1 Mbuga ogo Baruguhanda gili bini. Barugu ibu Masea aguane howa Neria igini hene. Ani bialu ibu hameigini Sedegaiabi Hasadiabi Hiligiabi uruni aria hene.✡Yar 36.4 2 Ibugua Babilonoha howa ege mbiru horo kane layagola Babilononaga kini heagome Yarusaleme bo gialo wahai halu wali agali garabaya bu yalu Babilono pu henego mali dauni hayagola mbuga ogo gili bini.*Agali mandabi hearume bi ogoni mali dauni ledago ege dauni lowa leda lo manda bini. Ege ogoningi dege Babilono ami agali hearu Yarusaleme tanoha anda pene. 1 Kini 25.8 ngago handabe.✡2 Kin 25 3-4 Baruguhanda mbuga ogo Yudanaga Kini Yahoiagimi igini Yahoiagininaga deni howa daga lene. Ani bialu ibugua mbuga ogoni Babilono wali agali dewaore iba Sudu angeni bu hearu bibahende deni howa daga lene. Wali agali Baruguhanda beba daga layago hale hole ibinidaru agali mini lene timbuni bu hearubi kini damene bu heneru waneigini hearubi agali timbuni mini lene hearubi bi ogoni hale hole íbu ngoai ho hene. Wali agali dunini bu hearubi dunini ndo bame hene hearubi bibahende bi ogoni hale hole íbu ngoai hene. ✡2 Kin 24.8-17

5 Barugu ibugua mbuga ogoni gili bialu heagola wali agalime dugu timbuni bialu tomo nane waho halu tigua Anduane Homogohondo bi lalu hene. 6 Ani bialu howa tigua muni tinime mule karulape hame leadagua 7 ilomogo bialu tigua muni uruni loma binigo mo miaga agali haguane Yahoiagimi hearia Yarusaleme yalu pelene. Yahoiagimi ibu Hiligia igini howa Salumu aguane hene. Muni uruni maru agali loma binigo mo miaga maru hearu talebu mialu maru nde wali agali maru Yahoiagimi heba mandagi haga Yarusalemeni hearuhondo migi bini.

8 Ege mini Sibananaga horo pini (10) hayagola Baruguhanda gabo mbiraleru Ngode Datagaliwabenaga andaha Yarusalemeni wiaru abale Babilono ami agalime mo pagebu yalu pene biaru lone yu dai bialu Yuda dindiha daibilene. Gabo mbirale uruni abale Yudanaga kini Yosaia igini Sedegaiahanda wabidaba layagola tigua silibame wabu wini.†Isaraele wali agali tinaga ege mini Sibana ogoni inanaga ege dauni waraganela haragola ibagane. 9 Tigua gabo uruni Babilononaga Kini Nebugadenesahanda Yudanaga Kini Yahoiagini Yarusalemeni hearia minu yalu agali haguane hearubi gabumane haru haga hearubi agali timbuni hearubi wali agali damene bu hearubi wali agali tara tara bu hearubi bibahende garabaya haru halu Babilono penego ogoni peaha mani gabo be uruni wabu wini.

10 Wali agali tigua beba gili buwa Yarusaleme pelalu howa lalu, Iname muni tíhondo ibilaramago tígua muni urunime lomabu delolene ale nogo irani dai helo loma bo delolenebi loma bame mo turu halu ko domolenenaga miagaru ale yolo bialu ira hagua nga bilo loma delolene widi lomabu mulenerubi yolo bigi bilimulo wia harama. Tígua uruni bibahende yolo buwa Anduane Homogo inanaga Ngode Datagaliwabe kagonaga lomabu delaga dabu kagoria wu haealadaga helalimu. 11 Ani bialu tígua Babilononaga Kini Nebugadenesabi ibu igini Belesasa kagobi libu luore howa mali dewaore helonaga Ngode Datagaliwabe kagohondo bi la halimu. 12 Anduane Homogohanda ina baya hangu mo hongo helobi haru kagola ibaga bu holoma̱yabi ibugua ina biamogo bilo tígua inanaga bi la halimu. Ainde Nebugadenesabi ibu igini Belesasabi libugua ina handaya ho howa haru kagola iname libunaga mini yaraga ho haabo halu homalu waholeberema. Ani beremagola libunaga miniha ina baba turu ho holebira. 13 Ainde iname mana ko birimagonaga ibugua inahondo keba ho kago wahalu ina dara helo Anduane Homogohondo inanaga bi lahalimu. 14 Iname bi mbugani gili bu wia haramago handalu horo timbuni Ngode Datagaliwabehondo bi loleneru tagira ibirangi inanaga ko ngaru ibunaga andaha puwa latagi hai halimu, lene.

15 Beba ogoniha bi maru ladege bialu ogodagua leda. Ainde tígua Anduane Homogohondo bi ogodagua lalimu. Ngode Datagaliwabe ibu inanaga Anduane Homogoore ka. Ibu tigabiore ka. Ani kagonaga deni ina taga timbuniore ho kemagoni. Ina Yudia wali agali bibahendebi Yarusaleme wali agalibi 16 kini kemarubi agali haguane bu kemarubi loma binigo mo miaga agali kemarubi Anduane Homogonaga bi mana latagi halu mbiwia haga kemarubi inanaga mamali henerubi bibahendeore taga hai haramagoni. 17 Irane iname mana ko bialu 18 Anduane Homogonaga bi mo waharima. Iname ibunaga bi hale nahe howa ibunaga mana lo wini wiagobi baya hangu talia nabi harima. 19 Bambaore hama ibinigoha howa áyu kemagoni iname Anduane Homogo kago mo erembira mialu harima. Mana ogoni Anduane Homogo inanaga Ngode Datagaliwabehanda ina Iyibi dindiha howa haru tagira ibiyangi howa bialu henego haabo kema. 20 Ainde Bambaore Ngode Datagaliwabehanda inanaga mamaliru Iyibi dindiha howa haru tagira ibalu dindi bayale mbira tomo baya nogo andu ibane dewawibi mone taranaga ibane dewawibi wiagoha haru íbu helene. Ani bialu ibugua bi hongohe mbira agali ibunaga biabe bia haga Mosesenaga ne harigaha howa lalu iname ibu andaneha naharimayagua ibugua ina pani ngialu mo ko holebero, lalu bi hongoheore lene. Anidagua lenego ainde áyu iname genda Anduane Homogohanda keba halu mo ngiyago yu kema.✡Man 28.15-68 21 Anduane Homogo Ngode Datagaliwabehanda agali ibunaga bi mana latagi halu mbiwia haga marume ibunaga bi ina langule yalu pu lene ibugu biyaru iname hale nahe mine halu bi mo wahalu haabo harima. Ina hangu hangu hame wimagoha pupebe bialu hariga ko wiagoha pialu harima. Ani puwa iname mbirale bi pupu wulenaga gime wabini wiaruhondo bi pupu wule pialu harimago Anduane Homogonaga deni mana ko bialu harima.