 Haq doe ka wa: “Mùt ta plài enh ngèa ka chôp, jò mùt ta aih hnoq moeq toq lùa qyoh wì kàt ta aih, qnhòq i cabô lah tŏc crŏng haq, chôp canaih haq khoe aih tiaq ahlài tacô ka au. 3 Tàng i mangai leq loq bòch: Gleq ma jah broq qmang qmat? Chôp doe ka wì: Chuaq i yiniq waq, aih èh wì hi dôq chôp tiaq ahlài”. 4 Wa aih hi lam, hnoq kon lùa qyoh qnang kàt enh gùng tajang ka trong qmang, wa hi lêh canaih. 5 Wì ma oe ta aih i qnah ngai oe ta aih bòch: Chôp caqnaih kon lùa qyoh qmat hu broq cleq? 6 Wa aih padreo bàu qmang ka Chuaq Jesus khoe tanap, wì hi canaih wa lam.

7 Wa tiaq ahlài kon lùa aih ka Chuaq Jesus, yŏc dèh eo hlèch enh crŏng lùa aih, khoe aih Chuaq Jesus hi tŏc enh crŏng. 8 Bàc ngai lêh dèh eo hlèch ti trong lam, i qnah ngai loh ta ruàng goh hamenh long xap roc trong. 9 Mangai lam adroe, mangai lam atìq dìq moeq bàu cadêh: Hôsana! Khòh manè ka Mangai trùh enh dalam ka yiniq Chuaq! 10 Xôq ramot am ka diac padon trùh kô èh, aih raq diac bùa Đawit, kan cadraq bèn! Hôsana oe ta Plình haqnhèq.

11 Chuaq Jesus mùt ta Jêrusalem, haq lam ta hnim kùh waiq. Haq ti ngan rìm yiniq dudan ta aih, jò mat mahì khoe haqneq, haq xam moeq jàt baiq ngai tiaq hŏc loh enh aih lam ta plài Bêthani.

Long pŏc croh

12 Sroq atìq, jò khoe loh enh plài Bêthani, aih Haq pangot. 13 Hnoq enh hangai i moeq xèm long pŏc i hla, Haq lam ngan long aih i ka plì ùh, jò trùh haten ka xèm long hnoq toq hla, majah qmang aih ùh xài jò plì. 14 Haq tapoch ka long aih: “Pang kô èh pi i cabô oe kaq plì enh gè hòm.” Dìq dŏng mangai tiaq hŏc dìq tàng bàu aih.

15 Jò trùh ta Jêrusalem, Haq mùt ta hnim kùh waiq, drùh qnoh ƀài mangai padro ta aih, blòq caƀŏng mangai ma halìh ƀac hloe xam gèq wì ma atech trù. 16 Haq ùh am cabô wê cleq jah lam pagat trong aih. 17 Khoe aih haq hnài wì: “Ajoq i bàu achìh, Hnim au jah creo hnim waiq khàn ka rìm taneh diac? Mahaq pì khoe broq haq loh pù ƀài mangai atùng.” 18 Ƀài pajàu xam ƀài mangai hnài ranenh tàng bàu aih, hi chaq trong hu jêh cađac haq, wì ùh hùa ka haq, majah qmang aih dìq dŏng phù cròng mangai leq mangai meh hamàih đeh hra ka bàu haq hnài.

19 Jò trŏc khoe ten clam, Chuaq Jesus xam mangai tiaq hŏc loh enh aih.

20 Sroq atìq, jò lam trong aih, wì haq hnoq long pŏc khoe croh trùh ta riah. 21 Phiero hi hmàng hlài haq doe ka Chuaq Jesus, Rabi, Ìh ngan tau, long pŏc ìh tapoch ka haq hì nèh khoe croh. 22 Chuaq Jesus doe: “Thê pì i manoh lùi Boc Plình. 23 Au doe qnàng ka pì, tàng cabô doe ka bui wang kô: lam caqnìh rađeh ta diac raxìq beq, ta manoh haq aih ùh i kan rangòt, mahaq lùi troeq bàu rađeh ma khoe anoe, haq jah qmang dèh ka bàu. 24 Aih ìq au majah doe ka pì: Rìm yiniq pì bòch jò pì waiq khàn, drah lùi pì khoe jah, aih èh pì hijah yiniq aih. 25 Jò pì yòng waiq khàn, tàng joq pì oe i yiniq cleq ùh hatroq ka cabô, drah cađac yiniq aih ka wì beq, aih èh Baq pì oe ta plình hanoh cađac da pì yiniq lui. 26 (*hset dùnh) Tàng pì qnhòq cađac da wì yiniq lui, Baq pì oe ta plình hadai qnhòq cađac da pì.”

27 Chuaq Jesus xam mangai tiaq hŏc wìh ta Jêrusalem hòm, jò Chuaq Jesus qnang cadiang lam ta hamlang hnim kùh waiq, ƀài pajàu kàn, ƀài mangai hnài ranenh hloe xam ƀài gucraq thia ajang haq. 28 Wì aih bòch: Ìh yŏc cwìang enh leq ma broq qmang kô? Cabô ma khoe thê ìh broq? 29 Chuaq Jesus padreo bàu: “Au hanoh bòch pì moeq bàu. Pì padreo bàu au, aih èh au hadai doe ka pì loq au yŏc cwìang enh leq hu broq ƀài trong kô. 30 Ƀaptem da Jon aih loh enh Plình, loq loh enh kon mangai? Anoe ka au beq!” 31 Wì aih hatuàng ti dabau, wì doe: Tàng joq bèn doe loh enh plình aih èh haq bòch bèn: Meh pì ma ùh lùi Jon? 32 Mahaq tàng bèn doe: loh enh kon mangai? Wì ùh hùa ka mangai ta aih, majah qmang aih, mangai ta aih dìq lùi Jon aih mangai pajàu joq qnàng. 33 Aih ìq wì haq majah hi doe ka Chuaq Jesus: Nhèn ùh qnì. Chuaq Jesus doe ka wì haq: “Au hadai ùh anoe ka pì loq au yŏc cwìang enh leq hu broq yiniq kô”.