1 Anduane Homogo Hongo Haiheore kagome lalu, Horo mbira biago tagira ibirangi wali agali mineherubi ko biagarubi bibahende irame gambe aea daradagua do mundu lolebira. Horo ogoningi ti bibahende do munduore lalu mbiraligo yu wanaholebira. 2 Ani bulebirago ai i̱na bi larogo hale halu biaga kamigo tí i̱naga pele mulene hongome tíni nime daba haradagua daba halu ni doroneme mo dabi holene yu anda ibulebira. Ani birago hondowa ti nogo bulumaga igini hungubalua hara pai henego panga dugupe haragola turu howa a̱e̱a̱ ka̱e̱a̱ bu hagadagua holeberemi.✡Mal 3.16, Lg 1.78, Eb 5.14, 2 Pi 1.19, Mo 2.28 3 Horo mbiru i̱na tagira ibuwa biabe bulubodangi tígua wali agali ko biaga karu bope halu holeberemigo uruni tínaga ge habeme abalu hengedaradagua buleberemi, lene.

4 I̱naga biabe bia hagane Mosesehanda mana langigi biyago manda bilimu. I̱na Hari Sainaini howa mana lowinigobi bulene nabulenebi Isaraele wali agali tígua bilimulo Mosesehondo lamirugo ibugua tí langiyago baya hangu manda bilimu, lene.

5 Anduane Homogonaga Horo timbuni hiriribi ogoni tagira naibidaha bi mana latagi haga Elaya tí kamiria pu lolebero.✡Md 11.14, 17.10-13, Mg 9.11-13, Lg 1.17, Yo 1.21 6 Elaya ibugua ibuwa igini taribunilabi wane angibunilabi mandagi lone mo biamagaho helolebira. Ani mo biamaga nahe ngaore horo ogoni tagira ibiyagua tínaga dindi bibahende bo mburi lolene wuligonaga ala ani mo biamagaho helolebira, lene.✡Ais 11.4, Seg 5.3, 14.12, Lg 1.17, Mo 19.15