1 I mòeq ngai am ka au mòeq catoch triang niaq tìah ka long wêh maneh, rai thê au: “Yòng beq, wêh hnim kùh waiq da Boc Plình, prang tadreo, rèn xam ƀài mangai kùh waiq ta aih”. 2 Mahaq hamlang enh gùng ka hnim kùh waiq aih cađac, apaq wêh broq cleq majah qmang aih nòe aih khoe hataq ka mangai diac qnoeq, dôq wì jôiq padit plài hadròeh aih wop jah pôn jàt baiq khê. 3 Khoe èh au hi am cwìang itai deh ka wa baiq ngai ma lam anoe panhìn da au, wa aih caxùnh eo bai briang lam capoch bàu pajàu ta 1.260 hì.

4 Wa haq, aih raq baiq toq long ôliu, aih raq baiq toq jènh đen ma yòng enh ngèa ka Chuaq da crŏng taneh. 5 Tàng cabô enh tabroq ka wa aih, aih èh i ùnh loh enh hacùng wa bùh đac mangai ma tagit ka wa: Mangai leq tabroq ka wa, ep cachìt qmang aih. 6 Wa aih i cwìang clênh qmang plình, đòeq trŏc ùh mè ta ƀài hì wa capoch bàu pajàu; wa aih i cwìang thê diac wìh wìa mahim rai broq bàc kan ranàc ta crŏng taneh, enh broq jò leq dua jah.

7 Jò wa aih khoe gêh ka lam anoe panhìn, aih i ngè rìh tŏc enh hwinh jrùq, tajêh ka wa haq; ngè rìh aih blêq wa haq, khoe èh jêh đac wa. 8 Hanang wa haq wì taqngùi đac ti trong lam da plài kàn, capoch aprìah aih raq Sôđôm xam Êdiptô, nòe Chuaq da wa haq ma khoe tiang đình talong pagat.

9 Mangai oe rìm nòe ta crŏng taneh, rìm xinoe, rìm bàu capoch, rìm diac dìq jah hnoq hanang wa aih ta piq hì qne, wì ùh lòh catùh hanang aih ta ralùng. 10 Ƀài mangai ta crŏng taneh lem bùi rahèh rahah acaq ôq, qnèp aràng ka dabau dahwèq jò hnoq wa khoe cachìt, majah qmang aih baiq ngai pajàu Boc Plình kô khoe broq ka mangai ma rìh ta crŏng taneh bàc kan ranàc.

11 Mahaq atìq ka piq hì qne aih, i hi hèm rìh enh Boc Plình mùt ta wa baiq ngai aih: Wa aih padinh yòng qmòe ka jang, ƀài mangai ma hnoq wa dìq jaq cadròt crè. 12 Wa tàng i bàu enh plình creo ka wa: “Tŏc tacô”! Wa tŏc ta trŏc enh dalam ka cato yùc kàn, rìm ngai ma tablêq ka wa dìq hnoq. 13 Wop jò aih taneh loh kan ralàng kàn, mòeq phàn mòeq jàt da plài kàn ralòeh dŏng, tapèh muàn mangai cachìt ta kan ralàng aih, ƀài mangai ma oe rìh hnoq qmang aih loh ka cadròt, rai dèch bàu manè apôi Boc Plình ma oe ta plình.

14 “Ranàc” ma baiq bu khoe; kô “Ranàc” piq rênh trùh!

15 Ƀình plình ma tapèh hlui ken, ta trŏc i ƀài bàu dêh, anoe rameh:

16 Baiq jàt pôn gucraq qnang haqngui dèh tagèq dudan ka Boc Plình, dìq kùp ta haqneq, kùh waiq Boc Plình, 17 Wì doe rameh:

18 Ƀài diac tacrŏng taneh plôh nòeh, mahaq kan nòeh da Ìh khoe trùh,

19 Jò aih hnim kùh waiq Boc Plình ta plình hi tapèch, wì hnoq Hom Tajao ta hnim kùh waiq Haq, khoe aih i ƀài kan camlet, i atêh tagruàng, bàu cađah, i taneh ralàng xam mè clìh cato preo kàn.