1 Libaiali maru Anduane Homogonaga anda mamage haga helene. Agali maru ti Kora hameigini howa Kore igini Meselemaia henego ibu Asaba damene hene. 2-3 Meselemaia ibu igini karia henego mini uru. Segaraia Yadiele Sebadaia Yadaniele Elama Yahohanana Elioenai layaru hene.

4-5 Agali mbira Obededomo henego Ngode Datagaliwabehanda ibu mo turu halu biamogo biyagola ibu igini halira henegonaga mini uru. Igiri wahene Semaia howa maru Yahosabada Yoa Saga Nedanele Amiele Isaga Peuledai layaru hene.✡2 Sml 6.11, 1 Bit 13.14

6 Obededomo igini wahene Semaia ibu igini waragaria henego ti bibahende agali bayale mandabi howa ti hameigini hearunaga agali haguane hene. 7 Agali uruninaga mini Odoni Labaele Obede Elesabada Elihu Semagaia layaru hene. Elihu Semagaiala libu mbirale tara tara buleneru mugube gibi yu hene.

8 Obededomo ariaru daga lamaga howa pira waragariani kira (62) hearu tibi ti igini aguaneru damenerubi bibahende mamage holene biabe ogoni manda biaihe hene.

9 Meselemaia damene ti agali pira mbirani halira (18) howa tigua biabe bulene wiago manda biaihe hene.

10 Merari hameigini howa agali mini Hosa ibu igini maria henegonaga mini uru. Simiri henego ibu Hosa igini wahene ndogoyu ibu abahanda ibu agali haguane helo helene. 11 Hosa igini maru Hiligaia Tebalaia Segaraia imaru hene. Hosa ibu damene dege pira mbirani tebira (13) heneru ti bibahende Anduane Homogonaga anda mamage haga hene.

12 Agali uruni ti Libaiali maru hearume Anduane Homogonaga andaha biabe bialu helo ti damene tale bialu wabuni mbira mbira headagua tigua Anduane Homogonaga anda mamage holene biabe bilo tibi tale bialu wabuni mbira mbira helalu biabe uruni bialu hene. 13 Agali uruni tigua Anduane Homogonaga anda panga haraba ago ai ibugua handayaho holobadabe hondolenaga ege to̱le̱ baraga halu daba hendene. Ti damene mbira mbira headagua mbirago dewa heaguabi mbirago emene heaguabi harugo lowa biabe tinagaore talebu mini. 14 Tigua ege to̱le̱ biaru baraga halu ai dameneme anda panga ni tagira ibiragoha heago handaya holobadabe handalu hemiria Selemaia ariame handayaho helo dabene. Mani Segaraiahanda panga abene uyurahayagi heago handayaho holene wiaria hendene. Segaraia ibu Selemaia igini howa ibugua mini manda bayaleru talebu miaga hene. 15 Ani bialu mani ege to̱le̱ biaru baraga howa handalu hemiria Obededomohanda panga abene unurahayagi heago handayaho halu ibu iginiru tigua tamu hobane dabudabu wiaga heagoha handayaho helo dabayayane hendene. 16 Ani buwa mani Subimi Hosala libugua anda panga ni paliragohayagi heago handayaho halu panga mende mini Salegede laga heago handayaho helo dabo helene. Panga Salegede ogoni hariga irigi halu piaga wiago kaware dege hene. Agali uruni damene bibahende headagua biabe bulene mbira mbira dabo helalu ti iriari bialu maru tigua bu aribia halu panga uruni handayaho iriari biaga hene. 17 Horo bibahendengi Libaiali uruni waragarialime panga haraba ni tagira ibiragohayagi heago mamage haga hene. Agali mariame panga haraba abene uyurahayagi heago mamage halu maria mendeme panga abene unurahayagi heago mamage halu bini. Ani bialu maria dege teboneme anda tamu hobane dabudabu wiaga heago mamage hene. Anda tamu hobane mbira heago kirame mamage halu hoba mende heago agali kira mendeme mamage hene. 18 Ani bialu agali waragariame panga haraba ni paliragohayagi mamage halu kirame anda heago mamage heagola mariame hariga wiago mamage haga hene. 19 Libaiali uruni ti Kora hameiginibi Merari hameiginibi dege howa mamage holene biabe ogoni bialu hene.

20 Agali maru hearu Libaiali dege howa tigua Anduane Homogonaga andaha muni wiagane wiago handayaho howa dabudabu bayale wali agalime Ngode Datagaliwabenaga lomabu mini wiarubi handayaho haga hene. 21-22 Agali mbira mini Ladana henegonaga aguanene Gesono hameigini mini Yahiele henego ibu igini kira Sedama Yoelela heba uruni tinaga biabe Anduane Homogonaga andaha muni wiagane hobanebi dabudabu tara tara wiaga hobanebi heago handayaho haga hene.

23 Ani bialu hameigini maru Amarama Isiha Heberono Usiele heneru ti aguanene hearume biabe bulene wia dege bini. 24 Agali mbira mini Sebuele ibu Mosese igini Gesomo hameigini mbira henego ibu Anduane Homogonaga andaha muni wiagane hobane heago handayaho haga agali haguane hene. 25 Sebuele ibu Gesomo hamene Eliese aguanene howa ibu Selomidi damene hene. Eliese igini Lehabaia Lehabaia igini Yasaia Yasaia igini Yorama Yorama igini Sigiri Sigiri igini Selomidi hene. 26 Selomidi ibu damene hearu tigua dabudabu mbirale bayale damene Ngode Datagaliwabenaga lomabia ho wiaru handayaho haga hene. Mbirale bayale uruni Kini Debidihandabi hameigini mbira mbiranaga agali haguane bu hearumebi ami haru haga agali haguane hearumebi tigua Anduane Homogonaga loma bialu wiabagiho wini. 27 Tigua wai bialu bo podama anda puwa tigua waitiginaga dabudabu bayale tara tara wiaru mo yalu dai bigi buwa mbirale bayale uruni Anduane Homogonaga lalu loma bia howa Anduane Homogonaga andaha biabe bulene wiago bilonaga mo wigi biaga hene. 28 Mbirale bayale uruni ale Anduane Homogonaga andaha wiaru bibahende Selomidibi ibu damene hearubi tigua handayaho haga hene. Abale howa Anduane Homogonaga bi mana latagi haga Samuelebi Kini Solobi Nere igini Abanebi Seruia igini Yoababi agali uruni tigua mbirale bayale uruni bibahende Ngode Datagaliwabenaga lowa lomabu minigo wini.

29 Isiha aguanene bu hearu aria Kenanaiabi ibu igini bu hearubi tigua gabumane biabe bilo dabo helene. Uruni ti marume beba gili bia dagala biaga helalu marume Isaraele wali agalinaga godi hale haga hene.

30 Heberono aguanene bu hearu Hasabaiabi ibu damene agali daosini mbirani handari karia (1,700) hearubi tigua Isaraele dindiha abene Iba Yodana ni paliragohayagi gabumane biabe bulene winigo handayaho haga hene. Agali uruni ti biabe bulene wiaru damene manda biaihe howa tigua kini heagonaga biabe bulene wiagobi Anduane Homogonaga biabe bulene wiagobi handayaho haga hene. 31 Heberono aguanene agali mbira mini Yaraia henego ibu tinaga agali haguane hene. Debidi ibu kini dege heane mali pira maria (40) pene lowa Heberono hameigini lenego bibahende hearu mandabi ai kabe hondole taya bialu hene. Ani taya bialu hemiria hameigini ogoni aria agali dewaore Gileada dindihayagi Yase tano wiagoha hearia handa walia hene. Agali uruni ti wai wayali haga hongoheore hene. 32 Ani heago hondowa Kini Debidi ibugua Yaraia aria agali haguane hearu daosini kirani handari karia (2,700) bibahende dabo helene. Ti agali bayale tigabiore howa ti Isaraele dindiha Lubene hameiginibi Gada hameiginibi Manase hameigini halu mende hearubi Iba Yodana ni tagira ibiragohayagi hearu tigua Ngode Datagaliwabenaga biabe bulene wiarubi kini heagonaga biabe bulene wiarubi bibahende handayaho helo helene.