1 Qmang aih, enh dalam ka Christ tàng loq i cleq hu alòng dabau, tàng enh manoh loq waq loq i cleq đòeq wiang dèch dabau, loq i cleq axong ka dabau enh dalam Yiang Hadròeh, tàng loq i manoh loq ha-och xam kan tamèt, 2 pì oh daq khòh mòeq bàu ti dabau, hadai qmòeq kan loq waq, hadai pajùm mòeq ta Yiang Hadròeh, qmang aih broq ka au jah lem bùi hi gêh. 3 Apaq broq cleq enh manoh tajênh, toq bang tìang ùh loh cleq, mahaq loq hamon rađeh, ngan mangai qnoeq yeo haqnhèq ka rađeh. 4 Rìm ngai ta oh daq apaq enh jah toq ka rađeh mahaq ep ngan lòeq ka wì qnoeq diq.

5 Drah hadai i mòeq manoh tìah ka Christ ma khoe i, 6 Haq daq adàng ka Boc Plình enh baxèm raq, mahaq ùh ngan kan daq adàng ka Boc Plình aih bìac ep rùp ka cajap, 7 cla haq raq khoe cađac rađeh, yŏc chac da mangai hapŏng, đòeq wìa kon mangai. 8 Haq khoe rìh tìah ka mangai, haq paqnoh rađeh ka haqneq, iu bàu trùh ma cachìt, mech cachìt qmòe talong pagat. 9 Dài aih raq, Boc Plình majah khoe dèch haq ka haqnhèq, am ka haq yiniq yeo haqnhèq dŏng ka yiniq ma qnoeq, 10 waq toq hi tàng yiniq Chuaq Jesus, rìm toq cràng ta trŏc, ta taneh, enh qneq ka taneh, dìq dŏng ep hacùn, 11 rìm toq rapet dìq creo ka Chuaq Jesus Christ aih Chuaq, rai dèch kan ranhòm ka Boc Plình aih Baq

12 Qmang aih, yôiq oh daq da au ma loq waq deh, tìah ka pì khoe iu yôt bàu au, ùh xài toq jò au i mat ta qmat, mahaq manòeq kô jò au arù, thê ùh hnau ka aih hòm, yŏc manoh yùq crè tarìt đòeq hu broq kan dèch claih ka cla. 13 Majah qmang aih Boc Plình tamèt ta manoh cliac oh daq rai enh rai broq tiaq manoh lem haq. 14 Yac ka broq cleq apaq rangòt rai mumùc, 15 đòeq oh daq rìh taqne nang noe ngang dù kô, jah wìa kon da Boc Plình, ùh i ka xìt, ùh i habau, ùh i nòe leq đòeq hu cwò, taqne nang noe aih, oh daq wèq Trong kan rìh, sreo qngah tìah ka hadreo ta crŏng taneh; 16 đòeq trùh hì da Christ, au jah catèh khoe ùh hìaq qngwan ka rađeh ma cadàu, ùh qngwan ka đeh ma xalep. 17 Yac ka mahim au, ep pùc enh qnhèq ka ramènh tadreo xam ƀài dahwèq enh manoh lùi da oh daq, dua manoh au lem bùi, rai lem bùi pajùm ti oh daq. 18 Oh daq hanoh lem bùi trong aih, rai lem bùiti au.

19 Au ngèh enh dalam ka Chuaq Jesus, drah thê Timôthê rênh lam ta oh daq, đòeq au jah loq pì oh daq qmang leq, dôq manoh au jah catèm. 20 Joq qnàng, au ùh i ka cabô ma tìah ka haq aih mòeq manoh ti au đòeq dìq ka manoh wiang patìh ka pì oh daq; 21 mangai leq mangai meh, chaq waq ka jah toq ka rađeh, ùh chaq ka Chuaq Jesus Christ. 22 Mahaq oh daq loq haq aih mangai ùh tablòq manoh, haq khoe pajùm manoh wiang patìh ka Bàu lem ti au, tìah qmòe kon oe deh ti baq. 23 Aih ìq, au majah enh rênh thê haq lam ta oh daq, jò au bu loq ka rađeh kô èh qmang leq; 24 enh dalam ka Chuaq cla au lùi dèh qmang kô hòm: cla au hadai jah rênh trùh.

25 Mahaq manòeq kô, au hèm au ep thê Êpha-Phôđit hlài ta oh daq, haq aih hadai oh daq au, mangai abroq pajùm ti au, mòeq bua ka au haq aih mangai wê bàu, mangai oh daq khoe thê haq trùh hu patìh am yiniq cleq au qnang nan. 26 Majah qmang aih, haq toq tangèh jah glàm dìq dŏng ka pì oh daq, haq toq mangò, majah qmang aih haq tàng doe pì oh daq khoe loq ka haq ùh hrŏc. 27 Joq qnàng haq ùh hrŏc ten cachìt, mahaq Boc Plình khoe ha-och ka haq, èh ùh xài toq ka haq mahaq hloe xam ka au, đòeq au ùh hìaq khoe mangò loh tam ka mangò hòm. 28 Qmang aih au khoe thê haq drah lam, dôq oh daq hnoq haq oh daq hujah manè, au hadai jah yeo ka mangò. 29 Qmang aih oh daq khòh yŏc dìq ka manoh lem bùi, hu đìh mangai ta Chuaq, thê pì i manoh loq ta-iu ka ƀài mangai qmang aih; 30 majah qmang aih, taiq patìh ka Christ dài haq majah hwaq cachìt, haq pi dèh dèm qmòe dèh kan rìh, đòeq hu akop hlài ƀài yiniq oh daq ma khoe ùh jah wiang ka au.