1 Ep bahnàng ka ƀài oh daq ep iu ƀài mangai i cwìang, mangai broq gàu, ep tamàng bàu wì aih, yac ka jò leq dua padon rađeh đòeq hu broq trong lem, 2 apaq capoch qmèq ka cabô, apaq tajênh, ùh taqmrua, ep i manoh laq alàng ka rìm ngai,

3 Majah qmang aih, enh nèh bèn hadai blùng, ùh qnì iu, cađac wì qnùt đac rađeh, broq dìc ka bàc trong đeh ma enh, rìh tiaq kan dù, tajì ka wì ma git, yac ka cla bèn hanoh tagit ka dabau. 4 Mahaq pang jò kan laq alàng da Boc Plình, aih dèch Chuaq bèn xam kan loq ha-och da haq, khoe jah paqnoh am ka bèn, aih haq hi dèch bèn, 5 ùh xài tiaq kan taq atoq cla bèn khoe broq, mahaq tiaq deh kan loq waq da haq. Haq dèch bèn ajang kan qnheo hreo rai ha-uang hlài bèn, paneo hlài bèn xi Yiang Hadròeh 6 Haq ma khoe ùc qnoh ka bèn ùh dìq ùh dài, xam Jesus Christ, aih Dèch Chuaq da bèn; 7 đòeq bèn canòm kan tabàih haq đòeq hujah broq mangai taq atoq, wìa kon hatìa hu wiang jah tangèh kan rìh halình mòeq đòe.

8 Bàu kô joq qnàng, au enh kon anoe parìt yiniq kô, đòeq ƀài mangai ma khoe lùi Boc Plình panim ka broq lem. Ƀài yiniq kô dìq lem rai jah lòeq ka rìm ngai. 9 Mahaq ep wia ka hangai kan tarahen blùng ratùt, kan taƀoe nang noe, tarahen trong ranenh, majah qmang aih ƀài yiniq aih dìq lùch lùa ùh i jah cleq. 10 Jò bèn khoe cwò ka mangai ma broq kan talah jah mòeq yàng baiq yàng, khoe ka aih chaq wia ka hangai, 11 bèn loq ƀài mangai qmang aih khoe pi hnhoh jang, broq toq yiniq lui, cla taqmòq ka rađeh kan hadrah.

12 Trùh jò au thê Atêma tàng ùh meh Tichicô lam ta kon, kon haqnan ka tŏc tagùng Nicôbôli ti au, majah qmang aih au khoe ùac ka oe ta aih clech ka ralìm. 13 Drah ti àu padon palauq ka Xêma aih mangai hnài ranenh xam Aƀôlô, apaq đòeq wa aih nan ka dahwèq cleq jò wa aih loh lam. 14 Mangai tiaq trong da bèn ep dìq ka manoh hŏc broq trong lem, đòeq wiang tabàih am ka mangai qnoeq jò wì nan đeh, đòeq wì ùh hìaq rìh mahaq ùh loh plì.

15 Dìq dŏng wì ma oe ti au tanap bàu hmàih trùh kon. Bòch hmàih ƀài mangai ma loq waq ka bèn ta manoh lùi.