1 Lo neng e Sabat, biing Yesus e la una la en ulo fel ke neng e paklure fam Farasi, tongge fuunfuun ri efe kausi ini i e gow e sa. 2 Wa, u famu ini, e mel e neng e kaltu e ing falek e tom fow. 3 Yesus ka gatom re fam Farasi ma tongge parfat lo fafanau, “E riis lo fafanau ini riu faliungere tongge lo Biing Sabat, tam e tam?” 4 Sakle e tek tikas lo ri ek gon. Iya i ka puse lo kaltu a, ka faliungeni ma ka tuleni ka la.

5 Kala i ka gatom ri, “Le tikas lo gam ku mel e ti sikow, tam ti buuluumakau kia eu luut ilo bala ampolo lo Biing Sabat, i eu tibi saupesak una tatfe kanek ini tinglo bala ampolo a?” 6 Safle ri tibi koso.

7 Biing i e pari ini tongge ri puek ulo en a, ri su bur la kiis ulo fan sia u famu sekit, i sesngeni e sunwar toftof gii tifri, 8 “Le tikas ku fauun usi o una la ilo ti en bakir na tinaule, mangena la kepe e ti sia i famu sekit, are kuuf ma ka mel e tikas aiwa ri sau fauun usi, asow e bakir iyat iyo. 9 Le ku ngo aiya, kaltu bakir se gii ka fauun usi kamu nano eu puek ma ku sa war aregii sing o, ‘Tow e sia kiam tife kaltu gii.’ Wimi o ku maiyai saksak sekit ma o ku la kepe e ti sia imi sekit. 10 Sakle biing riu fauun usi o, ou la kepe e ti sia kere tongge fofoes, usi biing kaltu bakir tinglo en a eu puek, eu sa war sing o, ‘Fenngong, sa kiis lo sia gii famu.’ Le ku ngo aiya, tongge a ri ka sa la gam ka tiim lo en na tinaule a, riu resnge o. 11 Anwarow se a ka bom resngeni, riu faporo. Ma se a ka bou faporo, riu resngeni.”

12 Kala Yesus ka war singe kaltu a ka fauun usi wilo en aregii, “Biing o fagati e ti sun tuan tinglo siat, tam tinglo efef, mele fauun usi re tanga fenfenngom, tam tanga tuamlik, tam tongge lo o, tam tongge tuba mel i fatat o. Le o ku gorot aiya, kuuf ma ri ka subuk fauun usi o, ma ri ku kos famila e fan sa o sam gow lo ri. 13 Sakle biing ou gow e ti en bakir, fauun usi re fan sasngal, tongge fan susu lo fofori e sak, tongge kekek ri e dol, ma tongge ri baf, 14 ma o ku kepe e warfakausi. E tikin ri tibi fasi una koso sing o, sakle ou kepe fimfiil lo, lo biing una matet mil singre tongge riis.”

15 Biing neng lo re tongge ri kiis tura Yesus ulo teibel e ongni e sunwar gii, i e war singi aregii, “Warfakausi eu ta ilo se gii i ku en lo en bakir ilo bala kepmale ke Deo.”

16 Yesus ka koso, “Neng e kaltu e fagati e en bakir ma ka fauun use re tongge fuunfuun una sala. 17 Lo biing bengu e en bakir a eu puek, i eu tuleni e kaltu na mus kia una la peteng tifre tongge i e sau fauun usi ri aregii, ‘Gam kasa, mara mok ri sau fagatiufu.’

18 “Sakle tongge nano a ri tiin fakale lo ri tibom. Neng baba tikii e war aregii, ‘Ya am su fiilufu e neng e palang ma ya samusu la una la pari. Kiskam, tauf yau. Ya tibi fasi una la.’

19 “Neng ka war, ‘Ya am su fiilufu e sangful na buuluumakau una faim ma ya ta ilo sal una la tof ri. Kiskam, tauf yau. Ya tibi fasi una la.’

20 “Ma neng ming ka su war, ‘Ya am su tinaule, iya ya ka tibi fasi una la.’

21 “Iya kaltu na mus kia ka la mil ka la peteng tife kaltu bakir kia ine fan warwar keri. Biing kaltu ine ke fel e ong aiya, i e balasak tikin ma ka war aregii singe kaltu na mus kia, ‘La saupesak ilo fan mara sal bakir ma fan mara sal balik ilo taon, o ku la uunre fan sasngal, tongge fan susu lo fofori e sak, fa ri baf ma fa kekek ri e dol, ri ku sala.’

22 “Kaltu na mus kia ka war, ‘Kaltu bakir, sa o tungen yau una gow, ya sam gow, sakle e mel e sol iwa.’

23 “Kala kaltu bakir a ka peteng tife kaltu na mus kia aregii, ‘Suu kosnge taon o ku la ilo fan sal bakir ma fan sal balik o ku la war rawas singri, ri ku sa la usi ini fel kiang eu fuun. 24 Ya peteng tif gam, e tek tikas sekit lo re tongge lewa ya kabuk fauun usi ri, eu tofo e ti boron su lo fan tuan tinglo en kiang.’ ”

25 Tongge fuunfuun ri mimi lala nami e Yesus ma i ka didiu mil usi ri ma ka war, 26 “Le tikii tikas ku sa la usi yau ma ku tibi isa e tamow ma tinow, ke wok ma siksikow, tanga tualik ma tanga fefnelik - yow, ma ming ninliu kia tibou ming - i e tibi fasi una ta disaipel kiang. 27 Ma se gii ka tibi kepe e aupaket kia ma ku usi yau, i e tibi fasi una ta disaipel kiang.

28 “Ma le tikas lo gam ku bur feti e ti fel e kiis iyat na efefe, e tamu, i e tibi fasi una kiis famu ma ku bi sang ususi ini eu fis sekit e mani una ropo e fel kia? 29 Anwarow le i ku gow e warow e fel a ma ku tibi fasi una faropo, tongge nano seri gii ri ku pari e fel kia, riu tasa. 30 Ri ku war aregii, ‘Kaltu a e tofngeufu e fel gii ma ka tibi fasi una ropo.’

31 “Tam, le ti king ka bala la fapaket singe neng, neng e king, i eu kiis ma ku bi sang kausi famu, ini i e fasi una la tura tikii sangful na mar na soldia kia una la fapaket singe neng e king a ku puek tura e u e sangful na mar na soldia kia, tam e tam? 32 Le i ku tibi fasi, i eu tuleni e ti galung kaltu una la tof gatmo e king a, usi eu tow e ti sunwar na balamaris biing i e ta iwa i tapak. 33 Lo e su tikii sal, se lo gam a ka tibi tii kosnge mara mok kia, i e tibi fasi una ta disaipel kiang.

34 “Semek e kausi, safle le ku rop e tiif lo, are riu gow ku semek mil? 35 E tibi fasi una ulsi e fan tuan ilo palang una faf, tam ini riu iksi tura tektekre fam buuluumakau una tow lo fan tuan ilo palang. Riu su bas ini.

“Se a ka mel e ambalbalu, tafu ku ong.”