1 Lo neng e biing Pita ma Jon ru lala wilo Felun Nining Bakir lo anmatam pisii baba e tuul lo efef, lo pansumbiing una nining. 2 E mel e kaltu e dol, e tibi fesfes tinglo biing e fuut. Ri kepe ri ka la towfu ulo matangkon lo Felun Nining Bakir, ri fotngi ini Konona Matangkon. Bingne ri kepkepe, ri ka la tataufu wa una farfaran mani singre tongge, ri lala wilo pakanmale lo Felun Nining Bakir. 3 Biing e pari e Pita ma Jon ru rong una kau, i ka faran mani singru. 4 Pita ma Jon ru ka man riis usi, ma Pita ka war, “Par usi kama.” 5 I ka man usi ru, e mekelkele ini ruw tow e ti mani tifi.

6 Wimi Pita ka war singi, “Silwa ma gol e tam kiang lo, safle sa ya mel lo, yau tow tifo. Lo asow e Yesus tingna Nasaret, ya peteng tifo, matet o ku fes.” 7 Ma Pita ka puse lo galun limow miil ma ka famtete ka ti. Ma saupesak kekow ma anmatangkenit na kekow ka la raw. 8 Ma kaltu a ka of ka la ti ma ka fes ka la nami ru ulo pakanmale lo Felun Nining Bakir. I e fes ma ka ofofof ma ka resresngeni e Deo. 9 Biing tongge nano ri pari e fesfes ma ka resresngeni e Deo, 10 ri ilmi ini e sam ta imung e kaltu gii ka kiiskiis ma ka farfaran mani ulo Konona Matangkon lo Felun Nining Bakir. Tongge ri pari ma ri ka kuufsak, ma ri ka sangfuunfuun lo mok e fuut lo.

11 Biing kaltu na farfaran e puse patpat lo Pita ma Jon, tongge nano ri kuufsak ma ri ka fafilaunge usi ri, ulo mok ri fotngi ini Galum Fel ke Solomon. 12 Biing Pita e pari aiya, i ka war singri, “Gam na tongge tingna Israel, sa e gow gam ka kuufsak lo mok gii? Usi e tamu gam ka tunmet i kama? Are ini, gam sang ini kama gow e mok gii lo rawas kama, tam kama melmel riis na mata e Deo, iya kama ka gow e kaltu gii ka fes? 13 I e ta Deo ke Abra-am, Aisak ma Jekop, ma e ta Deo kere tamtamrer. I e sau faswenu e kaltu na mus kia Yesus. Gau fafen ini, ini ri ku paketmeteni, ma gam ka guuluung ini na mata e Pailat, biing i e sau bura una falimufu ku la. 14 Gam guuluung ine Kaltu Tarawen tikin ma e Riis Sekit ma gam ka gatom ini Pailat eu falimufu e kaltu na pakpaketmet ire tongge, tif gam. 15 Gau paketmet ine kaltu na famu i kiar wilo ninliu, sakle Deo e famtet famila kosnge minet. Kemeu pari sekit e mok gii. 16 Kem tuul titinge lo asow e Yesus, ma i mung gii ka gow e kaltu gii gam ka pari ma gam ka parfat lo. Ma lo asow e Yesus e famtete e titinge kama. Ma lo titinge gii e gow e kaltu gii ka raw, aregii gam nano gam kabuk pari.

17 “Ma gii tanga tuaklik, ya parfat ini gam tura ge lamlam kemi, gam tibi parfat kausi lo Yesus, iya gam ka gow e ansinang a lo. 18 Sakle i le gii e sal Deo e fasefu e sa e sau peteng ini famu na ngusre fam profet. I e peteng ini Kristus kia e samusu ongker. 19 Gam samusu sangikis ine fan tubiil kemi ma gam ku mil use Deo, usi i eu kepufu e fan tubiil kemi, ma i ku tow e rawas fuu tif gam. 20 Ma i kamu tuleni e Kristus, i e sam sikii una ules gam - i gii Yesus tibom. 21 Eu buk melmel ilo balambat, ku muut lo biing Deo eu terngeni mil e mara mok, aregii kabuk peteng fate ini ulo ngusre fam profet riis kia. 22 Moses e war aregii, ‘Deo Taufi kemi, eu feti e profet kemi eu ngo are yau, tingau na balre tongge kemi tibom. Gam samusu ong singi lo mara mok eu peteng ini tif gam. 23 Le tikas ku tibi ong singi, Deo eu tii ini sekit tingna balre tongge kia.’

24 “Ma fam profet nano tofnge tinglo Samuel ka la muut gii, ri sau peteng famu ine fan mok gii ka fuutfuut geinggii. 25 Gam na fan siksikuare fam profet, gam u kepe e fan mok Deo e sam limlim ini, ini i eu tow tif gam, lo biing e gow e a-uu tura re fan tuptupmi ma ka war aregii singe Abra-am, ‘Lo fan siksikuam mung gii, tongge nano tinglo nal riu kepe e warfakausi.’ 26 Biing Deo e wele kaltu na mus kia, i e tuleni famu usi gam, ku warfakausi gam, ma Deo ku ikis gam kosngi e fan sinang saksak kemi.”