1 Khoe aih au hnoq, ta kŏng pah qma Mangai ma haqngui tagèq bùa i mòeq toq hset achìh enh dalam xam enh gùng, hset kô khoe i tapèh toq teo nìm padràng. 2 Au hadai hnoq mòeq ƀình plình ma dêh padren crêu cadêh: Cabô ma tajì đòeq pèh hset kô èh rai doeh ƀòe nìm pateo kô? 3 Yac ka ta trŏc ta taneh, hloe enh caqnàm taneh dua pi oe i bô jah pèh ngan, loq oe jah chri ngan enh dalam hset canua kô hòm. 4 Pàng ùh i qmòe ka cabô ma tajì ka jah pèch jah chri ngan enh dalam ka hset canua aih hòm, dài au majah toq hmoe diac mat loh da dahràc. 5 Jò aih i mòeq ngai taqne wì gucraq doe ka au: Pi dùh hmoe, hatau, sutùh da xinoe Juđa, aih hamŏng da bùa Đawit, khoe blêq, Haq aih jah pèch hset qmat rai toeh tapèh toq nìm padràng qmat.

6 Khoe aih au hnoq, Kon Trìu yòng qne Gèq bùa, èh pôn toq ngè rìh xam ƀòe wì gucraq oe dudan haq; Kon Trìu qmang ka khoe cachìt ka wì jêh đac, Kon Trìu i tapèh toq haki xam tapèh toq mat, aih raq tapèh yiang da Boc Plình ma thê loh lam jàp crŏng taneh. 7 Kon Trìu cadiang trùh, yŏc hset ma oe ta tì pah qma da Mangai ma haqngui tagèq bùa. 8 Jò Haq yŏc hset, pôn toq ngè rìh xam baiq jàt pôn ngai gucraq dìq bla op enh ngèa Kon Trìu, mòeq ngai wê mòeq toq broc xam ƀòe cabi wang ta aih tah bình gahnàu xua thùm; aih la bàu waiq khàn da ƀòe mangai da Boc Plình. 9 Wì haq calêu ƀoe maneo rameh:

“Ìh tajì ka yŏc hset, rai doeh ƀòe teo nìm;

majah qmang aih ìh khoe chìuq cachìt,

yŏc deh mahim cla đòeq hu baxon ka Boc Plình,

ƀòe mangai ta rìm xinoe, rìm bàu capoch, rìm adrech, rìm diac,

10 Haq broq wì aih wìa diac da bùa, wìa pajàu patìh ka Boc Plình bèn;

wì aih jah broq mangai pagàu ta crŏng taneh.”

11 Khoe aih, au ti ngan, au tàng haraya bàu da ƀình plình bình ka muàn ka jàt muàn. Wì dudan ka Gèq xam ƀòe ngè rìh xam ƀòe gu craq. 12 Pajùm ti dabau wì haq capoch cadêh:

13 Atìq ka aih au tàng rìm yiniq ma khoe jah broq loh oe ta plình, ta crŏng taneh, ta caqnàm taneh, ta diac raxìq, xam rìm yiniq ma oe ta aih dìq anoe rameh: “Waiq ka Mangai ma haqngui tagèq bùa xam Kon Trìu jah bàu manè enh, jah kan padèch haqnhèq, ranhòm xam kan i cwìang itai mòeq đòe!” 14 Pôn toq ngè rìh dìq doe: “Amen”. Èh ƀòe gucarq hi bla op ta haqneq đòeq kùh waiq.