Amoso
Mbuga ogoha gilibu ngarunaga nemandi ogo
Ngode Datagaliwabenaga bi mana latagi haga agali marunaga bi Anduane Homogonaga mbugaha gilibu wini ngaru ti maha Amoso ibunaga ala pigane gilibu wini. Amoso ibu Yuda dindiha tano emene mbira wiagoha howa pigane ibu nogo sibi hinalu haga hene. Ani hearia Ngode Datagaliwabehanda ibunaga bi mana Isaraele dindiha wali agali hearuhondo latagi hama pelo olene. Odagoningi Isaraele tiha genda anda ibulene mbira nawi bayale dege hene.
Isaraele wali agali ti bayale dege kamabe toba howa hearia Amosohanda lalu, Ngode Datagaliwabenaga deni tí bayale ndo kamigoni. Tígua wali agali yagibano tí heba kamiru bababi wali agali tí damene kamiru bababi mana ko dege bialu kamigoni, lene. Amosohanda ibunaga damene hearuhondo lalu, Tígua ko bialu kamiruni wahadaba, lalu bi hongo howa lamigi bini. Ani lalu howa, Wali agalirume mini beregeda nabirimiyagua Ngode Datagaliwabehanda tí pani ngulebira, lalu lamini. Isaraele wali agalirunaga agali haguane hearume bi ogoni layago hale howa ibuni dalu Yuda dindihayagi bo talia dai bini. Ani bialu hemiria Amosohanda lalu, Ngode Datagaliwabehanda mana ogo ale biyada lalu manda nabiaga kagome biagadagua áyu tígua birimiyagua nde tí Ngode Datagaliwabe kago manda nabiore kamagoni lalu walia kami. Ai tígua Anduane Homogo ibu timbuniore howa ibugua mbirale bibahende biai habehe kago tí pani ngialu mo ko holene ngago manda bulene nga, lalu lamigi biniru gilibu wigi bida.
Bu̱lu̱ baga buwa kuni gilibu ngago ogo (1.1–2.5)
Anduane Homogohanda wali agali tara tara manani dabenego 2.6–6.14
Anduane Homogohanda Isaraele wali agali manani dabenego 7.1–9.15
Amosohanda de gandeba dau halu hendenego
1
Anduane Homogohanda Amosohondo bi laminigo ogo
I̱ Tegoa tanoali nogo sibiru hinalu haga Amoso kogoni. Ani hewagola Anduane Homogohanda de gandeba mbira i̱hondo mo walia haya. Odagoningi Usia ibu Yuda dindiha kini heagola Yoasa igini Yaroboama ibu nde Isaraele wali agalinaga kini heangi bi ogo langiya. De gandeba ogoni hondowa mali kira hewagola dindi dumbirumbi timbuni biya. 2 Kin 14.23-29, 15.1-7, 2 Bit 26.1-23
Anduane Homogo ibugua wali agali mo ko holene hongo timbuni yu kago ogo
(Amoso 5.8-9, 9.5-6)
Amosohanda ogodagua lene. Yol 3.16
Anduane Homogo ibuni Hari Saionoha howabi
Yarusaleme tano wiagoria howabi
bi hongoheore hari kilikulu laradagua biayua.
Ani biyagome datani Hari Kameloha hearu bibahende gau lai halu kabu gimbu biya.
Anduane Homogohanda Siria wali agali hearu manani dabenego ogo
Anduane Homogohanda lalu, Damasagasa wali agali tigua mana koore dewa biaabo harimi laya. Ani biaabo halu howa Gileada wali agali hearu mo ko halu harimigonaga henemaneore i̱na ti pani ngulebero. Ais 17.1-3, Yar 49.23-27, Seg 9.1 Kini Hasaelenaga anda kagoria ira hedo bape harogola Kini Benehadadanaga andarubi dalu wai pabe hongohe bidarubi bibahende dai helolebero. Damasagasa tano timbuni ngagonaga wai pabe panga hongohe bidaru bo gialo wahai holebero. Ani buwa Abene dindi ulini ngagoha wali agali karu bo purogo lalu Bededene dindinaga kini bedagobi bo batagi holebero. Ani bialu Siria wali agaliru Kie dindi ni tagira ibiragohayagi garabayabu yalu pelolebero, lene.* Dindi ulini Abenebi Bededene dindi ledagobi ogoni labonaga irane ogo. Dindi kira ogonilabo Damasagasa dindiha dege wini. Anigo Hiburu bi lalu Abene dindi uli ogoni irane mana konaga dindi uli manda bialu manane lalu Bededene ogoni irane turuho dege haga dindi laga. Dindi kira ogonilabonaga mini ogoni gilibu winidagoni irane Ngode Datagaliwabehanda dindi ogoni mo ko hole nga lalu gilibu wini.
Anduane Homogohanda Pilidia wali agaliru manani dabenego ogo
Anduane Homogohanda lalu, Wali agali Gasa tanoha kamirume mana ko dewaore bialu harimigoni. Emene ha̱lo hole ndo bibahendengi Gasa wali agali tígua wali agali maru Idomo dindiha garabaya biabe ale bialu helo minu yalu pirimigoni. Ais 14.29-31, Yar 47.1-7, Ese 25.15-17, Yol 3.4-8, Seb 2.4-7, Seg 9.5-7 Tígua ani bialu harimigonaga heneneore i̱na Gasa wali agali pani mulebero. Tínaga tano ngagoha ira hedo bape harogola irame tano ogoniha anda hongohe karuni do baeala hole bilolebero. Ani buwa wali agali Asadodo tanoha karu bo batagi halu Asagelono dindiha kini kagobi bo batagi holebero. Ogonidagua bialu ai Egerono tano ngago bo gialo wahalu Pilidia wali agali yu wahene maru hayadaru bo wahai holebero, lene.
Anduane Homogohanda Taia wali agali manani dabenego ogo
Anduane Homogohanda lalu, Taia wali agali tigua horo bibahendengi ko nabi nahe biaabo halu hayagonaga wali agali maru Idomo dindiha garabayabu yalu pelayagoni. Bambaore howa ti ko mbira nabi baya hanguore hami̱ya lalu bi hongo howa lo winigo ogoni habo lalu biyagonaga i̱na Taia wali agaliruore pani emene ndo mulebero. Ais 23.1-18, Ese 26.1–28.19, Yol 3.4-8, Seg 9.1-4, Md 11.21-22, Lg 10.13-14 10 Taia tano ngagoria ira hedo ibira helarogola tanonaga anda hongohe karuni do gindulo ba a̱i̱ holebira, lene.
Anduane Homogohanda Idomo wali agali manani dabenego ogo
11 Anduane Homogohanda lalu, Idomo wali agalime horo bibahendengi ko wiaru biaabo halu howa tinaga damene Isaraele wali agali hearu dara naheore howa ayu tibume dibalu homelaga bialu harimigoni. Tigua hendore ndo keba timbuniore howa ani bialu harimigoni. Tinaga keba ogoni ereba nahe wiaabo kagonaga Idomo wali agali uruni tibi pani emene ndo mulebero. Ais 34.5-17, 63.1-6, Yar 49.7-22, Ese 25.12-14, 35.1-15, Oba 1-14, Mal 1.2-5 12 I̱na tinaga tano Temanabi Bosara tano ngagobi kirabaliha ira hedo bape harogola tano ogoni laboha anda hongohe karu dai holebira, lene.
Anduane Homogohanda Amono wali agali manani dabenego ogo
13 Anduane Homogohanda lalu, Amono wali agalime mana ko biaabo hayagonaga i̱na ti mana lalu genda mo mulebero. Tigua ani bialu howa dindi dewa mule hame lalu Gileada dindiha wali gali tombeha bere berearu bibahende bo togodo bagabu wahaya. Ani biyagonaga i̱na Amono wali agali karu pani emene ndoore mule ngogoni. Yar 49.1-6, Ese 21.28-32, 25.1-7, Seb 2.8-11 14 Tinaga Laba tano ngagoria pabe hongohe bu kagoria ira hedo bape harogola tinaga anda hongohe bu karuni dai helolebero. Ami agali bu karume wai bule howa wai-o hongo howa lalu wai biagadagua bialu horo kongi puyabu hongoheore ibiradagua bulebira. 15 Ani biragola Amono dindinaga kinibi agali haguane karubi bibahende dindi mendeha garabayabu yalu polebira, lene.

1:1: 2 Kin 14.23-29, 15.1-7, 2 Bit 26.1-23

1:2: Yol 3.16

1:3: Ais 17.1-3, Yar 49.23-27, Seg 9.1

*1:5: Dindi ulini Abenebi Bededene dindi ledagobi ogoni labonaga irane ogo. Dindi kira ogonilabo Damasagasa dindiha dege wini. Anigo Hiburu bi lalu Abene dindi uli ogoni irane mana konaga dindi uli manda bialu manane lalu Bededene ogoni irane turuho dege haga dindi laga. Dindi kira ogonilabonaga mini ogoni gilibu winidagoni irane Ngode Datagaliwabehanda dindi ogoni mo ko hole nga lalu gilibu wini.

1:6: Ais 14.29-31, Yar 47.1-7, Ese 25.15-17, Yol 3.4-8, Seb 2.4-7, Seg 9.5-7

1:9: Ais 23.1-18, Ese 26.128.19, Yol 3.4-8, Seg 9.1-4, Md 11.21-22, Lg 10.13-14

1:11: Ais 34.5-17, 63.1-6, Yar 49.7-22, Ese 25.12-14, 35.1-15, Oba 1-14, Mal 1.2-5

1:13: Yar 49.1-6, Ese 21.28-32, 25.1-7, Seb 2.8-11