83
Ngode Datagaliwabehanda Isaraele wali agali baba waitigi karu bope helo bi lenego ogo
1 Ngode Datagaliwabe-o í̠naga ne ndibulo nahabe.
Í̠ore bi nale nahabe. Í̠ ema nabi nahabe.
2 Í̠ waitigi biarume í̠la wai bule kagoni de handa.
Agali í̠ handabe manga haga karume í̠hondo doga halu kagoni.
3 Tigua bira do howa í̠naga wali agali mo ko holenaga
ohowa ndindelalu kagoni.
Í̠naga wali agali uruni í̠na handayaho haga kego
mo ko hole miniha magoyu kagoni ndobe.
4 Tigua lalu, Isaraele wali agali bu karuni
mani holobadarume abogo hene lalu manda nabilo bo wahai hami̱ya, lalu ka.
5 Tigua ogonidagua bulenaga mini mo mbiraore ho ka.
Ti mandagiore howa í̠ bope hole kagoni.
6 Urunidagua bule haruaruni
Idomoalirubi Isimaelealirubi
Moabalirubi Hagarialirubi
7 Gebalailirubi Amonoalirubi
Amalegealirubi Pilidialirubi
Taialibi uruni bibahendeme í̠ bope hole kagoni.
8 Asiria wali agali tibi nde uruni baba hamagamagabu dege ka.
Hameigini hongohe uruni tigua Lode aguanene Amonoalibi Moabalibi
biamogo bule hamagamagabu ka.
9 Tigua anidagua bule kago í̠na uruni pani mialu✡Hgn 4.6-22, 7.1-23
bamba Midianalihondo biridaguabi
Sisera Yabinialilahondo Iba Kisono poragoria howa biridaguabi bialu
ti bo wahai habe.
10 Í̠na ogoningi Endoni tano howa agali bo wahai harigola
tinaga tingini dindini wu togo bialu ngu biai haya.
11 Tinaga ami agali haru haga bu karuhondo✡Hgn 7.25, 8.12
í̠na abale agali Orebe Sebelahondo biridagua bibe.
Tinaga agali haguane bu karuhondo í̠na Seba Salamunala bo waharidagua bo wahabe.
12 Agali uruni tigua lalu, Iname Ngode Datagaliwabenaga dindi ogo
inanaga dindi dege ngelo karulami̱ya, layago bo waharigoni.
13 I̱naga Ngode Datagaliwabe-o agali uruni bo purogo lelalu
be abalu taulotogo laradaguabi
puyabume widi aeane yuniru pu lo yu purogo laradaguabi
bialu bo taliatogo lelabe.
14 Irame irabu ngaru bo dai hagadaguabi
dindi hombeneni dangi bu karu bo dagadaguabi
15 agali o bu karuni ti gi halu ibida purogo lelo
í̠na iba dalu timbuni ibilalu
puyabu hongohe ti kagoha pelo pelabe.
16 Anduane Homogo-o tigua í̠naga hongo hondowa taga halu
í̠ni kegoha dai bilo í̠na ti bope hai habe.
17 Tigua í̠hondo gi timbuni ho haabo helo
í̠na ti bope habelo hamelo kogoni.
Tigua taga timbuni halu tini homade helo hameledogoni.
18 Í̠ni hanguore Anduane Homogo howa Daligaorene Daligabi kego manda bilobi✡Har 6.3, Iba 59.13, 92.8
í̠na dindi bibahendeha handameho howa
í̠ni hanguore heneda lomanda biai helobi
hame timbuni lo kogoni.