1 Pol, Sailas ma Timoti, kem tuul seti e pas gii tif gam na sios ilo bala taon ina Teselonaika ilo bala titinge lo Deo Tamrer ma Taufi, Yesus Kristus.

2 Warfakausi ma balamaris tif gam singe Deo Tamrer ma Taufi, Yesus Kristus.

3 Tanga tualikmem, lo fan mara biing nano kem tuul samusu katfarsi e Deo lo gam. E riis ini kem tuul samusu gorot aregii, anwarow titinge kemi e fafaf lala, ma sinang na fabur e mel ailo balbalmi use tikii neng, tikii neng lo gam e fafaf bakir lala. 4 Ilea, kem tuul ka resngeni e asasmi ilo fan sios ke Deo. Ma kem tuul ka peteng tifri ini are gam ti rawas ilo bala titinge, tura fan mafet ma fan ongker e pupuek talo gam.

5 Fan mok gii ka fespuek lo gam, e fanangsi ini anganggon ke Deo e riis ma lo milmil lo, Deo eu par gam ini gam fasi una kaulek ilo kepmale kia, iya gam ka kepkepe fan mafet ma fan ongker nafow. 6 Ma i eu gow e sinang e riis aregii, i eu ta famila e fan mafet tifre seri a ri ka tow e fan mafet tif gam. 7 Ma ku faropo e fan mafet kemi na seri a gam ka kepe fan mafet ma fan ongker ma kem tuul ming. Mok gii eu fuut lo biing Taufi Yesus eu pu malal tinglo balambat are iif bakir tura fan anggelo rawas kia. 8 I eu tow e kokos bakir tikin tifre tongge ri tibi parfailmi e Deo ma ri tibi usi e konona sunwar ke Yesus Taufi kiar. 9 Tongge gii riu kepe e fimfiil saksak bingne bingne ma fimfiil gii e ta fimfiil una bero sekit iri. Riu melmel i tapak ine Taufi, ma ine anmalalu e singmat na rawas kia. 10 Lo biing gii Deo ka towfu, Taufi eu puek ku sa bero iri, sakle tongge nano ke Deo, tongge a ri ka titinge lo, ri, riu resngeni e asow ma fefeal tikin lo. Ma gau ming gam u resngeni ma fefeal tiim tura ri, anwarow gam sam titinge tikin lo sunwar ke Deo kemem sesngeni falifu i gam.

11 Lo fan sangsang gii, fan mara biing kem tuul nining singe Deo kiar ma gatmo una ules gam. Kem tuul bura ini, i eu fasi una gorot gam, gam ku kalkaliis tikin una melmel ine matan melmel i e sam tau i gam una melmel ini. Kem tuul nining singi una tow e rawas tif gam, usi gam u fasi una gow e mara sinang e kausi gau bur gow ma titinge kemi ku famtet gam una gow. 12 Ma lo sinang gii, kem tuul nining usi ini tongge nano riu fasi una resngeni e asow e Taufi Yesus kiar, anwarow lo gam, le gam usi e fan sangsang kia. Ma riu resnge gam anwarow gam usi e fabur kia. Fan mok gii eu fuut anwarow lo warfakausi ke Deo ma Taufi kiar Yesus Kristus.