137
Isaraele wali agali dindi taraha garabaya pu howa tininaga dindi mitangi bialu iba gana darabi lenego ogo
1 Babilono dindini iba piyarunaga angeni ina bira bigi bu harima.✡Neh 1.4
Ogoriani biruwa nde inanenaga dindi Saionoore mitangi harima.
Iname dindi biago mitangiore harimadagua nde
daraore howa inane dindinaga duguore bu wia harima.
2 Iname inanaga ngida ga̱wa̱ hiliyularu iba angeni ira hiribi ale hearunaga maganeni derela ho ngelowa
ina labe manga biyagola nale bame biru wirima.
3 Agali ina garabaya biaga biarume inahondo lalu,
Tígua iba gana maru ina mo turu holenaga laga bidaba.
Tíninaga dindi Saionoore lalu ka̱i̱ laga bialu mbira ina hale holoma̱ya la handadaba, laga biya.
4 Ti ani laga biyagoyu ina dindi taraha garabaya pu howa
ina Anduane Homogonaga iba ganago bame laholo au bulebe.
Ani nabuleore ndobe.
5 Yarusaleme-o i̱na í̠ embeda haruyagua
o ngidaru lone aginaga bole ndodago nabolebero.
6 Yarusaleme-o i̱na í̠ embeda halu
i̱naga turu holene tene
Yarusaleme mitangi harogome tagira ibaga manda bidogobi heba embeda dege haruyagua
o i̱ iba gana lone mani nalolego i̱naga bi mo pu helabe laro.
7 Anduane Homogo-o Babilonoalime Yarusaleme bo gialo paya bialu bayangi
Edomoali ti wai Babilonoha anda puwa tigua bi laga biyagoore bayuwa mitangi bibe.
Tigua ogodagua laga biyagoni.
Weagua tira dindi hangu ibira helo bibahende bo gialo bagabu wahadaba, lalu
laga biyagoni í̠ hale harigoni.
8 Babilono-o bi o larogo hale habe.✡Mo 18.6
Í̠ nde bo mburi lolebirago lelo ani habe.
Í̠na inahondo koore birigonaga paipai mbirali ibugua í̠hondo bulebirago handabe.
Mbirali inanaga paipai bia haga kago ibu turu holene nga.
9 Agali inanaga wai puhaga haruago ibugua ibalu Babilono í̠naga waneigini emene hono yu hama pederuni yamuwa
ege to̱le̱ni embone tuguduki haga bulebirago ani bilo hono yu habe.