Pigane Binigo
Mbuga ogoha gilibu ngarunaga nemandi ogo
Mbuga ogome mbirale bibahende pigane tehinalu wabu helenegonaga bi leda. Haribi dindibi bibahende uruniha karubi ngarubi wali agali pigane tehinalu wabu helenegobi mana ko ngarubi genda tandaga ngarubi pigane tehinaga binirunaga bi lo nga. Ngode Datagaliwabe ibunime wali agali baba biabe bayale ogodagua bule lowa hariga mo tigabu ngelenerunagabi agua bulebero laya lalu lo ngeleda.
Be 1–11 Hobane uruniha howa Ngode Datagaliwabehanda dindi harila pigane wabinigonaga bi te gilibu wialu bambaore wali agali dindi ogoria pigane wabu helenegonaga lo nga. Bi te ogoniha Adama Ibala henegonaga bi tebi Keni Abelela henegonaga bi tebi gilibu nga. Hobane ogoniha dege Noa henegonaga bi tebi iba li timbuniore ibalu wali agalirubi mbirale bibahende wiarubi iba li ogonime bo hilu wahenegonaga bi te lo wialu mbirabi Noa aguanerume Babele anda timbuni bugimbu bu migi bima iraga henegonaga gilibu wigi bida.
Be 12–50 Hobane uruniha howa Isaraele hameigininaga mamali hama ibiniru ogodagua hene lalu lo nga. Tinaga mamali piganeore Abarahama hene. Abarahama ibuore agali bayale Ngode Datagaliwabehanda hame ledadagua bialu howa wali agali maninaga mini mbiraore wialu holebiragonaga manane ibunini walia halu ogobi holene nga lalu ibunime bu walia henerunaga mo walia halu te lo nga. Hobane ogoniha dege Abarahama igini Aisaganaga bi tebi Aisaga igini Yagabanagabi Yagaba igini homberia (12) henerunagabi bi te gilibu nga. Yagabanaga mini mende Isaraele winigo ai Isaraele hameigini áyu homberia (12) biarunaga aguanali ka. Bi te dewa luore Yagaba igini Yosebenaga garealo nga. Be hobane ogoniha howa Isaraele wali agali Iyibi dindiha pu henedagoni ogodagua bialu pu hene lalu mo walia halu gilibu nga.
Wali agali dewalime ogoale bini lalubi bi marubi ogodagua lene lowabi gilibu wigi bidago ainde uruni arianaga lalu dege bi dunini lo ngago Ngode Datagaliwabehanda mbirale bibahende binirunaga nga. Pigane howa ibugua wabiniru bayale dege wabu helearia mani howa wali agalirume mana ko wiaru tongo hinalu bini. Noanaga bi te ledagoha Noa ibu hangu agali tigabi heagola Ngode Datagaliwabehanda ibu ani dabalu helowa hene. Mani howa ibugua Abarahama dabalu ibuhondo lamialu, I̱na í̠ mo bayale howa biamogo bialu í̠ waneigini aguanerubi biamogo biaabo holebero, lene. Mbugu ogo ibugua Ngode Datagaliwabe ibunibi wali agali kamarunaga abaore kago howa wali agali mana ko biaga karu pani mialu mana tigabi bayale ngaru bialu ibuni andaneha haga karu ibugua dara halu bayale helo biamogo bialu haga kagoni lalu gilibu nga. Bi dunini mbira mbuga ogoha ledagome mo walia kago wali agali bamba henerume mini mbiraore hongohe wu howa yu tiga bialu henedagua wali agali áyu kamarumebi nde bi te ogoni daga lowa tale bialu o binidarunidagua yu tiga bialu mini mbiraore hongo howa wu holene nga lalu mo walia ka.
Bu̱lu̱ baga buwa kuni gilibu ngago
1.1–2.25
Piganengi Ngode Datagaliwabe ibugua bibahende wabinigo 3.1-24
Ko bulenebi tandaga nolenebi anda ibinigo 4.1–5.32
Adama howa hama ibalu Noa henego 6.1–10.32
Noa howa iba li ibinigo 11.1-9
Babele anda bima iraga helo bialu henego 11.10-32
Seme howa hama ibalu Abarama henego 12.1–35.29
Abarahama Aisaga Yagaba imaru henego 36.1-43
Iso ibu damene hama ibinigo 37.1–45.28
Yosebe ibu hamenerubi henego 46.1–50.26
Yagaba ibu damene heba Iyibi dindi penego
1
Ngode Datagaliwabehanda bibahendeore wabiai henego ogo
1 Bamba piganengiore Ngode Datagaliwabehanda dindi haribi wabialu uruni karu ngarubi bibahendeore wabiai hene.✡Ais 44.24, Yo 1.1, 1.3, Hi 1.10 2 Anigo dindini áyu ngagobi ndo mbiraleru nahe tara mbira wini. Aruma holeneme iba timbuni bereago dambi haiho wiagola Ngode Datagaliwabenaga Dinini ibu ibani yuluyu pu íbu bialu hene. 3 Ai Ngode Datagaliwabehanda lalu, Wá ha layagola wá hene.✡2 Ko 4.6 4 Wá hayago hondowa Ngode Datagaliwabe ibugua bayaleoreyane hendene. Ani hondowa aruma holene wá holenela mo tuwia hene. 5 Ani buwa aruma hayago mbiraga lalu wá hayago horo lalu mini wini. Mbiraga piai halu ega bi layagola horo mbira pigane ogoni hene.
6-7 Mani Ngode Datagaliwabehanda lalu, Iba halu kirani berelo tubari mbira íbu ha layagola tubari ogoni hene. Ibugua iba hari daligaha biralu dindihabi berelo lowa tubari ogoni wini.✡2 Pi 3.5 8 Ani buwa hanuni tubari wiyadagoni hari mini wini. Mbiraga piai halu ega bi layagola horo mende ogoni hene. 9 Ani heagola mani Ngode Datagaliwabehanda lalu, Dindi yobi pani helo iba dindiha bedamiruni mbiraoreha hangu birumogo bidaba, lene. Ani layagola dindi yobi pani hene. 10 Dindi yobi pani hayago Ngode Datagaliwabehanda dindi mini wini. Ani bialu iba mbiraoreha birumogo biyagola ibugua iba solowara mini wini. Ani buwa Ngode Datagaliwabe ibunime o biyaruni bibahende bayaleoreyane hendene. 11 Ani hondowa ibugua lalu, Ai dindini ira dataniru tomo nolene alerubi bibahende anda hai ha, layagola 12 bibahende ira datani tomo nolene alerubi anda hai hene. Ngode Datagaliwabe ibugua mbirale uruni bibahende ani anda hai hayago bayaleoreyane hendene. 13 Mbiraga piai halu ega bi layagola horo tebone ogoni hene.
14 Mani howa Ngode Datagaliwabe ibugua lalu, Harini wá holene aleru hadaba, lene. Ani lowa ibugua mbi horola tu wuleneru horo malirunaga pongo yuleneru wigi bilonaga helene. 15 Ani bialu nde harini howa wá haragome dindiha wá hadali helobi ani hadaba layagola wá holene ale harini hene. 16 Ibugua wá holene timbuni kira harini helene. Horongi wá timbuni hondo helonaga ni helalu mbiraga wá emene hondo helonaga ege helowa yapibiyarubi hela dege bini. 17-18 Uruni bibahande tigua harini howa dindiha wá hadali helonaga Ngode Datagaliwabehanda helene. Ani helowa horongibi mbiragabi wá haame helonaga horo mbila mo tu wia hene. Ibugua uruni bibahende ani hai heagola bayaleoreyane hendene. 19 Mbiraga piai halu ega bi layagola horo mane ogoni hene.
20 Mani Ngode Datagaliwabehanda lalu, Ai iba solowaraha buhe̱ lagaru bibahende birai helo. Ani bialu egaru harini yagalo yu ibaga bulene biralu bilo, lene. 21 Ani lowa ibugua, Iba wena timbuniru nogombi timbunirubi buhe̱ laga emene marubi bibahende iba solowaraha biralu egarubi nde yagalo yu ibaga bule biradaba, layadagua birai hayago Ngode Datagaliwabehanda bayaleoreyane hendene. 22 Ani bereagola ibugua ti mo hongo halu lalu, Ibaha biraga bedamiru tígua hono dame bialu ibaha biru to̱lalimu. Egaru tíguabi nde dindi bibahendeha ega birai hole hono dame bialu biralimu, lene. 23 Mbiraga piai halu ega bi layagola horo dauni ogoni hene.
24 Maha Ngode Datagaliwabehanda lalu, Ai dindiha howa buhe̱wi tara tara dewaore birulene nga. Buhe̱wi uruni andaga hinu holenebi tayandaha minana birulenerubi bibahende emene timbunibi birai hadaba, layagola ani birai hene. 25 Ibugua buhe̱wi andagaha hinu holenerubi tayandaha gabua yamo minana birulenebi bibahende hadaba layadagua naina íbu hai heagola ibuni bayaleoreyane hendene.
26 Lone mani Ngode Datagaliwabe ibugua lalu, Áyu inane ale helonaga wali agali wabimi̱ya. Libugua buhe̱wi tara tara irabuha bedarubi andagani hinini bedarubi ibaha wena bedarubi dindi bibahendebi handaya ho helo wali agalila wabu helami̱ya, lene.✡Pig 5.1, 9.6, Yob 4.17, Iba 100.3, 1 Ko 11.7, Eb 4.24 27 Ani lowa Ngode Datagaliwabehanda wali agali wabu heleagola libubi ibuni ale dege ona hene. Ibugua walibi agalibi wabu helene.✡Md 19.4, Mg 10.6✡Pig 5.1-2 28 Ani hebigola Ngode Datagaliwabehanda libu mo hongo halu bi bayale mbira ogodagua lamini. Ibugua lalu, Dindi bibahende ngaruha wali agali hai howa dindini ngaru baya hangu handaya ho hai helo waneigini hono wialu halibu. I̱na ega bedaru ibaha wena bedarubi dindini buhe̱wi timbuni emene bedarubi uruni bibahende libugua haru hai halibulo ngerogoni. 29 Libu nalibulo ira lini daganeru tani lini daganeru i̱na libu ngerogo tomo uruni nalu halibu. 30 Anigo ai nogo egarubi buhe̱wi tara tara bedaru ti datani yuni bu karuni nalu helo merogoni, lene. Ai henene Ngode Datagaliwabehanda layagodagua aniore bini. 31 Ibunime handalu hearia mbirale bibahende bayaleoreyane hendene. Mbiraga piai halu ega bi layagola ogoni horo waragane hene.