4
Satan e lamu e Yesus
1 Ma lo biing a, Tangwa Riis ka onu e Yesus ka la ulo male e tek ti kaltu ini Satan ku lamu. 2 I e fel lo e fet e sangful na pam panambiing ma pan siat wimi ini i ka biis. 3 Kaltu na fafalam ka puek usi ka sa war, “Le o ku ta sikow e Deo, peteng tifre fam fatfat gii ku ikis ku ta beret.”
4 Yesus ka koso singi, “Sunwar ke Deo e peteng aregii, ‘Kaltu e tibi liu lo tuan tibom, safle lo fan mara warwar e puek tinglo ngusu e Deo.’ ”
5 Kala Satan ka onu ka la ulo siti tarawen ina Jerusalem ka la fetiufu ulo su e ngo uiyat sekit lo Felun Nining Bakir, 6 ma ka war singi, “Le o ku ta ini o na Sikow e Deo, ofpu ting wagii, anwarow sunwar ke Deo e peteng aregii:
‘Deo eu tulere fan anggelo kia una ules o,
ma ri ku sange o ine limlim ri,
usi ini eu tek ti fat eu ti lo kekem.’ ”
7 Yesus ka koso singi, “Sunwar ke Deo e peteng ming aregii, ‘Ou tibi tofo e Taufi Deo kiam.’ ”
8 Kala Satan ka onu ka la ulo paklunmale e kiis iyat sak, ma ka fanangsi ine mara kepmale ma finaswen kia e nal. 9 Ma ka war, “Mara kepmale ma finaswen yau tow tifo, le o ku por ma nawen ma nining lo yau.”
10 Yesus ka war singi, “Tii fasap yau, Satan! Anwarow sunwar ke Deo e peteng aregii: ‘Nining lo Taufi Deo kiam, ma faim singi tibom.’ ”
11 Kala Satan ka la kosngi. Ma fan anggelo ri ka puek ri ka sa ulsi.
Yesus e tofnge una sesngeni e sunwar
12 Biing Yesus e ong ini ri sam taufu e Jon ulo rerek, i ka la una Galili. 13 I e matet tingna Nasaret, ka la melmel una Kapernaum fatatu e Salat Galili*4:13 Salat Galili e ta dan mair, safle e palpaluk e muut lo 8 kilomita ma tapak lo e muut lo 22 kilomita., ilo irin nal kere fan Sebulon ma Naptali. 14 Usi eu fawetu, e sa, profet Aisaiya e sau peteng ini:
15 “Nal kere fan Sebulon ma Natali,
e fatatu e salat Galili, ma nal ilo galu lo dan Jodan,
ina Galili, fuunfuun lo re fan ses ri melmel ilo distrik a.
16 Tongge a, iri ka melmel bala anor,
iri sau pare anten.
Tongge ri melmel bala anor na minet,
anten e sau puek sing ri.”
17 Tonfnge tinglo biing a, Yesus e sesngeni e sunwar, “Iksi e balbalmi, anwarow kepmale tinglo balambat e sau fatat.”
Yesus e tau ini e fan disaipel baba tikii kia
18 Lo biing Yesus e fesfes lala ulo pisow e salat Galili, i ka pari e latualik Saimon gii ri ka fotngi ini Pita, ma tualik Enru ru basbas ine ubiin ulo balan salat, le ru ta ung kaltu na tuntunii. 19 Yesus ka war singru, “Kamun mi nami yau, ma ya ku fatiti kamu una tuuktuuk ire tongge.” 20 Saupesak, ru ka tafu e fan ubiin keru ma ru ka mi nami e Yesus.
21 Ri ka la ting wa, ma i ka pari e uneng e latualik, Jeims sikow e Sebedi tura tualik Jon ru ulo bala mon tura tamru Sebedi ru terterngeni e fan ubiin keru, i ka tau iru. 22 Saupesak, ru ka la kosnge buut ma tamru, ma ru ka la nami.
Yesus e faliungere tongge ri mase
23 I ka fes fawet una Galili ka fabenge ulo bala e fan felun nining keri ma i ka sesngeni e konona sunwar lo kepmale ma ka faliungere tongge ri mel lo fan mara matmatan minse nano. 24 Sinseng lo Yesus e omsene male kiruur ina Siria, ma tongge ri ka uunpuek ire tongge nano ri mel lo fan matan minse, fa ri kepe singmat na ongker, fa fan tara ri sispi ri, ma fa ri mel lo anminse a, riu luut ri ku la banban saksak, ma fa, fang galgalu lo ri e met. Ma Yesus ka faliungeri. 25 Singmat na galung kaltu tingna Galili ma tingna Dekapolis, Jerusalem ma tingna Judia ma tinglo galu lo Jodan ri ka mi nami.
*4:13 4:13 Salat Galili e ta dan mair, safle e palpaluk e muut lo 8 kilomita ma tapak lo e muut lo 22 kilomita.