2 Kini
Kini Henerunaga Mbuga Mende
Mbuga ogoha gilibu ngarunaga nemandi ogo
Kini henerunaga mbuga mende ogome mbirale binirunaga bite kini mbuga mbira layagoria howa lo gililo mida. Kini Henerunaga mbuga mendegome Isaraele dindiha dindi tu wiaki howa wali agali dindi uyurayagi palearu Isaraele wali agali lalu unurayagi palearu ti Yuda wali agali lalu gilibu nga. Ti ani howa bialu henedarunaga bite lama pialu hameigini kirabali libunaga waitigi hearume anda ibuwa wai bialu tinaga dindi andabi bibahende bo gialabaga bu wahalu wali agali tini bibahende garabaya bu yalu penegoria lairi ka. Isaraele wali agali uyurayagi palearu Asirialirume ti ala anda ibuwa bo hilo yalu pene. Hameigini mende nirayagi palearubi mani agali kini mbira mini Nebugadanesa Babilonoali henegome ibuwa balu dindi andaru bo gialabaga bialu wali agali garabaya bu yalu pene. Mbuga mende ogome mbuga mbira biagome te ledadagua dege lowa mana kini tigua bialu heneru ogodagua bini lalu garealo nga.
Tigua Ngode Datagaliwabe andaneha haga henebe be nahaga henebe. Galone timbuniore mbira mbuga ogome mo walia holebirago ogo. Isaraele wali agalinaga kini heagomebi Yudanaga kini heagomebi libunaga wali agali bu hearumebi tigua mine howa Ngode Datagaliwabenaga bi mo wahalu ibunaga mana lo wiaru pugalu hene. Ogonidagua biyagome tiniha genda mo yu anda ibini. Wali agali tigua miniha ogodagua manda bini. Duniniore mbira Yarusalemebi Anduane Homogonaga anda loma bini hene biago kagomebi ina mo bayale holebira. Inaha mo ko holene mbira tagira naibulebira lo manda biaga hene. Anigo mbuga ogome lalu, Yarusalemeore bo giala hole bialu waitigi uruni tigua Ngode Datagaliwabenaga anda biagobi bo gialobaga biai hene, leda. Anidagua biyagome Isaraele wali agalirunaga mini mo ko hai hene. Ani biyagola mani howa tinaga lotu laga manabi ibaga biaga wiarubi bibahende iriari biai hene leda.
Bu̱lu̱ baga buwa kuni gilibu ngago (1.1–17.41)
Isaraeleali Yudalila talebuki howa bialu henego
1.1–8.15
Elaisa ibu agalime nabiagane ale tara tara binigo
8.16–17.4
Isaraele Yudalanaga hangu hangu henego
17.5-41
Asirialirume Samaria bo podalu dindi karulenego 18.1–25.30
Yudalinaga kiniru ha aribia halu henego
18.1–21.26
Hesegaiabi Manasebi Amonobi Yosaiabi kini ha aribia henego
22.1–23.30
Kini Yosaia ibu mana bayale bialu henego
23.31–24.20
Kini maru ha aribia henego
25.1-30
Babilonoalirume Yarusaleme mo ko halu bo gialabaga binigo
1
Elaya ibugua Kini Ahasia homolebira lenego ogo
Mani Isaraelenaga Kini Ahaba homayagola Moaba hameigini tigua Isaraele hameigini hearume ti haru helo hame nale hene. Ani howa tigua wai bialu Isaraele bo talia tagi hene. Horo mbirungi Isaraele wali agalinaga Kini Ahasia ibu ibuni andaga daligaha wa hondo haga wiagoria hene. Kini ibu ani hearia anda daligaha howa pilalu mo paraho dindini ibira howa ibu tingini mo ko ho hene. Ani biyagola ibugua agali maru bi abale Pilidia dindiha Egerono tano wiagoha lo pelalu, Dindi ogoniha Pilidia wali agali tigua dama mitangi bialu bi pupu wiaga gime wabini mini Balasebubu laga wiagoha i̱ dabi holobadabe be homolobadabe lalu halaga bilo lamule pudaba, layagola pene. Anigo Anduane Homogonaga dahuliyali mbirame Tisibeali Anduane Homogonaga bi mana latagi haga Elayahondo lalu, Áyu ogoni abaleore pialu agali maru Samarianaga kini kagome Egerono dindi pudaba layagola harigani pialu karu lola hole puwa tihondo ogodagua labe. Irane aginaga tígua Egerono wali agalinaga dama mitangi bialu gime wabini Balasebubuhondo bi halaga bule pialu kamibe. Tíni dalu Isaraele dindiha Ngode Datagaliwabe ibuni nahedane taya bima poramibe. Ani bule poramiyagua nde i̱na bi langerogo hale hadaba. Anduane Homogohanda Kini Ahasiahondo bi ogodagua laya. Í̠ dabi halu heyalu napolebere. Ani paliaho ngene dege homolebere, laya lalu lamule pu, lene.
Ani lamiyago hale halu Elaya ibugua puwa agali biaruhondo bi ogoni labe layadagua lalu lamini. Elayahanda bi ogonidagua lamiyago hale halu agali biaru ti abale kini berearia íbu dai biyagola kinihanda tihondo hale halu lalu, Tí agua biyagola abale dai birimibe, lene.
Ani hale hayagola tigua ladai bialu lalu, Harigani agali mbira lola harimago ibugua Anduane Homogonaga bi í̠hondo lamule yalu dai bidaba, laya. Ai bi ogoni ogodagua laya. Irane aginaga í̠na agali maru Egerono wali agalinaga dama mitangi bialu gime wabini Balasebubuhondo bi halaga bule pudaba laribe. Tíni dalu Isaraele dindiha Ngode Datagaliwabe ibuni nahedane taya bima poramibe, laya. Heneneore í̠ lone dabi naholebere. Í̠ anidagua paliaho wiaabo howa homolebere laya, lalu lamini.
Anidagua lamiyago kini hale howa ibugua tihondo lalu, Agali tíhondo bi ogonidagua langiyadagoni ibuni agali ago biyabe, lene.
Ani layagola tigua kini lamialu lalu, Agali ogoni ibu nogo dongoneme aga bialu mandibu nogo dongoneme degewi heneya, lene. Md 3.4, Mg 1.6
Ani layago hale howa kini ibugua lalu, Agali ogoni Anduane Homogonaga bi mana latagi haga Elayadago, lene.
Ani lalu kini ibugua ami haru haga agali haguane mbira heago heba ami agali pira duria (50) hearume Elaya minu yalu ibule pudaba laya handala pene. Tigua pialu Elaya heagoria puwa ami haru haga agali haguane biago ibugua handalu hearia Elaya ibu hari nene emene mbira heagoria berearia hendene. Ani hondowa ibugua Elayahondo lalu, Agali Ngode Datagaliwabenaga bi mana latagi haga kegoni í̠ áyu ogoni dalialu kini ibu hondole ibabe layago pole íbu, lene.
10 Ani layagola Elayahanda ladai bialu lalu, Heneneore i̱ Ngode Datagaliwabenaga bi mana latagi haga koyagua áyu ogoni dahuliya andagaha howa ira dene dalipe halu í̠bi í̠naga ami agali pira duria (50) haru haridarunibi bibahende bo heda hai helo laro, lene. Ani layaore ira abaleore aube tobane ibalu dahuliya andaga howa dalipe halu ami haru haga agali haguane biagobi ibu heba ibini ami agali pira duria (50) biarubi bibahende irame dai hayagola homai hene. Lg 9.54
11 Mani kini ibugua ami haru haga agali haguane mende heago ami agali pira duria (50) heba Elaya hearia pudaba layagola puwa ami haguane biago ibugua Elayahondo lalu, Agali Ngode Datagaliwabenaga bi mana latagi haga-o áyu ogoni kinihanda abale ibabe layago pole íbu, lene.
12 Ani layagola Elayahanda ladai bialu lalu, Heneneore i̱ Ngode Datagaliwabenaga bi mana latagi haga koyagua áyu ogoni dahuliya andagaha howa ira dene dalipe halu í̠nibi í̠naga ami agali pira duria (50) haru haridarunibi bibahende bo heda hai helo laro, lene. Ani layaore Ngode Datagaliwabenaga ira dene dalipe halu ami agali haguane biagobi ibunaga ami agali pira duria (50) biarubi bibahende irame dai hayagola homai hene.
13 Ani biyiyagola kini ibugua ami agali haguane mbira heago heba agali pira duria (50) halu tebone lone dege Elaya hearia pudaba, lene. Ani laya handala tigua puwa ai ami haru haga agali haguane biago ibu puwa Elayanaga wanakuihayagi ge duli hangaho biruwa ibuhondo lalu, Agali Ngode Datagaliwabenaga bi mana latagi haga-o i̱nibi i̱naga ami agali haru korunibi bibahende dara halu í̠na ina mo ko nahabe. 14 Dahuliya andaga howa ira dalipe halu agali ami haru haga haguane kirali biagobi libunaga ami agali hayarubi bibahende irame dai hayago manda bidogoni. Ainde í̠na i̱ore dara halu i̱ mo ko nahabe, lene.
15 Ami haru haga agali haguane biago ibugua bi ogoni lai hayagola Anduane Homogonaga dahuliyali mbirame Elaya lamialu lalu, Í̠na gi nahe ami haguane ogoni ibu karia dalipe halu pu, lene. Ani lamiya handala Elaya ibu dalipe halu ti haru mandagi kini hearia pole pene. 16 Ani pialu Elaya ibugua kini berearia puwa lalu, Anduane Homogohanda ogodagua laya, Í̠na mandabu handalu heria Isaraele dindiha Ngode Datagaliwabe naheyagola Egerono wali agalirunaga dama mitangi bialu gime wabini Balasebubuhondo halaga bule agali maru pudaba laribe. Anidagua biridagome í̠ lone dabi naholebere. Anidagua paliaho wia dege bialu homolebere laya, lalu lamini.
17 Mani howa Ahasia homayagola Anduane Homogonaga bi Elayaha howa latagi hayago heneneore lola hene. Ahasia ibu igini mbira naheyagola ibu hamene Yoramahanda Ahasianaga henge mialu Isaraele wali agalinaga kini ho aribia hene. Yahosabada igini Yahorama ibugua Yuda dindiha mali kira haru heagola Yorama ibugua Isaraele wali agalinaga kini hene.
18 Kini Ahasia ibugua binirunaga bi te mbuga mbira mini Isaraelenaga Kini Henerunaga Bi te laga ngagoha gilibu nga.

1:8: Md 3.4, Mg 1.6

1:10: Lg 9.54