Madiu
Madiuhanda Bi Mana Debene gili binigo ogo
Mbuga ogoha gilibu ngarunaga nemandi ogo
Bi Mana Debene Madiunaga mbugani gilibu wini ngagoha ogodagua leda. Habo Nalolene Bi Bamba lo wini ngagoria Ngode Datagaliwabehanda, Bulebero, lalubi, Ngulebero, lalubi lo wini ngago Yasuha howa lola hai hene. Yasu ibu Yu wali agali hangu pele mule ndo wali agali ta nabi bibahende pele ngule ibini.
Madiunaga mbugani bi gilibu ngagome pigane tenialu Merihanda Yasu taba henenegobi Yonehanda Yasu baboraya bia henegobi dama Heyolabeme Yasu ba hendenegobi gilibu nga. Yasuhanda Galilini howa bi mana lawai haga bima penegobi wali agali warago bo wiaru mo dabi haga bima penegobi gilibu nga. Yasu ibu Galili dindi yu wahalu ibaga bialu pialu Yarusaleme anda penegobi Sarere mbirani bialu henegobi ibu homo aribia hayagola Ngode Datagaliwabehanda ibu mo heya henegobi uruni gilibu nga. Bi Mana Debene ogonime Yasu ibu lawai haga timbuniore henego ka walia ho nga. Yasuhanda Ngode Datagali wabe Bi Mana lowini ngago, Galone ogobi nga, lalubi Ngode Datagaliwabehanda Handame Ho Kagoria, Ogobi nga, lalubi hongo howa mo walia haga hene. Yasuhanda mana lawai henego Madiuhanda galone duria mo mogo bialu gilibu winigo uru.
Mbira
Yasuhanda dindi hari weagoria iraga ho biruwa wali agali Ngode Datagaliwabehanda Handame Ho Kagoria ho tene karu tinaga mini bayale wu holenebi biabe bulenebi bayale damenego karulolenebi mani Ngode Datagali wabe heba holenebi uruninaga lawai halu hene. Be 5–7
Mende
Yasu ibunaga talima piaga heneru ti biabe bule purogo lelo Yasuhanda tihondo, Ogodagua bilimu, lalu lo nga. Be 10
Tebone
Yasuhanda, Ngode Datagaliwabehanda Handame Ho Kagoria ogobi nga, lalu bi yobage dewa lalu hene. Be 13
Mane
Yasu talima henemane piaga karu ogobi holene nga, lalu lene. Be 18
Dauni
Yasuhanda horo ha maro bialu bulenebi Ngode Datagaliwabehanda Handame Ho Kagoria anda polenebi te lalu lo nga. Be 24–25
Bu̱lu̱ baga buwa kuni gilibu ngago
1.1–2.23
Yasu Kerisonaga mamali hama ibiniru dabane ogodagua hama ibini lalubi ibu taba henenegobi ngago 3.1-12
Baboraya biaga Yonehanda mana lawai halu henego 3.13–4.11
Yonehanda Yasu baboraya bia hayagola dama Heyolabeme Yasu bahendenego 4.12–18.35
Yasuhanda Galilini howa biabe tara tara bialu henego 19.1–20.34
Yasu ibu Galili howa Yarusaleme penego 21.1–27.66
Sarere mbirani Yasuhanda Yarusalemehayagi howa bialu henego 28.1-20
Yasu homowa ibuni heyu howa ha pani haga binigo
1
Yasu Keriso mamali hama ibiniru uru
(Lugu 3.23-28)
1 Mini gilibu ngaruni Yasu Keriso mamali hama ibinirunaga nga. Debidi ibu Abarahama aguanene henego Yasu Keriso ibubi Debidi aguanene hene.✡Pig 22.18, 1 Bit 17.11
2-5 Abarahama heneyangi howa handame haga kini maha Debidi henego dombeneha mamali heneru mini bimaga howa gilibu ngaru uru. Abarahama Aisaga Yagaba Yuda ibu hamenemabi hama ibini. Ti howa Perese Serala libu ai̱ya Tama berenego Heserono Lama Aminadaba Nasono Salamono Lahaba igini Boasa Obede Yasi Kini Debidi imaru uruni ti hama ibini.✡Pig 38.29-30, Lud 4.18-22
6-11 Debidi henego howa Isaraele wali agaliru Babilono dindini garabaya buwa ti uruni haru penego ogoningi mamali heneru bimaga howa mini gilibu ngaru uru. Debidi Solomono ibu ai̱ya Yuraia one ala berenego Lehoboama Abaya Asa Yihosabada Yihorama Usia Yodama Ahasa Hesegaia Manase Amono Yosaia Yahoiagini ibu hameneru uruni ti hama ibini.✡2 Sml 12.24✡1 Bit 3.10-16✡2 Kin 24.14-15, 1 Bit 3.15, 2 Bit 36.10, Yar 27.20
12-16 Isaraele wali agaliru Babilono dindini garabaya buwa ti haru penego howa Yasu taba henenengi mamali heneru lamaga howa tinaga mini gilibu ngaru uru. Yahoiagini Seadeli Serubabele Abiudu Eliagimu Asoro Sadogo Agimu Eliudu Eleasa Madana Yagaba Yosebe ibugua Yasu ai̱ya Meri dabu binigo Yasu ibu Mbirali Dabo Helenego ibulebira lowinigonaga mini winigo uruni tibi hama ibini.✡Esr 3.2
17 Mini uruni Abarahama henego howa Debidi henego lamaga howa de daba hene. Debidi howa Isaraele wali agaliru Babilono dindini garabaya buwa ti haru penego howa lamaga howa de daba hene. Ogoningi howa Mbirali Dabo Helenego ibulebira lowinigo ibu ibinigo howa lamaga halu de daba dege hene.
Merihanda Yasu Keriso taba henenego ogo
(Lugu 2.1-7)
18 Yasu Keriso ibu taba henenengi ogodagua bini. Ibu ai̱ya Meri Yosebe lawini biruwa Yosebehanda ibu dabu nabi berearia Ngode Datagali wabe Dinini ibugua gali wia hayago handa walia ho berene.✡Lg 1.27, 1.35 19 Yosebe ibu agali tigabi howa ibugua wali agali hearume Meri mo taga nahelo ibu ohowa Meri wahole lo manda bu hene.✡Man 24.1 20 Ani manda bu hearia ibu emaga handalu hearia Anduane Homogonaga dahuliyali mbira ha pani howa Yosebehondo bi lalu, Debidi aguanene Yosebe-o í̠na Meri í̠ one berelo dabu bule gi nahabe. Gali ibuha bedago Ngode Datagali wabe Dinini ibugua wia haya. Ibugua igiri mbira taba honolebira. 21 Maha igiri ogoni ibugua wali agali bibahendeme ko biyarunaga pele mialu domo wahai holebirago taba hanarangi í̠na ibu mini Yasu wibe, lalu lamini.✡Lg 1.31, 2.21, Ab 4.12, 13.23, 13.38
22 Ani biyagola ala Anduane Homogohanda ibunaga bi mana latagi haga mbira heagoha howa mbiwia henego lola hai hene. 23 Mbiwia henego ogo, Wandari mabuage mbirame agali nape berenego gali bere biruwa igiri taba honolebira. Igiri ogoni ibu mini Emanuele wulebira, lalu gilibu nga. Emanuele inanaga bi lalu, Ngode Datagali wabe ina heba kagoni.✡Ais 7.14
24 Anduane Homogo ibunaga dahuliyalime bi layadagua Yosebe de ngala halu puwa ibugua Meri dabu bini. 25 Dabu biyagola Merihanda igiri gali taba nahene howa ibu Yosebela mandagi nahe berene. Igiri taba hanayagola Yosebehanda igiri ogoni mini Yasu wini.✡Lg 2.7, 2.21