Loma Binigo
Mo Miaganaga Biabe
Mbuga ogoha gilibu ngarunaga nemandi ogo
Mbuga ogoniha bi lo ngago, Anduane Homogonaga mini agua yaraga halimu, lalu, Mbirale mbira mo ko haragola mo tiga bialu agua bilimu, lalu lamigi biniru te lo nga. Loma binigo mo miaga agali tigua ogodaguaore bilimu lalu mana laminiru te lo nga. Mbuga ogoninaga bi irane galone lo ngago uru lo nga. Anduane Homogo ibu mini baya burugule wáhe taraore ka. Ani howa ibunaga wali agalibi mini baya burugule wáhe taraore Anduane Homogo ibuni kagobi howa ibu heba mandagi habehe kami lo nga.
Mbuga ogoninaga dunini Yasuhanda mitangi bialu 19.18 lo ngagoria howa lalu, Mana duniniore mende ogo í̠ni mitangi bialu gubalini ho harilidagua maru karu tanabi mitangi bialu gubalini ho habe, lene. Md 22.39, Mg 12.31 de handabe.
Bu̱lu̱ baga buwa kuni gilibu ngago (1.1–7.38)
Mbirale Anduane Homogo ibuhondo mulenebi tini ko domelo irani bo delolenebi mana agua bilimu lenego 8.1–10.20
Aronobi ibunaga iginirubi heba ti loma binigo mo miaga howa biabe bilo lalu dabo helenego 11.1–15.33
Anduane Homogonaga deni howa mana bayalebi kobi ogobi lo nga. Ani buwa ibu deni howa mana ko dodohego domelo agua bilimu lenego 16.1-34
Ko domo waholene horo haragola agua bilimu lenego 17.1–27.34
Anduane Homogo mitangi bialu mo dunini howa lotu lole agua bilimu lenego, Tínibi ko mbira para nahe mini baya burugule wáhe taraore hole agua bilimu, lalu mana gilibu nga.
1
Anduane Homogo ibuninaga Balai Anda biagoha howa ibugua Mosese olalu íbu lowa lalu, Isaraele wali agaliruhondo ogodagua lamibe. Tí kamiru aria mbirago ibu Anduane Homogohondo nogo lomabu mule ibuleyagua nde ibunaga bulumagayaguabi sibiyaguabi memeyaguabi mbira hangu haru ibalimu, lene.
Irame dai helo bo lomabu delolenego ogo
Mosese ibugua Anduane Homogohanda lamibe layadagua lalu, Agali mbirame nogo bulumaga mbira irame dai helo bo lomabu delole lowa haru halu ibiyagua nde bulumaga wangabe habatigiore tingini mo ko nahe dere durubi nabiore kago haru ibulene nga. Mbirali lomabu yalu ibirago ibuhondo Anduane Homogohanda turu helo hame ledayagua nde ibugua loma ogonidagua bu yalu ibulene nga. Ibugua Anduane Homogonaga Balai Anda kago haneni yu pialu bulumaganaga haguaneni gi wialu biragola Anduane Homogohanda ibuhondo miniha dungulo howa ibunaga ko wiyadaru domo wahai holebira. Ani bialu Anduane Homogonaga deni howa agali loma haru ibiyago ibunime bulumaga biago baragola Arono aria loma binigo mo miaga agali karu tigua bulumaga ogoninaga darama Anduane Homogohondo lomabu mulebira. Tigua darama hambu yalu lomabu delaga dabu Balai Anda kago haneni puwa dabu gibuni maria ngagoha odo baamu nana bulebira. Ani bidagola agali ogoni ibugua bulumaga biagonaga dongone bo lagalalu mbirini podobaga bulebira. 7-9 Ani bialu nogo tini baya hangu halialu gi geru wayawaya biai holene nga. Ani biragola loma binigo mo miaga agali karu tigua lomabu delaga dabu biagoria ira dene hedo delolene nga. Ani delowa ira da timbu kagola bulumaga biagonaga haguanebi abenebi habanebi nogo bo podo paya biyago damene bibahende irani dai halu do ira punga helo delolene nga. Anidagua biragola Anduane Homogohanda loma ogoninaga tumutumu nga bayaleore birago nga halu ibuni miniha turu timbuni howa dungulo holebirago ani bulene nga, lalu Mosesehanda lene. Ese 20.28, 20.41, 2 Ko 2.15, Eb 5.2
10 Mbiralime nogo sibi memeru mbirago loma bialu bo delole haru ibiyagua nde sibiyaguabi memeyaguabi ogoni wangabego hondowa dere durubi nabi bayale kago hondowa haru ibulene nga. 11 Ani haru halu ibuwa ibugua sibibi memebi ogoni lomabu delaga dabu kagonaga abene uyurayagi howa ogoriani bolene nga. Ani bope kagola loma binigo mo miaga agali karu tigua sibibi memebi ogoninaga darama hambuwa lomabu delaga dabu kagonaga gibuni maria ngagoha odo baamu nana bulene nga. 12-13 Ani buwa agali ogoni ibugua sibi biago podowa tini baya hangu haluwa gi geru wayawaya bo wahai howa ngeledagola loma binigo mo miaga kagome lomabu delaga dabuni ira dedagoria sibi haguanebi abenebi habanebi bibahende delai holebira. Loma binigo mo miaga kagome irani dalu do ira punga helo lomabu delolebira. Anidagua biragola Anduane Homogohanda loma ogoninaga tumutumu bayaleore birago nga halu ibuni miniha turu timbuni howa dungulo holebirago ani bulene nga, lalu Mosesehanda lene.
14 Mbiralime ega Anduane Homogohondo lomabu mule minu yalu ibiyagua nde ega malibu ale bedago minu yalu loma binigo mo miaga agali kagohondo mule yalu polene nga. 15 Ani miragola loma binigo mo miaga agali kago ibugua ega biago mani yuwa yu tinditanda laragola ega homolebira. Homaragola haguane pundulo muwa lomabu delaga dabuni ira dedagoha lomabu delolene nga. Ani bialu ibugua ega darama lomabu delaga dabunaga lenelene ngagoha odope hai holebira. 16 Ani buwa ega nema yaga magini kagobi dugualu lomabu delaga dabu ngago abene ni tagira ibiragohayagi be ira punga hilo wiaga ngagoha bape holene nga. 17 Ani bialu ega ibuni loma binigo mo miaga agali kago ibugua babaganeni gi talebu yuwa minu dogaki holene nga. Ani bialu irani dalu do ira punga helo lomabu delolebira. Mana ogonidagua biragola Anduane Homogohanda loma ogoninaga tumutumu bayaleore birago nga halu ibu miniha turu timbuni howa dungulo holebirago ani bulene nga, lalu Mosesehanda lene.

1:7-9: Ese 20.28, 20.41, 2 Ko 2.15, Eb 5.2