24
Mini gigabi wulenenaga ka̱i̱ lenego ogo
1 Mini gigabi wuleneme ibuninaga mini mo yaraga halu ibunaga wali agali bu kagoha ibu mini lene timbuni mbira holebira. 2 Isaraele wali agalibi dahuliyali hongo gibihe bu karubi ti bibahende Anduane Homogo Daligaore kagonaga deni mo ngoaiho kagola mini gigabi wulene ibugua ibunaga ne ha lowa ibugua turu holene bi lalu,
3 I̱ Anduane Homogo Daligaore kagonaga ne harigaha howa ibinigo ai i̱na dindi bibahendeore egerebagi ginu haguame dambi haradagua bido.
4 I̱ dindi bare ngagoha bedogo ai i̱naga kininaga biragane dagia daliga ginu hagua dege dombeneha nga.✡Har 33.9-10
5 I̱na dahuliya andaga ibaga biai halu iba solowara bedago andaneha hariga pedagoha piai hene ko.
6 Iba solowara bibahendebi dindi ngago bibahendebi wali agali dindi bibahendeha bu karubi dindi hobane tara tara ngaru bibahendebi i̱na handaya ho howa haru hai ko.
7 I̱ ha̱lo birulene mbira agoha ngabe hondolenaga i̱na uruni bibahendeha ibaga biai haruli. I̱ birulene dindi taya bialu ko.
8 Anduane Homogohanda mbirale bibahende wabiai hayangi ibugua i̱bi nde wabu helalu i̱ holiya ibugua i̱ dalu mbira wabu ngelene. Ani buwa ibugua i̱hondo langialu lalu, Í̠ anda Yagaba kagoha yagi bialu í̠ dindi Isaraele daluha podene hobane mbira mo wibe, laya.
9 Ibugua i̱ bamba bambaore wabinigo ainde i̱ lu haabobo bu haho wulebero.
10 I̱na ibunaga anda loma bihe kagoha biabe bialu haga howa i̱ dalu hari Saiono nene nga.
11 Anduane Homogohanda dindi i̱ ha̱lo biruliya tano ibuniore gubalini ho haga biago i̱ ngiyagola ai Yarusaleme tano i̱na haru howa handaya ho ka.
12 Ani howa ai i̱ wali agali mini lene bu hearu ti dege dombeneha bedo. Ai Anduane Homogo ibunime dindi ibuninagaore mo wiagoria ko.
13 Ai i̱ guru lu dege lalu Lebanono dindiha ira tamia karubi halu hari Hemono kagoha ira guraya alebi karubi kogoni.
14 Í̠ guru lu dege lalu Engedi dindiha pibi ayage kagobi halu baya dege lalu Yarigo dindiha dambe tara kagobi ko. Ani bialu i̱naga hongo timbuniore mabuha ira olibe bu karubi halu timbuninaga ira timbuni howa luni iba angeni hagagobi ko.
15 I̱naga baya taraore irabuha balawaya dedaru nga biagagobi ko. I̱ nga baya taraore bulene ira mini kasia dongoneme pauda wabini ngagobi howabi sinamonome pauda wabini nga biagagobibi pauda mini muwe nga biagagobibi nga bayaore balawaya mini galabanumume nga biagagobibi pauda mbirale tara mbirame wabini ngagobibi pauda ira mini balasama ibaneme wabini ira hagua nga bilo Ngode Datagaliwabe andagaha delaga ngagobibi ko.✡Har 30.22-28
16 Ira lini daga mini guyaboli ibu gene maganeru luore amura pu wahalu hongohe howa baya tara kagobi kogoni.
17-18 I̱ pu mbira mini gerebi irane kagonaga mane baya anda howa i̱na pabua bayale dewaore balu lini bayaleru do girigere ledagobi ko.*Ai mbuga alataweore gilibu wini ngagoha bi marubi hobane ogoniha gilibu wini nga. Bi ogoni ogodagua leda. I̱ mbirale bayale ngaru gubalini hagane ai̱ya bi larago hale hagane aiyabi bedo. Mbirale bayale ibilo malia ho holenenaga manda mana lo mo heya hagane i̱ kogoni. I̱ haluhe haabo haga kogome howa i̱na mbirale uruni Anduane Homogohanda ibu waneigini ibuni gubalini ho haga karu i̱na mo muliya hame lo ka, lenego gilibu nga
19 Wali agali i̱ hame lo kemiru i̱ni koria ibilimu. I̱ lini dedogo tí do nalu no karulapeore noleberemigo ibalimu.
20 I̱ mitangi bilimu. I̱ dende taraore mone taranaga ibane ngago bolangua henebi mbirale mo turu halu bame miaga ngogo baya taraore mone ibane mini hani bolangua hene ngo.
21 Wali agalime i̱ tomo ale nayagua dende taradane hondowa lone noa dege holebira. Ani bialu i̱ iba ale nayaguabi lone dege noa holebira.
22 Wali agali i̱naga bi hale halu kago ibuha taga holene nawulebira. Ani bialu wali agali i̱naga hongo heba biabe bialu haga kago ibu mana ko ngago nabulebira, laya lene.
Mini gigabi wulene ngago Anduane Homogonaga bi mana ngagobi dege ogo
23-24 Mbirale uruni Anduane Homogo Daligaore kagonaga habo nalolene bi gilibu wini mbuga ngagoha wiai hene nga. Bi ogoni damenego Mosesehanda ina Yagaba hameigini bu kemarume mo mana howa talialu holoma̱ya ngini.†Mbuga alatawe ngagoha bi maru hobane. Bi ogoni ogodagua leda. Ti Anduane Homogola haabo halu mandagiore haabo kemigola ibugua ti biamogo bialu mo hongo helo. Anduane Homogo Daligaore kago ibu hangu Ngode Datagaliwabe ka. Ti mo wialu haru dai bulene mendeali naheore. 25 Mabuha tomo ala hengene kago abale boga birangi iba Pisono biru to̱latagi halu pugu lalu piagadaguabi iba Taigirisi pedagoha iba hangu to̱latagi hagadaguabi mini gigabi wulene bi mana mbuga ngagoha gili bu wiai henego nga. 26 Iba Yuberedisiha iba to̱latagi kadaguabi widi lini gandulo yu mogobu wulene horongi iba Yodana ibame to̱latagi hagagobibi bi mana lo wini ngagome wali agaliha mini gigabi wulene bayale wu to̱latagi ka. 27 Bi maname wali agali baya hanguore lawai haragola, lawai harago nde baya gibi waholene hale ale lawai haga. Baya gibiore iba Gihono mabuha gerebi hengedago do wulene horongi iba biragagobi lawai haga.‡Iba maria Pisonobi Gihonobi Taigirisibi Yuberedisibi iba maria uruni dene mabuha howa dugutagi halu ibira. Te ogoni ibunaga mbuga mini Pigane Binibogo laga ngagoha be 2.10-13 ngago hondolene nga. Iba Yodana ibu Isaraele dindi ibu timbuni mbiraore ogoni hangu pedago leda.
28 Wali agali abale henedarume mini gigabi wulene bayale ngago baya hangu manda nabi henego ainde mani holobadaru tiguabi baya hangu manda nabulebira. 29 Mini gigabi wulene ngagonaga lawai hagane ngago timbuniore iba solowara bedaru bolangua hai halu iba kuyama unurahaore bedarubi bolangua haihe ngagome manda bibe naheore.
30 Agalime iba timbuni pedagoha howa iba emene mbira mabuha dadabu yu piagagobi i̱ kogoni. 31 Ani howa i̱na ogodagua laro. I̱na iba maru i̱ mabuha bedago aria maru hambuwa ira lini dedagoha odo ba holebere. Mabuha ibaga buwa dadabu yu anda ibinidagoni abaleore timbu halu iba solowara timbuni bedagobi holebira. 32 Ani bialu i̱na mbirale lawai harogome egerebagi ni dagagobi helalu i̱naga wá holene dindi bibahendeni piai helolebere. 33 Ani bialu i̱naga bi ogoni agali Anduane Homogonaga bi mana latagi halu mbiwia hagarume lawai hagadagua dege lai holebero. Anidagua berogola wali agali mani holobadaru tibi nde hale halu manda milo lawai holebero. 34 Heneneore i̱ni hangu manda bulenaga erekuibi bialu hene ndo i̱na wali agali manda bayale bule hame layaru bibahende biamogo bialu lawai holenaga bialu haru.
*24:17-18: Ai mbuga alataweore gilibu wini ngagoha bi marubi hobane ogoniha gilibu wini nga. Bi ogoni ogodagua leda. I̱ mbirale bayale ngaru gubalini hagane ai̱ya bi larago hale hagane aiyabi bedo. Mbirale bayale ibilo malia ho holenenaga manda mana lo mo heya hagane i̱ kogoni. I̱ haluhe haabo haga kogome howa i̱na mbirale uruni Anduane Homogohanda ibu waneigini ibuni gubalini ho haga karu i̱na mo muliya hame lo ka, lenego gilibu nga
†24:23-24: Mbuga alatawe ngagoha bi maru hobane. Bi ogoni ogodagua leda. Ti Anduane Homogola haabo halu mandagiore haabo kemigola ibugua ti biamogo bialu mo hongo helo. Anduane Homogo Daligaore kago ibu hangu Ngode Datagaliwabe ka. Ti mo wialu haru dai bulene mendeali naheore.
‡24:27: Iba maria Pisonobi Gihonobi Taigirisibi Yuberedisibi iba maria uruni dene mabuha howa dugutagi halu ibira. Te ogoni ibunaga mbuga mini Pigane Binibogo laga ngagoha be 2.10-13 ngago hondolene nga. Iba Yodana ibu Isaraele dindi ibu timbuni mbiraore ogoni hangu pedago leda.