1 Anduane Homogohanda i̱hondo lalu, Dindiali-o í̠na Isaraele dindiha hari wedaruhondo i̱na bi o larogo hale helo lamibe. 2 I̱ Anduane Homogo Bibahende Haru Haame Ho Haga kogo i̱na bi ogodagua laro. Isaraele wali agali tí waitigi bu karume tí mege bialu lalu, Bayaleoredago ai hari Isaraele dindiha karuni inanaga kagoni ndobe, laga bialu kagoni.

3 Anidagua lalu karume i̱niore Anduane Homogo Bibahende Haru Haame Ho Haga kogo i̱na bi o larogo í̠na mbiwia halu latagi habe. Agali waitigi dindi tara tara wiaruha howa ibalu tigua Isaraele baba wai bialu dindi bibahende mo ko halu bo labu halu dindi karulai howa ti mege bialu bi ko lalu haya. 4 Anidagua lalu hayago ainde Isaraele dindiha hari wedemirubi dindi ulini bugubugu ngamirubi iba emene emene pugupugu bialu poramirubi tígua i̱ Anduane Homogo Bibahende Haru Haame Ho Haga kogo i̱na bi o larogo hale halimu. Isaraele dindiha tano ngamirubi dindi maru wima pedemirubi waitigime balu mo labu hai hene ngamiru tíguabi i̱na bi o larogo hale halimu. Hameigini dindi kawareni palia para para biarume tí mo ko halu bo labu ho ngelowa mege bialu haya. 5 Ani lalu hayagonaga i̱ Anduane Homogo Bibahende Haru Haame Ho Haga kogo i̱na Idomo hameigini karu bababi hameigini dindi maruha karu bababi keba timbuni ho ko. Tigua i̱ mo nagalone halu i̱naga dindi wiwagoha mo ngubia halu i̱naga dindi ngogoha nogo bulumaga sibiru hinalu holene dataniru bayale andaho kago hondowa karulai haya.

6 Anidagua biyago ai dindiali-o í̠na mbiwia halu i̱naga bi ogodagua latagi habe. Isaraele dindiha hari wedemirubi dindi ulini bugubugu ngamirubi iba emene emene pugupugu bialu pedemirubi tígua i̱naga bi ogo hale halimu. Wali agali tara uruni tigua i̱naga dindi ngogo mebia howa i̱naga wali agali hondo oba halu mege biyagonaga i̱ Anduane Homogo Bibahende Haru Haame Ho Haga kogo i̱na tihondo keba timbuni ho kogoni. 7 Ani biyagonaga i̱ Anduane Homogo Bibahende Haru Haame Ho Haga kogo i̱na heneneore larogo hameigini uruni hengedape halu mo taga holebero. 8 Anigo ai Isaraele dindiha hari wedemiru tíha ira dewa andaho howa yuni mabialu lini dewaore dalu holeberemi. Emeneore howa i̱naga Isaraele wali agali ti tini dindiha hole lone dai bu harangi ira ogoninaga lini bayale dedaru do naga bialu holebira. 9 Hari wedemiru tíhayagi i̱ kogo i̱na tínaga dindi lone alialu eru hangalu helo handaya holebero. 10 I̱na Isaraele wali agali hameigini bibahende mo dewa howa Isaraele dindi í̠ha helai helolebero. Ani howa tigua í̠ha tano bo gialapaya bini ngaruni lone bia dai buwa karulai holebira. 11 Ani bialu Isaraele dindi í̠ha wali agalibi nogo tara tarabi mo dewa holebero. Ani berogola Isaraele dindinaga tano bibahendeni wali agali abale hagadagua ndo dewaore howa waneiginibi dewa holebira. Ani kamigola i̱na wali agali dindi ogoriani abale henedarume mana bayale bialu hayaru bolangua howa tí bayaleore bialu helolebero. Anidagua berogola tígua i̱ni Anduane Homogo henene henedalo manda biai holeberemi.✡Yar 31.27, Ese 35.9, 37.6, 37.13 12 Ani bialu i̱naga Isaraele wali agali bu karu i̱naga dindi ngoruha helo ti haru daibulebero. Ani haru daibialu dindi ogoni bibahende Isaraele wali agali tinaga dindi wialu waneigini bu karu ti lone tomo garibi nale bayale helolebira.

13 I̱ Anduane Homogo Bibahende Haru Haame Ho Haga kogo i̱na bi ogodagua laro, Wali agali bu karume lalu, Ina daluha dindi ngagome inanaga agali haguane karu bo ereba hai halu inanaga waneigini bu karubi bo wahai hagaya, laga ka. 14 Tigua ogonidagua lagagoyu ainde i̱na lalu áyu ogoni howa Isaraele dindi ngagome agali haguane karubi tinaga waneigini bu karubi mo ko naholebiraore. I̱ Anduane Homogo Bibahende Haru Haame Ho Haga kogo i̱na bi o ledogoniore. 15 Ai wali agali tara tara bu karume Isaraele dindi ngamiru hondowa oba halu mege bialu mo taga holene mbira nawulebira. Dindi o ngamiru tígua i̱naga wali agaliru lone mo ko halu mana ko ngagoha mo pila mbira holene nawulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.

16 Anduane Homogohanda i̱hondo ogodagua langialu lalu, 17 Dindiali-o Isaraele wali agali tini dindi ogoria heangi tigua mana ko ngubiore dodohe nabulene wiaru hangu biaabo halu hayagome dindi ogo mo ko hayagoni. I̱ninaga deni walime egengi ilili bu biruwa taga ho biragagobi ti hayagoni. 18 Tigua agali dewa homelo bo wahalubi mbirale gime wabini wiaruhondo bi pupu wialubi howa Isaraele dindi i̱naga deni mo dodo halu mo ko hayagoni. Ani biyagonaga i̱na tihondo keba timbuni howa pani miadai bialu minu barugoni. 19 Ani buwa tigua mana ko bialu hayagonaga i̱na tinaga dindi yu wahalu dindi taratara wiaruha purogo lelarugoni. 20 Isaraele wali agali ti dindi taratarani pugupugu biyagoha tigua mana ko bialu hayago hondowa wali agali taratara hearume i̱naga mini bayale tigabi mo dindiha halu hene. Tigua i̱ habane nabulene nagaloneore kagonilo manda buwa mo yo handalu lalu, Isaraele wali agali ti Anduane Homogonagaore karuni howa irane aginaga tinaga dindi andaru wahayadabe. Tinaga Anduane Homogo ibugua ti biamogo nabiyadabe, laga bialu hene. 21 I̱na hale halu hewaria dindi bibahende Isaraele wali agaliru pu heagoha wali agali hearume bi urunidagua lalu heago ai bi layaruni aleme i̱naga mini bayale tigabiorego tigua mo dindiha halu helaga binigo mitangi bialu i̱ genda yu harugoni.

22 Anigo í̠na Isaraele wali agali bu karuhondo bi ogodagua lamibe. Anduane Homogo Bibahende Haru Haame Ho Haga kogo i̱nime bi ogodagua larogo bayuwa hale halimu. Isaraele wali agali tigua mana ko bialu kamigo hondowa wali agali taratara hearume i̱naga mini bayale tigabi mo nagalone halu kagoni. Ani bialu kago i̱na mbira bule ngogo Isaraele wali agali tí mitangi bialu ndo i̱naga mini bayale tigabi tígua mo dindiha harimigo i̱ni miniore ogoni mitangi bialu mo yaraga helonaga bulebero. 23 Ani berogome wali agali taratara uruni tihondo i̱naga mini bayale tigabiore kogo manda bilo walia holebero. Ani walia harogola tigua i̱naga mini ogoniore yaraga holebira. Isaraele wali agali tígua mana ko bialu i̱ mini mo dindiha halu mo nagalone harimigo mani i̱na mini bayale tigabibi biabe hongoheru berogobi hondowa wali agali taratara karume i̱ Anduane Homogoore henedalo manda bulebira. Ai bi ogoni Anduane Homogo Bibahende Haru Haame Ho Haga kogome larogoni. 24 I̱na tíhondo urudagua bulego tí dindi tarataraha ho giligalalo kamiruni tíninaga dindini halimulo haru dai biai holebero.✡Ais 43.5-6, Ese 34.13, 37.21 25 Haru dai bu helowa i̱na iba gagaheoreme tí dodo mbira para nahe halimulo dodo doma holebero. Tígua mana ko ngubi ngaru bialu harimirubi mbirale gime wabiniruhondo bi pupu wialu harimirubi wahai howa i̱naga deni tí dodo mbira para nahe domeneore halimulo ani bu helolebero. 26 Ani buwa mini ala tawe mo wahai halu mini gahenge wia aribia howa helolebero. I̱na tínaga mini ege to̱le̱ giambehe ale ala winigo mo wahalu mini gahenge i̱na bia larodagua bilimulonaga wia aribia helolebero.✡Seg 7.12 27 Ani buwa i̱naga Dinini tínaga bu miniha haabo helo helolebero. Ani helowa tígua i̱naga bi mana ngaru talialu bialu halimulo i̱na tínaga bu mini mo heya holebero. 28 Ani berogola dindi i̱na bamba tínaga mamaliruhondo mirugoria daibu holeberemi. Ani daibu kamigola i̱ tínaga Ngode Datagaliwabeore holebero. Tí nde i̱naga wali agaliore holeberemi.✡Ese 11.19-20 29-30 Ani kamigola i̱na tí biamogo bialu kogola tígua mana ko dodohe ngaru lone nabuleberemi. Ani beremigola tínaga mabu ngamiruha tomo bayaleru anda hai helolebero. Ira lini daga ale karume dewaore dolebira. Ani dedagola tígua tomo nolene mbira tumagi nahe kamigo hondowa wali agali tara tara karume tí mege nabulebira.✡Ese 11.20, 37.14 31 Ani howa tígua abale mana ko ngubi bialu harimiru mitangibu dai buwa, Iname koorene ko bialu harimadago, lalu tíni taga timbuniore halu holeberemi. 32 Ai Isaraele wali agaliru-o Anduane Homogo Bibahende Haru Haame Ho Haga kogome i̱na bi ogo larogo baya hangu hale hadaba. I̱na mbirale bigi bule ngogo tí biamogo bialu bayale halimulonaga ndo bulebero. Tínime ko bialu harimiru bibahende mitangi bialu taga timbuni halimulonaga bulebero, lalu lene.

33 Anduane Homogo Bibahende Haru Haame Ho Haga kogo i̱nime bi ogodagua laro. I̱na tínaga ko birimigo domo waharogola tí bayale dodo nahe howa nde tínaga waitigirume abale tínaga mabu anda paberu bo gialo wahalu labu hayaru daibu howa lone biadai bilimulo helolebero. 34 Agali tara marume ibaga bialu howa handalu heria tínaga dindi embera ibai heneyane handayagoni. Anigo ai i̱na tínaga maburu lone hangadaba lolebero. 35 Ani berogola dindi tarali karume ogodagua lolebira. Abale dindi ogo ko embera labu hene wiyago ai nde áyu bayaleore Idene mabu ale hayada, lolebira. Abale tano uruni gialo bagabu wahene wiyago ai áyu Isaraele wali agali tinaga tano biaruni pabe hongoheore lone bu yu mabu biyada. Isaraele wali agali ti tano uruniha lone daibu hayada, lolebira. 36 Ai Isaraele wali agali tí tíninaga dindini daibu kamigo hondowa wali agali maru tí kamigoha mandagi hapara ho karume manda bialu Anduane Homogo i̱nime tano uruni bo gialo wahayago lone biadai bialu mabu embera labuore wiyaru lone hangadai biyada, lolebira. Anduane Homogo i̱nime aniore bule lo wirugo buleorebero, lene.

37 Anduane Homogo Bibahende Haru Haame Ho Haga kogo i̱nime bi ogodagua laro. Ainde i̱naga Isaraele wali agalirume i̱hondo ina biamogo bia larimiyagua i̱na tínaga bi laramigo hale howa tínaga waneiginiru nogo sibi haradagua mo dewa ho helolebero. 38 Ani berogola nogo sibi ale dewaore halu horo i̱nime wiabagi helenengi Yarusalemeni i̱nihondo bo lomabu delole haru ibiraligobi tí holeberemi. Ani howa tínaga tano lone biadai bini biaruha wali agali dewaore palu to̱lolebira. Ai urunidagua heneneore tagira ibai haragola tígua Anduane Homogo i̱niore henedalo manda buleberemi, laya lalu Esegielehanda lene.