1 Atìq ka aih, au hnoq mòeq ƀình plình loh enh plình, tì haq wê gahlòng da hwin jrùq xam mòeq hadrang caxi datoeq kàn. 2 Khoe aih haq rùp bìh kàn, aih bìh dùnh calah nèh, aih kan kiac, aih Satan, clang kàt đòeq haq ta mòeq mùan hanam. 3 Haq khwênh caqnìh bìh aih ta hwin jrùq, clòng qmang hwin jrùq aih khoe èh haq hi nìm padràng, dôq bìh aih pi oe jah lam qnùt ƀài diac ta crŏng taneh hòm, trùh jò leq hi khoe ka mòeq mùan hanam. Khoe aih èh, Satan hadai ep jah caqnaih mahaq ùh dùnh.

4 Au hnoq ƀài gèq, ƀài mangai haqngui tagèq jah cwìang đòeq hadrah. Khoe aih au hnoq mahua ƀài mangai khoe ep cachìt ka wì pot ranŏng taiq wì haq lam anoe panhìn ka Chuaq Jesus xam bàu da Boc Plình, mahua ƀài mangai ma ùh kùh waiq ngè xòc xam radua qmù haq, ùh waq yŏc teo hadro da haq, yac ka tangòng ta kŏng. Wì aih jah rìh hlài, jah wèq cwìang pajùm ti Christ ta mòeq mùan hanam. 5 Ƀài mangai cachìt ma qnoeq ùh jah rìh hlài jò qnhòq khoe ka mòeq mùan hanam. Aih kan rìh hlài yàng ma baxèm.

6 Joq xôq ramot qnàng, joq hadròeh qnàng ka ƀài mangai majah kan rìh hlài yàng ma baxèm! Kan cachìt yàng ma atìq pi oe i cwìang cleq enh qnhèq ka wì haq; mahaq wì aih jah broq pajàu da Boc Plình xam da Christ, jah hadai broq bùa ti Haq ta mòeq mùan hanam.

7 Jò mòeq mùan hanam hi dìq, Satan hi jah caqnaih, 8 loh enh gùng ka nòe ma clêh, haq lam padô mangai oe jàp jìa ta crŏng taneh, mangai Got xam mangai Magot; haq gop ahlài wì oe mòeq nòe đòeq padon tajêh tablah, wì bàc qmang ka braih diac raxìq… 9 Wì haq lam jàp ta taneh, ti dudanh nòe mangai da Boc Plình oe xam plài Haq ma loq waq deh. Mahaq i ùnh enh plình loh bùh wì haq cachìt dŏng. 10 Satan aih mangai ma ti padô wì haq aih èh jah caqnìh đac haq ta bau ùnh xam liu hwìn, ta aih khoe i ngè rìh xòc xam ƀài pajàu qnùt. Wì haq ep chìuq kan baxa xam dahì xam damang trùh hloe mòeq đòe.

11 Khoe aih au hnoq mòeq toq gèq taboc kàn xam Mangai ma haqngui ta aih, enh ngèa Haq trŏc taneh amot dŏng, pi hnoq nòe ajang leq đòeq ka wì haq hòm. 12 Au hnoq mangai cachìt xam kàn xam qyoh, dìq yòng enh ngèa ka nòe hadrah, ƀài hset dìq tapèch. Èh i mòeq toq hset qnoeq hòm, aih hset kan rìh; mangai cachìt jah hadrah tiaq deh trong wì haq ma broq, wop qmang ka bàu achìh ta hset aih. 13 Diac raxìq padreo mangai cachìt ma oe ta haq; Kan cachìt xam Hwin hadai padreo hlài mangai cachìt oe ta haq. Rìm ngai wì aih chìuq jah hadrah tiaq trong đeh ma broq. 14 Khoe ka aih, Kan cachìt xam Hwin, hadai jah caqnìh đac ta bau ùnh. Bau ùnh aih raq kan cachìt yàng ma atìq. 15 Mangai leq ùh jah achìh yiniq ta hset kan rìh, ep hwênh qnìh dìq ta bau ùnh.