YAMARAM CHICHAM MARCOS AARMAU
1
Juan imakratin aya nugkanmag wekaas jintinkartuamu
(Mt 3.1-12; Lc 3.1-17; Jn 1.19-28)
Jesucristo Yuusa uchiriya nuna chichame pegkera nuka junii nagkamnawaiti. Yuusa chichamen etserin Isaías tu aaruiti:
“Wina chichamrun etsernun emtikan,
ni jintan umirtamkati tusan akupeajai”.
Shuar emak taa aya nugkanmag wekaas senchi chichaak:
“Apu jintiya nu tutupin atii tusarum shir umiktarma, japau akaisha nugka yaruakrum aimratarma”.* Isaías timauwa nuka Juankan pachis eke akiintsaig chikichik shuar aya nugkanmag wekas senchi chichaak: Ashi shuar ainaka tunau takat aina nuna inaiyainak uwemtikartina nuna juinak pujutin yapajiawarti taku tinaiti.
Nu tusa timau asamtai, Juanka aya nugkanmag entsa Jordánnum shuarnaka ima imakua taawaiti. Shuar ainan Juan chicharuk: Atum tunau takasmauncha Yuus tsagkurtamrarti, tunau takat inaiyakrum enentaim yapajiatarma, tumarum maitarma tusa tinaiti. Nuna antukar Judea nugkanmaya ainaka, yaakat Jerusalénnumia ainasha ashi kaunkaruiti. Tuma kaunkar nita tunau takatairi ainan etsertumakarmatai, entsa Jordánnum Juan imakaruiti. Juanka camello ure najanamun nugkujakuiti, akachumtairisha nuap najanamu ajakuiti, manchin yu jakuiti, tura napa yumirincha umin ajakuiti. Shuar ainan chicharuk: “Wina ukuruin wina nagkatasu winittawai. Wika niya imanchau asan, nuna zapatorinka atitmaitsujai. Wika ayatik entsajai imajrume, turasha nigka Wakan Pegkeran suramsattarme”, tusa tinaiti.
Juan Jesúsan imaimu
(Mt 3.13-17; Lc 3.21-22)
Chikich tsawantai Jesús yaakat Nazaret Galilea nugkanmaya jiinki Juan pujamunam wuwaiti. Tuma jeamtai Juan entsa Jordánnum imain. 10 Tura imaim entsanmaya jiinkama, nayaim uranmatai pauma numamtinan ninii taarun Wakan Pegkeran wainkauwaiti. 11 Nu tumaig Yuus nayaimpinam pujusag chichaak: “Ametme wina uchir anetaimka, nui amini shir aneajai” tusa tamau antukauwaiti.
Iwanch Jesúsan tsanurtasa nekapsamu
(Mt 4.1-11; Lc 4.1-13)
12 Nuna timatai Wakan Pegker egkemtur wári juki aya nugkanmag shuarsha atsamunam umauwaiti. 13 Nui Jesús cuarenta tsawantai uun yawa kajen aina matsatmaunam pujaun, iwanch Satanás tsanur tunaun takaamtiksattsa nekapsau. Turamtai nayaimpinmaya shuar aina kuitamawartasa taruawaruiti.
Jesús Galileanam ni takatrin nagkamamu
(Mt 4.12-17; Lc 4.14-15)
14 Juankan achikar cárcelnum egkeawaru ai, Jesús chichaman pegkeran Yuusan pachis etserkattsa Galileanam wuwaiti. 15 Tuma chicharkartak: “Yuus timauwa nuka tsawan jeayi, tura Yuus shuarnum inamratnuka tsawan ashi jeawai. Tuma asamtai pujutrum yapajiarum, chicham uwemtikartina nu nekaspapita titarma”, tusa tinaiti.
Jesús ni unuinatairi atin ainan wainkamu
(Mt 4.18-22; Lc 5.1-11)
16 Jesús Galileanam kucha tsukintrin wekajkama, Simónkan ni yachi Andrésjai, namakramin asar, kuchanam redtan nagkimainak yujattamaun wainkau. 17 Tuma chicharuk:
“Yamai nagkamsarmeka namakramat inaiyakrum wina nemartuktarma, tumarum Yuusa chichame shuar aina ujau ataarma”, tusa tinaiti.
18 Tusa tamauwaik nita redtrin ajapa ikuinak nijai wearuiti. 19 Jesús nitajai iruunar ishichik wesag Zebedeo uchirin, Jacobon ni yachi Juanjai, boterin chumpimsar redtrin apainak chumpimtatmaun wainkau. 20 Tura nunasha chicharuk:
“Wina nemartuktarma”, tusa tama, nita apari Zebedeonka nitajai takau ainan botenam ajapa ikuinak Jesúsjai wearuiti.
Shuaran iwanch egkemtuamu
(Lc 4.31-37)
21 Tumawar yaakat Capernaúmnum jeawaruiti. Nui jeawar ayamtai tsawan tsawarmatai, iruuntai jeanam wayaa Jesús jintinkartutan nagkamawaiti. 22 Tura chicham umiktinan jintinkartin ainan nagkas, Yuusa senchirijai jintinkartau asamtai, shuar ainaka nuna antukar enentai jearcharuiti. 23 Nui iruuntai jeanam iwanch egkemtuamu shuar eketu asa senchi chichaak:
24 “¡Jesús Nazaretnumiaya! ¿Urukamtai amesha ii pujamunmasha winame? ¿Ameka ina jiikratkittsamek winam? Inaikartusta. Wika nekajme, ameka Yuusnumia winau asam, nekas Pegkeraitme”, tusa tinaiti. 25 Tusa tama iwanchin ayak:
“Takamtak jiinkim weakum nu shuar ikukta”, tusa tinaiti. 26 Tusa tamauwaik nitasha ashi wainainaig, shuaran nugkanam ajiaruiti. Turasha ishichkisha najaimamtiktsuk jiinki weak ikuknaiti. 27 Tumamtai ashi wainkar senchi ashamkar enentai jearcharu. Tumawar nitak chichainak:
“¿Chichamesha uruku asamtaiya iwancha anturainawa? ¡Apu chichamaina imatak chichakaimpa iwancha umirainawa!” tusa tuina.
28 Nu turamun wainkar, shuar ainaka ashi Galileanam Jesús turayi tusar etseraruiti.
Jesús Simón Pedro tsatsari jan pegker amajtusmau
(Mt 8.14-15; Lc 4.38-39)
29 Tura iruuntai jeanmaya Jesús, Santiago Juanjai jiinkiar, Simón Andrésjai pujamunam wearuiti. 30 Nui Simónkan tsatsari tsuweak tepau, tuma asamtai Jesúsan chicharainak:
“Simónka tsatsari tsuweak tepawai”, tusar ujakaruiti. 31 Nu tama Jesús jeari uwejnum achik inankin. Nu turamuik tsuweamun michatar pegker jas, nantaki yurumkan inarak shuar Jesúsjai yujan ayurawaiti.
Nukap shuar pegker amajsamu
(Mt 8.16-17; Lc 4.40-41)
32 Nu tsawantaik kintamai, ja ainan, tura iwanch egkemtuamu ainajaimak Jesúsan ashi ikaatkaruiti. 33 Turawar ashi shuar ainaka waitinam iruuntraruiti. 34 Tumawarmatai ja ainan pegker amaju, tura iwanch ainancha jiintra shiaktarma tusa tinaiti. Iwanchka Criston nekaina, turamu asa chichakcharti, tusa tinaiti.
Jesús Galileanam Yuusa chichame etserkamu
(Lc 4.42-44)
35 Yama tsawak eke suamut aig nantaki, yaaktan ikuak kanaki shuar atsamunam aparin aujsattsa wuwaiti. 36 Tumamtai Simón ni amikri ainajai eainak wearuiti. 37 Tumawar Jesúsan wainkar chicharainak:
“Ashi shuar eatmainawai”, tusa tuina. 38 Nu tusa tama ni chichaak:
“Yaakat jeashtachu aina aisha wearmi, tumar Yuusa chichame etserkarmi, wika juna etserkattsan juigka tawaitjai”, tusa tinaiti. 39 Jesúska ashi Galileanam weká jakuiti, tura chiki chikichik yaaktanam jeakka, nita iruuntairin wayaa Yuusa chichamen etsereak, iwanch ainancha jiir ishimajakuiti.
Shuar leprajai ja pegker amajsamu
(Mt 8.1-4; Lc 5.12-16)
40 Shuar lepra tukumau jak pujau Jesúsan wainak tikishmatar chicharuk:
“Apu, ame wakerakmeka winasha pegker amajtumainaitme”, tusa tinaiti. 41 Tusa tama Jesús wait anentar, uwejejai jan achiak:
“Wakerajai, yamaika pegker jasta”, tusa tinaiti.
42 Tamauwaik wári ashi iyashigka chimik pegker jasuiti. 43 Tumamtai Jesús ikuak akateak:
44 “Wetá, turasha chikich shuar ainaka ujatsuk Moisés timauwa nu metek umiakum sacerdote pujamunam jeata. Nuka tu aarmauwaiti: Ashi shuar leprajai ja pegker jasuka tuke tumasarke artinaiti. Tura chikich ainasha wainainak nekaspapi pegker jasia tiarti”, tusa tinaiti.
45 Nu tusa timaitiat, ni pegker jasmaurin pachis ashi shuar ainan ujaku. Nuna imatika etserkau asamtai, Jesúska wantinak yaaktanmasha waimainchau jas, nigka ayatik yaaktan arinig shuar atsamunam weká. Turasha chikich yaaktanmaya ainasha Jesúsan wainkartasa iruuntuina.

*1:3 Isaías timauwa nuka Juankan pachis eke akiintsaig chikichik shuar aya nugkanmag wekas senchi chichaak: Ashi shuar ainaka tunau takat aina nuna inaiyainak uwemtikartina nuna juinak pujutin yapajiawarti taku tinaiti.