1 Holoberenese ibugua Yudidihondo lamialu lalu, Wali-o í̠ mini burugu lolene nawi. Í̠ gi holenebi nawi. Wali agali Kini Nebugadenesa dindi bibahendenaga kini timbuni handame ho bedago andaneha holeore lalu anda ibiyaru aria mbiraoreli hangu halu mbiraorebi i̱na uruni mo ko halu bo wa naharuli. 2 Ani bialu í̠ damene uyu hari bareha paluyu pedaru tigua i̱hondo erembira nangidale nde i̱na ti baba wai nabidole. Anigo ai tinime bia ko haya. 3 Anigo í̠na ti helalu í̠ pora bialu ibida ina hemaria ibiridago irane agibe. Í̠ ibiridago bayale biridago ani ibiridagome í̠ni bayale biruleberego í̠ gi nahabe. Áyu mbiraga ogoni howa mani birama poleberegoha í̠ mo ko naholebira. 4 Agali o karu bibahendeme wali agali í̠naga agali haguane Kini Nebugadenesanaga bi hale halu ibu andaneha karu baya hangu handaya ho hagadagua í̠ baya hangu handaya ho holebira, lalu Holoberenesehanda Yudidi lamini.

5 Ani layagola Yudidihanda ladai bialu lalu, Aiore agali haguane-o i wali í̠naga biabe bia haga bedogoni. I̱ bi maru lolene karulapebe. Ai mbiraga kamangi i̱naga agali haguane kagohondo ke halu bi nalolebero. Anidagua bulene nawiore. 6 I̱na bi loleberogo í̠na hale halu biriyagua nde Ngode Datagaliwabehanda í̠naga giha howa biabe timbuni tara bulebira. Mbirale í̠naga agali haguane ibugua bulene ngago mbiralime mo habo nalolebira. Ibugua birago tigabi dege piaho wulebira.*Yudidihanda lalu, Mbirale i̱naga haguane ibugua birago tigabi dege bulebira, layago Ngode Datagaliwabe manda bialu lowa lene. Anigo Yudidi ibu bi lalu howa Holoberenese ibu manda bialu larabe toba helonaga lene. Anidagua dege hobane 16 howabi ogonidagua leda. Ai mbirale timbuniore ledago Yudidi ibugua Ngode Datagaliwabehanda bulebirago laragoyu ai Holoberenese ibugua Yudidihanda bi larago ibuhondo larua lo manda bu henego manda bia ko hene. 7 I̱na heneneore gi dolalu Nebugadenesa ibu dindi bibahendenaga kini howa agali haguanebi ibuore howa ibugua dindi bibahendeha pialu wali agali baya hangu helo tigua mo tiga bule pudaba layadago ibunaga mini lalu larogo Holoberenese í̠na biabe timbuniore birigome wali agali hangu ndo dindini ema bialu piaga bibahendebi ega bedarubi bibahendeore ibunaga hongo timbuni ngago andaneha hai ka.✡Yar 27.6, Dan 2.38 8 Iname abale hale harimago í̠ agali manda bayaleorebibi mini bayalewibi mbira ke laya. Wali agali dindi tarani haga haga bidaru bibahendeoreme manda biai kago Asiria dindiha í̠ biabe beregome bu bolangua holenebi manda timbuni bolangua henebi wai puwa bo podahana halu wayali holenebi í̠ ale mende nahe layane hale hai harima. 9 Ani bialu Agio ibugua í̠hondo bi maru layayago ina hale hai harima. Beduliali hearubi tigua ibu bo wanahe heleagola ibugua bi í̠hondo langiniyaru bibahende layane hale hai harima.✡Yud 5.21 10 Agali haguane-o ibugua bi langiyago mo wanahabe. Ibugua bi ogoni heneneore layago í̠naga miniha yu haabo habe. Inanaga wali agali bu karu tigua Ngode Datagaliwabenaga deni howa ti mana ko mbira nabi heagua nde ti ayu tibu nene gadele ngagome nadibulebira. Ani bialu tiha mo ko holenebi nawulebira.

11 Anigo i̱naga agali haguane-o í̠naga biabe bulene ngago bia ko halu ibira holobadalo manda nabibe. Mana kome Isaraele wali agali dariba hene kagome tiha mo ko halu homoleneore nga. Tigua mana ko ngaru damene bialu kagome Ngode Datagaliwabenaga bu miniha tandaga nolene ngago mo yu anda ibaga. 12 Áyu dege tinaga tomo nalu holene ndia halu ibabi nai habehe nga. Ani biyagola ai tinaga nogo bulumaga karu bo nai halu tomo maru Ngode Datagaliwabehanda nolene nawi leneru balu nai hole ka. 13 Ani bialu tigua tinaga mabuha widi pigane boga bini dedarubi waini ibabi olibe lini ibanebi Anduane Homogohanda ibunagaore leneru tini nole lalu bi lo mbira hai haya. Tomo uruni agali loma binigo mo miaga Yarusalemeni Anduane Homogonaga tano loma biaho helene biagoria biabe bialu karu tinaga wiaga wini. Tomo uruni agali mendeme ela nahaga loma biahowa wiabagi hene wiaga nga.✡Har 23.19, LBM 27.30 14 Anigo ainde tigua tomo ogoni narama lalu agali maru bi yalu ganisolo agali Yarusalemeni hearu lamule pudaba laya. Wali agali Yarusalemeni hearu tiguabi nde ogonidagua dege biya. 15 Ainde ganisolo agali Yarusaleme karu tigua karulapego nalimu lalu ladai biragola tigua tomo ogoni nayayagua nde horo ogoningiore Ngode Datagaliwabehanda ti í̠naga giha mo ya haragola í̠na ti bo wahaiore holebere. 16 Ai i̱ wali í̠naga biabe biaga i̱na bi ogoni hale halu i̱na ti yu wahai halu ibida pora bialu ibiru. Ngode Datagaliwabehanda í̠ mbirale timbuniore mbira iyane buleberebago ogoni dindi bibahendeha wali agali bu karume hale hai holebira. Ani hale howa ti mogo timbuni lolebirago ai i̱na mbirale timbuni ogoni buliya Ngode Datagaliwabehanda ibilaya. 17 I̱ í̠naga biabe biaga biruwa Ngode Datagaliwabe dahuliya andaga kagonaga bi hale haga bedo. Ani biruwa horo bibahendengibi mbiraga bibahendengibi ibunaga mini yaraga halu biraga bedo. Agali haguane-o horo bibahende i̱ í̠la biraabo howa mbiraga i̱ unu dindi ulini tigabi ngagoha Ngode Datagaliwabenaga mini yaraga hole pugu bulebero. Ani berogola Ngode Datagaliwabe ibugua Isaraele wali agalime ko ogongi biya lalu i̱ langulebira. 18 Ibu bi langirago hale howa í̠ langerogola í̠na í̠naga ami agali bu karu haru halu puwa wai beregola í̠ hapai halu í̠la wai bulene Isaraeleali mbira naholebira. 19 Í̠ Yarusaleme pobelonaga hariga Yudia dindiha pedadagua pialu pobelo i̱na hariga walia holebero. Ani bialu tano í̠ karulalu í̠ kini halu Yarusaleme tano dombeneha birulebere. Ani bialu í̠na wali agali uruni nogo sibi haru haga nahe yu wahalu pene haru haradagua haru kegola biango ko karume í̠hondo du̱a nalolebira. Bambaore howa mbirale uruni bulebira lalu Ngode Datagaliwabehanda i̱hondo langiyagola i̱ manda bu berene. Ai áyu Ngode Datagaliwabehanda í̠ lamule pu laya, lene.

20 Yudidihanda bi layagome Holoberenese mo turu halu agali bu hearu bibahende mo turu hai hayagola tigua wali ogoninaga mini baya taraore winiyago hondowa ti mogo timbuni lo hene. Tigua lalu, 21 Dindi amu ni tagira ibiragoha howa pialu ni paliragoha wali ogobi mbira berearia handa nabirima. Ibunaga dengui baya taraore mbirani ibunaga manda ngagobi wali maru bedarunaga manda ngago bolangua heneda, lene.

22 Ai Holoberenese ibugua Yudidihondo lalu, Bayaleore Ngode Datagaliwabehanda í̠naga wali agaliru helalu í̠ ala ibilayada. Áyu i̱na hongoheore howa wali agali i̱naga agali timbuni Nebugadenesa mege biaga karu tiha mo ko holene ngago ngola holebira. 23 Ainde í̠ wali baya taraore mbira bedegoni. Í̠naga dengui baya burugule mbirani bi í̠na larigobi dendebioreda. Mbirale í̠na bule lariruni biai hariyagua nde í̠naga Ngode Datagaliwabe kago ibu i̱naga Ngode Datagaliwabe holebira. Ani bialu í̠ni Nebugadenesa andaga pu bedegola í̠naga mini dindi bibahende ngaruha hale hayago lalu mini lene birulebere, lalu lene.