1 Alegesanda ibu Masedonianaga Kini Pilibi igini howa ibugua ami agaliru haru halu Masedonia dindi wahalu Pesia dindi Midia dindilanaga Kini Dariusula wai bule pene. Ani bialu Alegesanda ibugua Dariusu bope halu ibu Pesia dindinaga kini ho aribia hene. Pigane Girigi wali agali hangunaga kini hene. 2 Alegesanda ibugua wai dewaore bialu tano hongohe wiaru balu bo bodahana haga bini. Ibugua dindi kaundia tara tara wiaruha wai bialu kini bu hearu bo wahai halu dabudabu bayale tara tara wiaru mo page bigi bialu dindi anda bo labu haga bini. 3 Ani bialu ibugua dindi bibahende wiaru handame hai ho howa ainde ibu gibiore mbira kogoni lo mitangi bu hene. 4 Ibunaga ami agali hongoheore dabo helowa ibugua dindi tara tara bu wiarubi wali agali uruniha hearubi kini hearubi handaya ho heagola tigua ibu dagisi migi bialu hene.

5 Mani howa Alegesanda ibuni warago timbuni bayagola ibuni homeleda lo manda bini. 6 Ani manda bialu ibugua agali maru ibuni baba mandagi igiri emeneni howa hama ibalu ayu ti ami agali haru bamba haga heneru bibahendehondo dindi ibugua handaya ho heneru ti mo tahaga bini. 7 Alegesanda ibu mali homberia kini halu homene. 8 Homayagola mani agali haguane biaru ti mbira mbirame dindi tini wai bialu mo wiyaru handaya ho haga haga bialu 9 tini dindi uruninaga kini haga haga bini. Ani bialu mani howa ti igini aguanerume tini henegoria henge mialu ho aribia haga bialu mali dewaore hene. Ani howa tigua wali agali dindini hearu genda timbuni dewaore mo migi bialu hene.

10 Andiogusu Ebipanese ibu Kini Andiogusu tebone henego ogoni igini howa ibu kini agali ko henedaru aria mbira hene. Ibu tano timbuni Lomo wiagoria garabaya henego ai Giriginaga mali daga handari mbira pira tebirani karia (137) layagola ibu kini hene.✡2 Mag 4.7

11 Horo odaruningi Isaraele dindiha wali agali Anduane Homogonaga bi mana mo wahaga maru howa tigua wali agali mo luluya halu lalu, Ai wali agali tara Anduane Homogo mitangi nabiaga kaware karu baba mandagi biabe biamaga halu holene nga. Inane hangu hemagola genda tara tara wiaru inaha anda ibugu biyagonaga ani bulene nga, lene. 12 Wali agali dewaoreme bi ogoni bayaleda lalu 13 marume turuore howa tigua wali agali tara Anduane Homogo mitangi nahaga tara karunaga mana ngago talialu bulenaga tigua kinihanda bule pudaba larabe hondole gerai lalu kini hale hole pene. 14 Ani bialu tigua gini biagane hama timbuni mbira Girigi dindiha wabu wigi biadagua Yarusalemeni wabu wini.*Mbirale ogonidagua bialu Girigi tigua ohowa wai hanalu Isaraele wandari igiri bu karume tinaga mamali manabi lotu mana ngagobi wahai halu wali agali tara Ngode Datagaliwabe mitangi nahaga bu karunaga biaga mana ngago dege talialu helonaga ani bini. 15 Ani bialu Isaraeleali tinaga tingini podene heago lone heladai bini. Tigua anidagua binigome habo nalolene bi Ngode Datagaliwabehanda ti baba lo wiyago pugini. Ani bialu ti wali agali tara tara Anduane Homogo mitangi nahaga hearubaba nenege halu howa tigua mana ko tara tara wiaru bialu hene.✡1 Ko 7.18

16 Andiogusu ibunaga gabumane biabe bulene wiago buwa mo hongo hai howa ibugua Iyibi baba wai bialu Iyibinaga kinibi ibu dege howa ibugua dindi kirabali handaya ho holene hame lene. 17 Ani manda buwa ibunaga ami agali hongohe hearu haru halu Iyibi pene. Ibugua wai biaga garo ale nogo hosime gililaga karisi wiarubi nogo timbuni tara mini elepana hearubi haru halu nogo hosirubi haru halu sibi dewabi heba pene.†Isaraele dindi kawareha nogo elepana ogoniale nahagago ai agali maru Andiogusu ibu aria bu hearume wai biamogo bulenaga India dindi howa haru ibiniya. 18 Pialu Iyibinaga Kini Tolemi heago baba wai bini. Wai bialu howa Tolemi ibu gi halu ibida dai bialu pu waore hayagola ibunaga ami agali bu hearu bibahende bo wahai hene. 19 Andiogusuhanda Iyibi dindiha tano hongohe wiaru bo poda anda howa ibu karu lai halu wali agali tinaga dabudabu wiaru damene bibahende mo hilo yai halu bini.

20 Ai mali handari mbira pira mariani tebira (143) hayagola ibu lone dai buwa ami agali dewaore haru halu Isaraele dindihabi Yarusaleme tanohabi wai bule pene. 21 Ibugua mineore tara howa Ngode Datagaliwabenaga anda heagoha anda puwa mbirale lotunaga wiaru damene mo yai hene. Anduane Homogonaga lomabu delaga dabu ngolome wabini heagobi lamu hale hedo wiaga gene hearu heba biabe ogoninaga biaga wiarubi 22 tebolo dagia mbira mberedi Anduane Homogo lomabu minigo wiaga heagobi waini iba hambu lomabu miaga gabo be wiarubi ira hagua ngabilo delaga mini inisenesi lomabu delaga ndisibe beledirubi labolabo timbuni Anduane Homogo anda tamu Hobane Loma Bia Heneore hoba amu heagoha panga paya amu haga heagobi mo yalu yári tara tara ngolome wabini wiarubi mo yai halu bini. Ani bialu anda biago haneni ngolome yári bia hearu gialo yai hene. 23 Ani bialu silibabi ngolobi gabo be tara tara muni dewaoreme yolo bu wini wiarubi muni bibahendeore mo do hearubi mo yai halu pene. 24 Mbirale uruni bibahende ibu dalu mo yu piai hene. Ibugua wali agali dewaore bo wahai halu mbirale o biyadaruninaga ibu wayaliore timbuni tingi howa ibuninaga mini yaraga halu hene. 25 Ani biyagola Isaraele dindi bibahendeha kiabu dugu dewa bialu hene.

29 Mali kira piyagola kini ibugua ami agali haguane mbira ami agali dewaore haru halu Yarusaleme wali agaliha dagisi muni mule pudaba lene. 30 Agali ami haru haga ogonime bi bayale lalu howa ke̱ halu ibunaga miniha ko mo hondo holene mana palia to̱le hene. Wali agalime ibunaga bi bayale layagoha mini pelai howa hale ho wai heagola wai abale hedope halu wali agali bu hearu bai hene. Ibugua ti bope halu Isaraele wali agali dewaore bo wahai hene. 31 Ibugua Yarusalemeha mbirale bayale wiaru mo yai halu tano bibahende bo heda haiore hene. Anda bu hearubi tanonaga wai pabe hongohe egeme bini heagobi bibahende irame bo heda hai hene. 32 Wali waneigini bu hearu garabaya helai halu nogo bulumaga bu hearu kayu haru hai halu bini.

33 Ani bialu mani howa tinime Yarusaleme tanonaga hobane mbira mini Debidinaga Tano laga wiagohayagi hagira bu mialu ege pabe daligaore biadaga howa pabe neneni ami agali mamage howa handapugu bu haga andaru bu helaga bini. 34 Ani buwa tigua agali maru mana ko ngago bialu mana puguaga hearume tinaga anda hongohe ogoniha mamage howa handaya ho helo helene. 35 Tini holenego mo hongo hai howa tini tomo nolenebi wai biaga alerubi mo mogo bu wiai hene. Ani bialu tigua mbirale Yarusalemeha page mo yayaruni anda ogoniha mo do howa wiai hene.

36 Tigua Isaraele wali agali baba waitigi timbuniore halu maru Anduane Homogonaga andaha pole piyaru mo gi haga bialu hene.

37 Wali agali bayaleru Anduane Homogonaga anda biagoha berearu homelo bo wahai haga bini. Mana ko tigua biyagome Anduane Homogo anda loma biahe baya heago mebia halu mo dodohe helene.

38 Wali agalime gi timbuni howa ti Yarusaleme wahalu ibida piai hene. Ani piai hayagola Yarusaleme wali agali tara hearu ti dege dalu wini. Wali agali tara dindi taraha howa ibini hearu tinaga tano buhinu wini. Yarusaleme wali agali tini tano ogoni wahalu piai hene.

39 Ngode Datagaliwabenaga anda biago wali agali naheha bameore ho wahene mbira ani hene. Horo timbuni turu ho haga winingi dara howa dugu bialu holene wini. Sabada horongi tagaho holene horo wia aribia hene. Ani wiagola wali agali tigua anda biago bayale mini lene ka lalu mini yaraga nahene. Ani nabi tigua anda ogoni mege bialu bi ko hangu lalu hene.

40 Bamba Yarusaleme mini lene daliga winigo ai ayu ibu tagabiore nga. Abale ibu turu ho hene. Ai ayu ibuha turu holene biago beregedalu dara holene wia aribia ka.

41 Ai kini ibugua mana mbira wabialu lalu, Wali agali bibahende dindi ibugua haru howa handaya ho kago bibahendeha bu kamiru tígua tíni dindinaga mana ngago wahai halu mana mbiraore hangu biame halu dindi mbira wali agali haradagua bialu halimu, lene. 42 Wali agali bibahende dindi bibahendeha bu hearume kininaga mana ogoni karulape lai hene. 43 Ainde Isaraele wali agali dewaoremebi kininaga bi layadago talialu howa mbirale bi pupu wiaga gime wabini wiaruhondo bi pupu wialu lomaru bu mialu howa Sabada mana lo ngago wahaiore hene.

44 Ai kini ibugua beba mbira gili buwa agali marume yalu Yarusalemehabi Yuda dindiha tano maru ngaruhabi piai helene. Ibugua beba ogoni gilibu wia howa lalu, Mana gahenge ngago talialimu, lowa pelene. 45 Ibugua tihondo lawia halu, Loma damene bibahende loma irame dai helolenebi widi lomabu delolenebi waini iba odo lomabu delolenebi uruni bibahende wahai halimu. Ani bialu Sabada horongi biabe bialu lotu laga horo timbuni tagira ibirangibi biabe bilimu. 46 Tí Anduane Homogonaga anda kagobi agali anda ogoniha biabe bialu loma binigo mo miaga karubi bibahende mo nagalone hai helalimu. 47 Ani bialu tigua mbirale bi pupu wule gime wabini ngagonaga andaru bia halu lomabu delaga daburu bia halu dindi wiabagi heneru mo ngelaga bilimu. Loma bo delole howa nogoru ema bialu piaga marubi tinaga maname nabiaga ngago bo lomabu delalimu. 48 Tí igini taba hanaragola dongone podo mabu bulene nawiore. Ani bialu tínaga maname tíni Ngode Datagaliwabenaga deni dodohe holino nabiagane ngago bialu halimu. 49 Tigua mana bamba Anduane Homogohanda Mosesehondo mini yu kago wahai holene nga. Ani bialu mana ogoni mo bagi halu waore holene nga, lene. 50 Ani lowa kini ibugua lalu, Wali agali mana ogoni talia nabi kago ibu homelo bo waholene wulebira.

51 Ani lalu ai kini ibugua bi ogoni dindi ibugua handaya ho howa haru hene wiago bibahendeha piai helene. Ibugua agali haguane maru wali agali haru helo dabo helaga bialu howa lalu, Yuda dindiha tano ngaru bibahendeni mbirale bi pupu wule gime wabini ngagohondo loma mialu halimu, lene. 52 Ainde Yuda wali agali dewaore agali haguane uruninaga bi hale howa talima pialu Anduane Homogonaga bi mana lo wini ngago erembira mialu piai hene. 53 Anigo mana ko ogoni bialu howa Yuda wali agali maru dindi tara tara wiaruha ibida pugu pugu binigo ai dindi tara uruniha hadoho haga haga biai ka.

54 Ainde ege mini Kisilebenaga horo nguini (15) mali handari mbira pira mariani duria (145) hayagola Kini Andiogusuhanda bidaba layagola mbirale ko taraore ogoni Anduane Homogonaga anda kagoha lomabu delaga dabu heagoria, Mo wilimu, lene.‡Girigi tigua tinaga bi pupu wiago mini Susunaga bigiyabi be lomabu delaga dabube tobane mbira Yarusalemeha Anduane Homogonaga andaha lomabu delaga timbuni wiagoria mo ngelene. 2 Magabi Be 6.2 ngago hondolene nga. Yuda wali agali tigua mbirale ogoni ko tara mini Hondolene Hiriribi Gibiore laga wini. Ai te ogoninaga hondolene maru Daniele 9.27, 11.31, 12.11; 1 Magabi 6.7 wialu Madiunaga 24.15 Maga 13.14. Ai ege mini Kisilebe ogoni mali inanaga ngagoha malinaga ege beane hombenelaha haga nga. (Nobemba Ndisembala kangi haga wini.) Ani bialu tigua Yuda dindi maru wiaruha loma bu delaga dabu bu helai hene. 55 Ani bialu anda harabanibi hariga pedago bibahendenibi ira hagua nga biaga inisenesiru delaga biaga wini. 56 Ani bialu howa tigua Mosesenaga bi mana lo wini mbuga mbira ngane handayagua tigua budabaga buwa iraha delaga hene.§Mbuga budu delaga binidaruni Pigane Binigo Tebi Haru Tagira Penegobi Loma Binigo Mo Miaga Biabebi Dagalenegobi Mana Lo Winigo Loyanebi mbuga uruni budu delai halu hene. 57 Mbirali ibu habo nalolene bi lo winigonaga mbuga yu howa Ngode Datagaliwabenaga mana taluwa bialu heagua ogoni ibu homolene nga lalu kini ibugua bi hongohe ogoni lo wini. 58 Ege dewaoreni Isaraele wali agali tinaga tanoha hearia minu yania hene biaru mo ko timbuni halu hene.

59 Ai ege mini Kisilebenaga horo pira kirani duria (25) hayagola tigua mbirale bi pupu wiaga gime wabini biarunaga lomabu delaga dabu Ngode Datagaliwabe ibuni kagonaga lomabu delaga dabu heagoria wiadambi haga biagoria lomabu delene. 60 Tigua kininaga mana lo wiago talialu walime ibu igininaga tingini agalime podamabu bidaba lene bedaru bo wahai hene. Waneigini gali henedago ai̱ya ibuni mani pongobia howa libu haru homelo bo wahaga bialu hene.✡2 Mag 6.10 61 Ani bialu tinaga damenerubi agali waneigini galinaga tingini podaga hayadagobi bibahende homelo bo wahai hai haga bini. 62 Ani bialu heago helowa Isaraele wali agalime kininaga bi mo wahalu Anduane Homogonaga maname tomo nanolene leago damene bibahendenaga hene. 63 Isaraele wali agali tigua habo nalolene bi Ngode Datagaliwabela lo winigo pugualu tomo tara tara maname nanolene lo ngaru nanole howa tini homolene karulape lalu homole manda manda bu hene. Anidagua bialu hayagome wali agali dewaore homai hene. 64 Ai ogoningi ti genda timbuniore yu hene.