Esegiele
Mbuga ogoha gilibu ngarunaga nemandi ogo
Isaraele wali agalinaga waitigi Babilono agalime Yarusaleme balu karulai halu wali agali maru hearu Babilono dindiha garabayabu yalu pene. Ani piyangi tigua Esegiele ibubi ti haru garabaya bu yalu pene. Ibu Babilono dindini haru pu hearia Ngode Datagaliwabenaga mana latagi haga howa ibugua wali agali ibu heba mandagi garabayabu hearuhondo bi mana lamialu hene. Ibu ani hearia dege wali agali maru Yarusalemeni yu wahene hearu ti heagoha mani bulebiragonagabi mbiwia halu latagi halu hene. Mbuga ogoniha bi galone waragaria gilibu wigi bidago uru
Mbira
Ngode Datagaliwabehanda ibunaga wá taraore holenebi mini baya buruguleore holenebi de gandebaha howa Esegielehondo walia hene. Ani walia howa ibugua Esegiele ibunaga mana latagi haga helo dabo helene.
Mende
Ngode Datagaliwabehanda Yuda wali agali tiha mo ko holene timbuni wulebiragobi Yarusaleme gialobagabu waholebiragobi lalu de hondo halimu lenego nga.
Tebone
Dindi tara tarani wali agali marume Yuda wali agali mo hondo hayagonaga Ngode Datagaliwabehanda uruni ti pani mule lenego gilibu wini nga.
Mane
Esegiele ibugua lalu Ngode Datagaliwabehanda mani wali agali bu miniha mo palia holene yu holebiragobi bayale holene wulebiragobi lo nga lenego gilibu nga.
Dauni
Dindi tara taranaga haru haga agali haguane Gogohondo mo ko holene wulebirago mbiwia halu latagi hene.
Waragane
Isaraele wali agali tininaga dindi mo tigabu dai bialu Ngode Datagaliwabenaga anda lomabia hene timbuni biago lone bulebira lene.
Yuda wali agali Babilono dindini hayadarume tinaga dindini Ngode Datagaliwabenaga anda loma bia hene biago helalu ibuwa dindi taraha pu kamagonida mandabu hene. Ani howa ti Ngode Datagaliwabe heba kamabe be tini hangu howa kamabe toba howa ti wá nale hope hene. Ani heagola Esegiele ibugua wali agali biarume Ngode Datagaliwabe ibu ti heba haabo kago manda bilobi ibunaga mana yutiga bilobi mo hongo halu hene. Ani lalu howa ibugua wali agali mbira hangu hangu hearunaga mini mo hongo halu mana tigabi ngaru hangu bialu halimu laga bialu hene.
Horo mbiru mbirungi Ngode Datagaliwabehanda Esegielehondo galone de gandebaha mo walia haga bini. Ani biyagola Esegiele ibugua de gandeba uruni garea lalu wali agali lamigi bini. Horo marungi ibunaga bi uruni ogo ale layada lalu wále ngagola iname hale halu howa turu haramali. Anigo ibunaga bi maru irane agibe tobahe galone taibi ngagola iname galone baya hangu handa walia naharamali.
Bulu baga buwa kuni gilibu ngago (1.1–3.27)
Ngode Datagaliwabehanda Esegiele dabalu olenego 4.1–24.27
Yarusaleme mo ko holebirago mbiwia henego 25.1–32.32
Hameigini dindi tara tarani karu mo ko holebira lenego 33.1–37.28
Ngode Datagaliwabehanda Isaraele wali agali mo bayale holebero lenego 38.1–39.29
Kini Gogonaga hongo bo podolebirago mbiwia henego 40.1–48.35
Esegielehanda de gandeba handalu hearia Ngode Datagaliwabenaga anda bayaleore bulebiragonaga hendenego
Esegiele ibugua de gandeba mbira hendenego (1.1–7.27)
1
Esegiele ibugua Ngode Datagaliwabenaga haru howa biragane dagia wiaria hendenego ogo
1 Esegielehanda lalu, Babilono agalirume ina bo garabaya buwa Iba Keba peagoha mali pira tebirani (30) ege mane hayagola horo dauningi i̱na de gandeba handalu hewaria hari daligaha panga dugua hayagola Ngode Datagaliwabe hearia handaru.✡Mo 19.11
2 Horo ogoningi Babilonoalirume Yarusaleme lone puwa wai bialu tigua Yudanaga Kini Yahoiagini minu yalu ibinigo mali duria nigonihayagi howa de gandeba ogoni handaru.✡2 Kin 24.10-16, 2 Bit 36.9-10 3 I̱ Busi igini Esegiele loma binigo mo miaga howa Iba Keba peago angeni hewaria Anduane Homogohanda i̱ olayuago hale halu ibunaga hongo holene i̱ha karula hayuane handaru.
4 I̱na handa daga ho hewaria dalu puyabu beraliba heba timbuniore uyurahayagi howa ibiyago handaru. Hari beraliba ogoni hongo taraore howa hari daba bialu ira hungu ale deaore dege ibuwa kilikulu lalu purogo laya. Ogoni dombeneha mbirale ege to̱le̱ mini boronosi ngiringarale ale mbira hoaile wiaria handaru. 5 Ira hungu ale deagoha i̱na agali handalehe maria hearia handaru. Tinaga tingini agali handalehe dege howa✡Mo 4.6 6 tinaga dengui maria degedege howa tinaga babaganebi maria degedege hearia handaru. 7 Tinaga ge tigabi degedege howa ge giba nogo bulumaganaga ale hearia handaru. Ai tinaga ge giba uruni ngaraleore ege to̱le̱ mini boronosi baya hangu domowa mbirale ha̱i̱ howa ngelene mbauleyane handaru. 8 Tinaga babagane hearu andaneha gi agalinaga ale hearia handaru. 9 Uruni ti bibahendeme tinaga babagane yanga lowa tini handa edene buwa babagane mendehayagi mo gimbu buwa nguni mo maria howa ti pole howa ho beregeda nabi ani kaore dege ibaga bialu tigatiga piagaya.
10 Ti bibahendenaga haguane mbiraoreni dengui maria degedege howa uruni ti mbira taratara dege hea. Mbirago agali handaleheya. Dengui gi tigahayagi heago ibu budi gabua timbuni laiono handaleheya. Tebone gi lehayagi heago ibu nogo bulumaga dengui handalehe halu ere mbirahayagi heago ibu ega bodo hariawe timbuninaga dengui handalehe hearia handaru.✡Ese 10.14, Mo 4.7 11 Tinaga dengui ogonibi haga winiyago ai tinaga babagane kiragome yanga lalu nguni mo gimbu gimbu buwa babagane kira mende degedegeme tininaga tingini dambi hagaya. 12 Tinaga de maria degedege hayarume de kagohayagi handai hagaya. Ani howa ti mbirahayagi pole manda biyagua ti beregedolene henge nawi howa ta nabi pupe hagaya. Uruni tigua ogonidagua biagaya.
13 Agali handalehe uruni ti heago dombeneni ira hungu ale mbira pu íbu bialu hari daba ale biyaria handaru.✡Mo 4.5 14 Ani handaga bialu hewaria agali handalehe uruni ti gerai lalu pu íbu biragola abaleore handabe nahe hari daba mege lalu poralidagua piagaya.
15 I̱na handalu hewaria uruni ti heagoria dindini tinaga ge haga wiagoria garo ge ale mbira mbira wiaria handaru.✡Ese 10.9-13 16 Tinaga garo ge ale maria uruni bibahende ogobi degedege wuwa ege to̱le̱ uruni ambuabi ale ti bayaleore ngiringarale dedaibi muni dewame miaga wia. Garo ge ale maria uruni wiago andaneha nde garo ge ale maria mende wiago uruni handa amu nana bu polenedagua wia. 17 Ani biyadagome garo ge ale uruni tigua gibuni maria wiago bibahendeha pu íbu biai helonaga ani wia. 18 Ainde garo ge ale uruni timbuni gibiore wiagola hondowa i̱ gi timbuniore haru. Ani handalu hewaria garo ge ale uruninaga aeane heago bibahendeha handai holene de emene emene dewaore hearia handaru.✡Mo 4.8
19 Agali handalehe uruni ti pu íbu biragola garo ge ale uruni tibi heba pu íbu biagaya. Agali handalehe uruni ti yagalo yalu piyagua garo ge ale uruni tibi nde yagalo yalu uruni poradagua piagaya. 20 Uruni ti poabirago bibahendeha piai hagaya. Ti piyadagua garo ge ale biaru tibi nde ani piyago irane agali handalehe mariali biaru tigua handaya howa haru hagaya. 21 Ainde ti poragoha ti haru mandagi ibaga biai halu ti mbirani hondo haragoria ti haru mandagi hondo haga. Ai uruni ti yagalalu daliga iraga hayagua nde garo ge ale uruni tibi yagalalu ti haru piaga. Irane agali handalehe mariali urunime ti haru kagome ani biaga.
22 Ani hondowa dege handalu hewaria ndisibe ale timbuni mbira mo beregedowa tibinihayagi yaraga hayaria handaru. Ai ndisibe ale ogoni ngarale iba wa̱yu aleyagola hondowa gi timbuniore haru. Iba wa̱yu ale ngarale ogonime agali handalehe mariali biaru daliagani heago handaru.✡Mo 4.6 23 Agali handalehe mariali biaru ti ndisibe handalehe wagororo timbuni biagonaga andaneha howa tinaga babagane yanga lowa hea. Ani howa tinaga babagane nguni bibahende mo gimbu bu helowa ela hagahaga biagola handaru. Ani howa babagane kira mende hayadagome tininaga tingini dambi hea. 24 Ai tigua yaga layagola hale halu hewaria tinaga babagane pilipala layagome iba solowara yaribu biyagola u timbuni kulunduga laga biyabe toba howa wai biaga ami agali dewaore wai bule manda manda buwa tidiyu hene mbaulaya. Ani bialu tigua babagane yibiyabu lalu piyagola hale halu hewaria Anduane Homogo Hongo Haiheore kagonaga bi layuabe toba haru. Ti mbirani pu nabi howa tinaga babagane paulo haya.✡Mo 1.4-15, 19.6 25 Ani heagola agali handalehe mariali biaru togoni ndisibe ale timbuni wiyagoha howa bi lalu hayuago hale haru.
26 Ndisibe ale biagoria daligaha kininaga biragane dagia ale mbira wia. Dagia ogoni baya dege lalu mindibinaga hari mindini ale ege to̱le̱me wabiniya. Kininaga dagia ogoriani mbirale mbira agali handalehe berea.✡Ese 10.1, Mo 4.2-3 27 Ogoni ibunaga tingini daligaha ege to̱le̱ boronosi iraha deledagola ngarale wiraligobi hea. Dindihayagi wá hagane hale ale howa wá hangume mabu bupe hea.✡Ese 8.2 28 Wá ogoni ibunaga yári tara tara ni domo harini ngaligobi hea. Wá holene timbuni o handarudagoni Anduane Homogo ibuni hea manda biru.