1 Ulo bala fam biing a, wewes lo re fan disaipel e fespuek fuunfuun. E mel e borom balasak ulo falifu lo re fan Juda. Fa gii ri kinen Grik, ri balasak ire fa tuman gii, ri ka kinen Ibru, anwarow fan makos keri, fan Ibru ri tibi fenfen ri lo fan tuan ri kepkepe lo tikii neng, tikii neng e biing. 2 Iya sangful ma e u na apostel ri ka tau tiim ire fan disaipel nano ma ri ka peteng tifri aregii, “Eu tibi riis sing kemem, le kemem ku touf sok lo faim una sesngeni e sunwar ke Deo ma kemem ku su sangsang use faim una faseni e fan tuan ma mani. 3 Ma gii tanga tuaklik, gam u towfu e baba fis na ti kaltu tinglo falifu lo gam, iya gam ka parfat lo ri ini ri fuunuf ine Tangwa Riis ma atausimale. Kemem ku touf ri usi riu efe lo mus gii. 4 Ma kemem tibom kemem u tow e sinangumem kiruur ilo nining, ma faim una sesngeni e sunwar ke Deo.”

5 Tongge nano a ri fefeal lo fagati kere fan apostel ma ri ka sikii e Stiwen kaltu titinge kia e raw ma e fuunuf ine Tangwa Riis, ma Filip, Prokorus, Nikanor, Timon, Parmenas ma Nikolaus tingna Antiok. E tibi ta i tingna Juda sakle e kau ulo lotu keri. 6 Ri ta ri ka la tifre fan apostel, ri ka nining ma ri ka tow e limlimri ulo ri.

7 Ma sunwar ke Deo ka omseni e male kiruur, ma tongge fuunfuun ri ka puek ka ta fan disaipel una Jerusalem. Fam pris fuunfuun ming, ri usi e sunwar ke Deo ma ri ka titinge.

8 Kaltu gii Stiwen e fuunuf ine warfakausi ma rawas ke Deo. E bilseni e fan mok na tibou fuut ma fan tintof bakir tikin ulo falifu lo re tongge. 9 Sakle e mel e galu lo re tongge ri matet ma ri ka fapaket ine fan warwar tura Stiwen. E ta ri na tongge tinglo Felun Nining kere fam Fridman*6:9 Tongge gii e ta fan Juda na faim fofoes famu, safle gii ri sam toufri ri ka faliufori. (Ri sau peteng ini.) Tongge a e ta fan Juda tinglo taon Sairini ma Aleksendria, ma tongge tinglo um prowins Silisia ma Eisia. Tongge gii ri fatinge tura Stiwen. 10 Sakle ri tibi fasi una kulfi e Stiwen lo warwar kia, le Tangwa Riis e tow e konona parfat tifi una gon singri.

11 Ri war borong ta nabalre fa lo re tongge ini riu peteng aregii, “Kemem ongni e Stiwen e gon ine fan warwar una fotpursi e Moses ma Deo.”

12 Ma lo sangsang a, ri bero ine balbalre tongge. Tongge lamlam ma fan titsa lo fafanau, ri ka bingfamti e Stiwen ma ri ka onu ka la ti u famu ire fang Kaonsiil. 13 Ri ka feti e fa lo re tongge una seseng gurgurum talo. Tongge a ri seseng aregii, “Kaltu gii, e sagisu warwar una bero ine Felun Nining Bakir ma fafanau ke Moses. 14 Kemem sam ongni e peteng aregii, kaltu gii Yesus tingna Nasaret eu bero ine Felun Nining Bakir, ma ku pilsi e ninis Moses e tow tif kiar.”

15 Tongge nano ri kiiskiis ulo felung Kaonsiil, ri alal rawas lo Stiwen ma ri ka pari e mata e ngo are mata e ton anggelo.