1 Ìh achìh ka ƀình plình da Tagop Hadròeh Sac-đe rameh:

Kô bàu da Mangai carùp wê tapèh yiang da Boc Plình xam tapèh toq halŏng: Au loq yiniq broq da ìh, ìh i qmòe tìang doe rìh mahaq cachìt. 2 Drah rìu beq! drah broq ka cajap hlài ƀòe yiniq ma oe i, aih ƀòe yiniq ma oe toq hu cachìt, majah qmang aih, enh ngèa Boc Plình au ùh i hnoq ìh broq yiniq cleq ma gêh geo. 3 Qmang aih hmàng hlài beq! Ìh khoe jah yŏc khoe jah tàng qmang leq, thê cajap tiaq qmang aih rai loq raxach beq. Tàng ìh ùh drah rìu, au trùh tìah taiq ka mangai lam atùng, ìh ma qnì jò leq au trùh rùp ìh. 4 Mahaq ta Sac-đe oe i biaq ngai qnhòq hìaq broq amùa deh ka eo yôh: Wì aih èh jah caxùnh eo taboc hu lam ti au, majah qmang aih wì haq tajì ka jah qmang aih.

5 Mangai leq blêq, jah caxùnh eo taboc qmang ka wì aih. Au ùh xùt đac yiniq mangai aih loh khoe ka hset kan rìh, mahaq au creo ràu yiniq haq aih enh ngèa Baq xam enh ngèa ƀòe ƀình plình da Haq. 6 Cabô i don, drah tamàng bàu Yiang Hadròeh anoe ka ƀòe Tagop Hadròeh.

Achìh ka Tagop Hadròeh Phila-đenphi

7 Ìh hadai achìh ka ƀình plình da Tagop Hadròeh Phila-đenphi rameh:

Kô bàu da Mangai hadròeh, Mangai hnhuh jang, Mangai i khoaq da Đawit, Haq hi pèch pi i cabô oe jah clênh, Haq hi clênh pi i cabô oe jah pèch: 8 Au loq yiniq broq da ìh, au khoe pèch mòeq toq qmang enh ngèa ìh, ùh i cabô jah clênh; majah qmang aih au loq ìh biaq đeh padren, mahaq khoe wèq bàu au, ùh hangah đac ka yiniq au. 9 Au am ka ìh biaq ngai oe tagop Satan, wì haq doe radeh kô mangai Juđa, yàng ma joq qnàng aih ùh xài, wì haq capoch qnùt, kô èh au broq ka wì haq thia bla op đeh ta jènh pì, aih èh dôq wì haq loq au khoe loq waq dèh ka ìh. 10 Pàng ìh khoe dràng cajap wèq tiaq bàu thê da au, kèm manoh jò glàm nanxa, au hadai wèq ìh claih kan qnhro kàn padon trùh jàp ta crŏng taneh aih la jò đòeq qnhro dìq dŏng ka mangai. 11 Au rênh trùh, drah wèq ƀòe yiniq ìh khoe i, đòeq ùh hìaq i cabô jah yŏc da ìh cadoh lem diac plình.

12 Cabô blêq, au jah am haq broq jrang ta hnim kùh waiq Boc Plình au, aih èh wì haq pi talah enh aih hòm; au jah yŏc yiniq Boc Plình au, xam yiniq plài Boc Plình, aih Jerusalem maneo, (Jerusalem ma loh enh plình, loh enh Boc Plình au) xam yiniq neo da au đòeq hu achìh ka wì haq. 13 Cabô i don, drah tamàng bàu Yiang Hadròeh anoe ka ƀòe Tagop Hadròeh.

14 Ìh hadai achìh ka ƀình plình da Tagop Hadròeh Laođixê rameh:

Kô bàu da Mangai Amen, aih Mangai panhìn ùh tablòq manoh joq qnàng, haq aih broq cla craq rìm yiniq Boc Plình ma broq loh enh jò baxèm: 15 Au loq yiniq broq da ìh, ìh ùh hangeo hadai ùh tôq, Au ngèh ka ìh hangeo tàng ùh meh tôq dŏng aih yeo hnau hòm! 16 Mahaq ìh toq ha-onh, ùh tôq ùh hangeo, dài au majah laq qnoh đac ìh. 17 Cla ìh doe: Au padrŏng, au khoe kan, pi oe nhet cleq hòm; yàng ìh ùh canau ka đeh kô hrah hrôm, nanxa, pa hamoq, lua mat rai ta talùch chac dech. 18 Au pariaq ìh drah rot enh au wang ma khoe bùh ta ùnh, đòeq ìh jah padrŏng kan, rot ƀòe blah eo taboc đòeq hu caxùnh, qmang aih èh kan camaih kan rahòng ìh jah taqmàn cadoc, rot jreo đòeq xùt mat dôq ìh hujah xau hnoq. 19 Mangai leq au ma loq waq dèh aih au cwò au hnài; qmang aih drah i manoh loq nhet, loq raxach. 20 Hacô, au yòng enh gùng rai clôq qmang; tàng i cabô tàng au bàu rai loh pèh qmang ka au, aih èh au mùt pajùm ti haq, acaq ti haq, haq acaq ti au.

21 Mangai leq blêq, au am haq haqngui ti au ajang nòe gèq da au, tìah qmang ka au khoe blêq jah haqngui ti Baq au ta gèq haq. 22 Cabô i don, drah tamàng bàu da Yiang Hadròeh anoe ka ƀòe Tagop Hadròeh!