132
Anduane Homogonaga anda mitangi bialu ka̱i̱ lenego ogo
1 Anduane Homogo-o Debidihanda erekui biabe ndelaheore bialu hayagoni mitangi bialu
í̠na ibuore embeda holeni.
2 Anduane Homogo-o Debidi ibugua ogo ale buleore lalu
Isaraele wali agalinaga Ngode Datagaliwabe Hongo Gibihe kego í̠hondo bi lo wigi biyagoni
í̠na mitangi budai bibe.
3 Ibugua bi ogodagua lo wigi biyagoni.
I̱na i̱ andaga napolebero dagianibi u napaluebero.
4 Ha̱lo birabi mbirale mbirani malia howa paliabi nabulebero.
5 Isaraele wali agalinaga Ngode Datagaliwabe Hongo Gibihe kagonaga andaore mbira bu heore lolego buwa
Anduane Homogo ibu anda ogoniha kagola i̱ i̱ni andaga u palue polebero, lalu
Debidihanda bi uruni leanego mitangi bibe.
6 Anduane Homogonaga Habo Nalolene bi lo winigonaga Mbogoyi biagoni dindi ogoha nga lalu✡1 Sml 7.1-2, 1 Bit 13.5✡2 Bit 6.41-42
ina Bedelehemeni hemaria langiyane hale harima.
Mbogoyi biagoni Yarimu dindini wiaria handa walia harima.
7 Handa walia howa iname lalu, Ai Mbogoyi ogo mo yalu Anduane Homogonaga andani ma nalarami, larima.
Anduane Homogonaga biragane dagia ngagoria kaware hapara howa
ina bulu palialu ibunaga mini mo yaraga halu lotu lami̱ya ma, lalu larima.
8 Anduane Homogo-o í̠naga Mbogoyi biagoni heba í̠ninaga andani haabo hole íbu habe.
Mbogoyi ogonime Anduane Homogo í̠ hongo gibihe kego walia halu manane ogoni ngagoni.
9 Í̠naga loma binigo mo miaga agali karu tiguabi mana tigabi hangu bilo hameledo.
Í̠naga wali agali bu karume turuore gibi howa bi ladagadaga bilo hamelo kogoni.
10 Anduane Homogo-o í̠naga biabe bia haga Debidiore mitangi bibe.
Kini í̠nime dabene ogonihondo handa tara halu erembira muleni.
11 Anduane Homogo-o ala í̠na bi hongoheore mbira Debidihondo lo wiriyagoni pugua nabuleore kegoni.✡2 Sml 7.12-16, 1 Bit 17.11-14, Iba 89.4-5, Ab 2.30
Ala í̠na Debidihondo ogodagua lariyagoni,
Debidi í̠ni halu homedeha mani í̠ igini hararu aria mbirago kini í̠ pani ho aribia helo dabo helolebero, lariyagoni.
12 Í̠na Debidihondo laabo halu lalu,
Í̠naga igini hararume i̱na habo nalolene bi pongo bo wirudagua bialu
ogoale bilimu ogo ale nabilimu lalu lamerodagua biyagua nde
mani í̠naga aguane hararu ti iginime kini dege halu
í̠naga dagia í̠niha tagira pene degeme mia aribia haga bulebira, lalu lo wiriyagoni.
13 Anduane Homogohanda Saiono tano ibuninagaore helo ibunime dabene.
Ibu Saionooreni ho teneho hole hameleda.
14 Ibugua lalu, I̱ tano ogoriani haho wiaaboore holebero.
I̱na dindi ogoriani howa i̱ni kini howa haru holenaga dindi ogoni dabedo.
15 I̱na Saiono tanoni wali agali bu karu buru pada ale dewaore bu hombedo mulebero.
Ogoniha wali agali yagibano tomo noanoalo bu karu tibi tomo karulapeore nelo mulebero.
16 Saiononi loma binigo mo miaga karume
i̱naga wali agali gi mialu haru dai bulene biabe bayale bilo biamogo bulebero.
Saiononi wali agali bu karu ti turu halu iba gana lalu bi ladagadaga bu holebira.
17 I̱na dindi ogoriani howa Debidi ibuha howa tagira pene mbira kago
kini gibiorene gibi helo dabo helolebero.✡1 Kin 11.36
Kini ogoni lamu hale daabo hagadagua
ibugua wali agali handame holene ereba nahe wiaaboboore holebira.
18 Kini ogoninaga waitigi karu i̱na ti mo taga halu
taga pani timbuniore nelolebero.
Ai wali agali kini ogoni ibugua handayaho hene karu
i̱na ho timbu hama baya hama puabo helolebero, lalu
Anduane Homogohanda ani lene.