Luk
1
1 Fuunfuun lo re tongge ri sam tofo una siit famteni e fan mok gii Deo kabuk fafuutngeni ilo falifu i kiar. 2 Ri usi e fan sinseng kere fa gii ri kabuk melmel are tongge na faim ke sunwar, ri seseng tif kemem ini. Tongge a ri sau pari e fan mok a ine matmat ri riis, tofnge tinglo biing fan mok a e fuut. 3 Iya, biing yau tibom ya sau parfakausi e fan mara mok gii tinglo tofnge, e su kausi sing yau una seti e konona ti sinseng tifo, kaltu bakir Tiofilus, 4 usi ini o ku bou parfat lo ini konona fan mok gii ri kabuk fabenge sing o ini, e tikin.
Warfot lo fuut ke Jon kaltu na gugu tarawen
5 Lo biing Erot e ta King tingna Judia, e mel e neng e pris asow gii Jekaraiya. I e ta neng lo re fam pris tinglo funmat a Abiya. Ke wok, asow gii Elisabet. I ming e ta tinglo bala matambia a Aron. 6 Ru nano ru melmel riis na mata e Deo. Ru ususi fakausi e fam fafanau ma fam fabenge ke Taufi ma e tek ti tubiil keru na mata e Deo. 7 Safle e tek ti sikua ru, anwarow Elisabet e pom ma iru nano ru kabuk matuk.
8 Nenge pansumbiing, e ta biing ke Jekaraiya tura fan taltalu una faim ulo Felun Nining Bakir ma i ka fafaim are pris na mata e Deo. 9 Ma ususi e ninis kere fam pris, iri pilai satu ri ka siikii e Jekaraiya una la ilo bala Felun Nining Bakir ke Taufi, una la tunu e insen. 10 Ma biing anmatam pisii una tunu e insens e puek, tongge nano a ri ka tiim lo ri una male, ri ninining.
11 Ma anggelo ke Taufi ka puek talo, ka sa ti ulo galu miil lo altar na insen. 12 Biing Jekaraiya e pari, i e ginwalwal e fow ma ka soke. 13 Safle anggelo e war singi, “Mangena soke, Jekaraiya, Deo e sam ongni e nining kiam. Kem wok Elisabet eu fasus ine kem ti boron tamat, ma o ku fotngi ini Jon. 14 Ou fefeal tikin lo bo-i a ma tongge fuunfuun ri ku fefeal ming anwarow i e fuut, 15 le i eu bakir na mata e Taufi. I eu tibi fasi una in waen, tam tikas ti dan rawas ming, ma tofnge tinglo biing i e ta ilo bala e tinow, i e sau fuunuf ine Tangwa Riis. 16 Fuunfuun lo re tongge tingna Israel, i eu ikis familri use Taufi Deo keri. 17 Ma i eu la famu ine Taufi, lo tangwa ma rawas are Elaija, una tafu e balamaris falifu ire fan tamtamabo-i ma siksikwa ri ma i ku ikis familre tongge ri fasange singe sinang riis use atausimale lo sal e riis, usi ini eu gau re tongge ri ku fagati ri are tongge ri fagati ri nene-i e Taufi.”
18 Jekaraiya ka gatmo e anggelo, “Are ini gii ya ku parfat ini mok gii eu puek tikin? Ya sau matuk ma kek wok ming e sau matuk.”
19 Anggelo ka koso, “Yau Gebriel. Ya sagisu melmel bingne inaisa e Deo, ma i e sam tule yau una peteng tifo ine konona sunwar gii. 20 Ma gii, anwarow o tibi titinge lo kek sunwar, a kamu puek tikin lo biing riis lo, ngusum eu kut ma o ku tibi fasi una gon ku muut lo biing mok gii eu fuut.”
21 Sumbiing a, tongge ri nene i uwa e Jekaraiya ma ri ka sangfuunfuun usi, ini e tamu i ka la melmel tapak tikin ilo bala Felun Nining Bakir. 22 Biing i e suu mil, i e tibi fasi una gon sing ri. I e su gowgow e fan tintof tifri, iya ri kau parfat ini i e pari e mok e ngo are numbiil ulo bala Felun Nining Bakir. Safle uwa, i e tifik fasi una war.
23 Biing, sumbiing kia una faim e sam rop, Jekaraiya e la mil ulo male. 24 Wimi ini, ke wok Elisabet ka tian ma lo e lim e funiil, i e su melmel borong. 25 Ma i ka war aregii, “Taufi e bilseni e mok gii lo yau. Lo fam biing gii, i e fanangsi e fatengis kia lo yau ma kabuk tii ine an maiyai tinglo yau falifu ire tongge.”
Warfot lo fuut ke Yesus
26 Lo funiil baba e on ke Elisabet, Deo e tuleni e anggelo Gebriel wina Nasaret, neng e taon ina Galili, 27 usi e neng e makos e mapek asow gii Maria. Ri sau fagati ini i eu tili e neng lo re fesa e Dewit, ri fotngi ini Josef. 28 Anggelo e la usi ma ka la war singi, “Siaro sing o, Deo e ta tura o ma i e sam warfakausi o.”
29 Maria e ongni e sunwar a ka la kuufsak ma ka la sangfuunfuun ini, aregii, e ta sese mok sekit. 30 Safle anggelo e war singi, “Ou tibi soke Maria, Deo e gasgas tikin lo o. 31 Ou tian ma o ku fasus ine ti boron tamat. Ma o ku fotngi e asow ini Yesus. 32 Asow eu bakir tikin ma ri ku fotngi ini Sikow e Deo Aiyat Sekit. Deo Taufi eu tafu ku kiis lo sia king ke an tumlow Dewit. 33 Ma i ku ta king bingne kere fesa e Jekop. Ma faim king kia eu tibi fasi una rop.”
34 Maria ka gatmo e anggelo, “Are legii mok gii eu fuut ma ka ta ya na makos mapek?”
35 Anggelo ka koso, “Tangwa Riis ke Deo Aiyat sekit eu pu talo o ma rawas kia ku afit o. Iya, kaltu tarawen a ku fuut a, riu fotngi ini Sikow e Deo. 36 Wok lo o ming Elisabet, e sau matuk leii, safle e sam tian. Ma i, se lewa ri ka peteng ini e pom, e sam on e amfuniil kia. 37 Anwarow e tek ti mok eng kala sing e Deo.”
38 Maria ka war singi, “Ya na fefin na mus ke Deo. Tafu ku fuut lo yau aregii o ka peteng.” Kala anggelo ka la kosngi.
Maria e la fu lo Elisabet
39 Lo sumbiing a Maria e matet ka la saupe tikin ulo neng e taon ilo pakpaklun male ilo prowins ina Judia. 40 Uwa i e la kaulek ulo fel ke Jekaraiya ma ka la areni e Elisabet. 41 Biing Elisabet e ongni e are ke Maria, bo-i ulo bala e boles ma Elisabet ka la fuunuf ine Tangwa Riis. 42 Ma i ka kaung bakir ma ka war, “Deo e warfakausi o iyat ire gelefin nano ma bo-i ming a o ku fasus ini, i e sam kepe ming e warfakausi ke Deo. 43 E ta yau se sekit legii, gii tinow e Taufi kiang ka sa la usi yau? 44 Sumbiing sekit ya ongni e are kiam, bo-i ilo balang e boles tura fefeal. 45 Deo eu warfakausi o le o sam titinge ini sa Taufi e peteng ini tifo, eu fuut aregii i ka peteng.”
Seksek a Maria
46 Ma Maria ka war,
“Balang e resngeni e Taufi
47 ma tangwang ka fefeal lo Deo, anwaramfaliunge kiang,
48 Le i e sam tengis yau
ma ka su ta ya na fefin na faim kia. Ya na mok fofoes.
Geinggii ma wimi ming tongge riu peteng ini Deo e sam tow e singmat na fefeal tif yau,
49 anwarow Deo se e rawas tikin e sau bilseni e fan mok lamlam tikin lo yau,
ma asow e tarawen.
50 Fatengis kia eu ta ilo seri a ri ka soksokeni,
tinglo neng e inlen ku la lo ilo neng e inlen.
51 I e sau bilseni e fam faim rawas tikin ine limow.
I e sau fesel falek ire tongge ri akteni e asasri tibom ilo sinsinangu ri.
52 I e sau feselufu e fang king rawas tinglo fan sia king keri
ma ka akte re fa ri fapori.
53 I e sau fenre tongge ri fitol ine konona fan mok
ma ka tule re tongge ri mel e tuba ri, ri ka la fofoes.
54 I e sam ulsi e kaltu na mus kia Israel,
are lewa ka warfot tifri una tengis ri
55 tife Abra-am ma fan tubtubungkak kia bingne,
ma are lewa ka war ming singre tumtumla rer.”
56 Maria e melmel tura Elisabet lo are e tuul e funiil ma kam la mil wilo male kia.
Fuut ke Jon kaltu na gugu tarawen
57 Biing e sam ti lo pansumbiing ke Elisabet una kepe ke bo-i, i e fasus ine boron tamat. 58 Tongge fatatu ma tongge lo, ri ong ini Taufi e sau fanangsi ine singmat na warfakausi, ma ri ka sa gasgas tiim tura.
59 Lo biing baba e wal tongge ri ka puek una sa talsi e pinumfow e bo-i a, ma ini ri ku fotngi ine asow e tamow, Jekaraiya. 60 Safle tinow e peteng aregii, “E tam! Riu fotngi ini Jon.”
61 Ri ka peteng tifi, “E tek tikas falifu ire tongge lo gam ek mel e as a.”
62 Kala ri ka gow e fan tintof tife tamow, una sikseni ini sese as i e bura ini eu fotngi ine bo-i. 63 Jekaraiya ka gatom use ti mok una siisiit, ma tongge nano ri kala sangfuunfuun singi e siisiit aregii, “Asow gii Jon.” 64 Saupesak ngusu ka ipiik ma angkermow ka pipik ma ka tofnge una war, ka katfarsi e asow e Deo. 65 Tongge fatatu ri nano ri tiin la soke ma tongge ulo male kiruur ilo pakpaklun male ilo prowins ina Judia ri tiin fafagon use fan mok gii. 66 Tongge nano seri, ri ong lo mok gii ri sangfuunfuun ma ri ka gatom, “Bo-i gii ku puek ku ta sese ti kaltu gii wimi?” Le ri parfat ini rawas ke Taufi e ta tura.
Seksek a Jekaraiya
67 Jekaraiya tamow e bo-i a, e fuunuf ine Tangwa Riis, ma ka war ine fan warwar profet:
68 “Katfariis tife Taufi, Deo kere fan Israel,
anwarow i e sau puek ma ka bung kep familre tongge kia.
69 I e sau fafuutngeni e neng e kaltu rawas una faliunge kiar,
ilo bala funmat a kaltu na mus kia, Dewit,
70 are lewa i kabuk peteng ini nangen tikin ulo ngus re fam profet tarawen kia.
71 Kaltu una faliunge kiar kosing re tongge na matamfais kiar
ma kosing re tongge ri is kiar,
72 una fanangsi e fatengis kia tifre tumtumlarer,
ma una sangfi e war a-uu tarawen kia.
73 I e limlim ulo poktow e an tumlarer Abra-am ini:
74 i eu faliunge kiar kosing re tongge na matamfais kiar
ma ku ules kiar una musngeni e faim kia ma kiar ku tibi soke.
75 Kiar u musngeni e faim kia tura sinang e kalkaliis ma e riis, i famu ini,
lo bala fam biing kiar melmel iwa.
76 Ma o, sikuang, riu foteng o ini profet ke Deo Iyat Sekit;
le ou la famu ine Taufi una fariisu e sal kia,
77 ma una pete parfat ire tongge kia ini Deo eu faliungeri,
biing i e sam sangintafngi e fan tubiil keri,
78 anwarow Deo kiar e mel e singmat na fatengis ma fabur kia,
ma ilo bala fabur kia anten ting aiyat eu pu usi kiar,
79 una sosok talo seri a, ri ka ta ilo bala anor
ma ilo bala an maluuf lo minet,
una famu ine kekekrer wilo bala sinang na balamaris.”
80 Ma bo-i a ka faf bakir ma tangow ka puek rawas ma i ka melmel ulo bala male e tek ti kaltu kala muut lo biing i e puek malal na matre fan Israel.