Ibru
1
Yesus e ta iyat ire fan anggelo
1 Nangen, Deo e warwar singre tumtumlarer, tikin lo ngusre fam profet, lo fam biing fuunfuun ma lo mara galgalun sal, 2 safle lo biing gii, ka fatfatat lo biing muut, Deo e sam warwar sing kiar, tikin lo ngusu e Sikow, se i e sam siikii una ta tamow e mara mok. Ma tikin lo i, Deo e lamlames makrau ine nal kiruur. 3 Sikow e ta fafanas lo finaswen ke Deo ma i e ngo sekit are Deo tibom. I e farawasngeni e mara mok ine rawas lo sunwar kia. Wimi ini i e sau fakalkaliisngeni e fan tubiil kere tongge, i e la kiis ilo galu miil lo Deo Tamow, se e ta ilo balambat ma mu-i e mel sekit. 4 Iya, i ka ta iyat sekit ire fan anggelo, e su ngo ming are as gii Deo ka tow tifi, e bakir iyat ine asas re fan anggelo.
5 Anwarow Deo e tifik war sekit singe ti anggelo aregii,
“O na Sikuang,
geinggii, ya sam ta ya na Tamam.”
Tam ini ku war aregii,
“Yau ta Tamow,
geinggii, i eu ta Sikuang.”
6 Ma ming, biing Deo e tuleni e tikii Sikow, se e bakir iyat ine mara mok ka sa la wagii lo nal, i e war aregii,
“Tafu e fan mara anggelo ke Deo, ri ku por na nawen singi.”
7 Usi re fan anggelo, i e war aregii,
“I e gorot re fan anggelo kia ka ngo are angkif,
ma tongge na mus kia are karkarfian iif.”
8 Safle tife Sikow, i e war aregii,
“Sia king kiam, o Deo, eu ngongo bingne, bingne.
Ma o ku efe lo re tongge kiam ine sinang riis.
9 O sau bura e sinang e riis ma o ka guuluung ine sinang e sak,
iya, tikin lo sinang una wel lo o ine wel na gasgas,
Deo, se e ta Deo kiam, e sam touf o iyat ire fan taltalum.”
10 Deo e war ming singe Sikow aregii,
“O Taufi, tinglo tofnge, o tafngeufu e warow e nal,
ma batsok e ta fan mus na limam.
11 Nal ma batsok ruw tam iru, safle o, ou melmel bingne;
ruw maruut are tong kolos.
12 Ou pis ru are kolos tapak,
ma o ku pilpiliisuf iru are kolos ri piliisufu.
Safle o, o sam ngongo aiya,
ma fan matamfaim kiam eu tek ti muut lo.”
13 Deo e tifik su war sekit singe ti anggelo aregii,
“Kiis ilo galu miil lo yau,
ku muut yau gau re tongge na matamfais kiam ri ku ta ilo pikliu e rawas kiam.”
14 Iya, fan anggelo ri su ta tongge na mus. Ri ta fan tangwa Deo e tule ri una efe lo re tongge a ri ku kepe ninliu bingne.