1 Kidháblábtsik, u léꞌ ka chalpaytsik an alwaꞌ tʼilab xi tu tʼiltsámaltsik. Jechéꞌ jaꞌich an alwaꞌ tʼilab xa bachʼúmalichtsik ani jaꞌich xa óntsaltsik ka belaꞌ. 2 Aníl jeye, kʼal tin kwentakʼi jechéꞌ an alwaꞌ tʼilab, i loꞌodhichtsik. I loꞌodhichtsik max ka óntsi ka belaꞌ xowaꞌ tu tʼiltsámaltsik ani max yab i aniꞌ belmámadhkʼi.

3 Tin jidhtal, tu okʼtsitsik xowaꞌ nanáꞌ in okʼtsinék. Tu okʼtsitsik ke na Kristo chemech kʼal tin kwenta ni walab, jelt xan tin ulal an Tʼokat Dhuslab. 4 In ulal jeye an Tʼokat Dhuslab, ke jolyat ani ke tin óxláb a kʼítsá, ejech ti ít; 5 ke in xalkʼaꞌ tinbáꞌ abal ka chuꞌtat kʼal na Pedro ani tayíl abal ka chuꞌtat kʼal xi más an abatwáletsik. 6 Tayíl in xalkʼaꞌ tinbáꞌ abal ka chuꞌtat kʼal bóꞌ i boꞌ inik i kidháblábtsik jun kʼalélkʼi ani yán xi jachanꞌ an kidháblábtsik, xoꞌ bél kʼwajat ejattsik, por taltsik chemnekich. 7 Tayíl in xalkʼaꞌ tinbáꞌ abal ka chuꞌtat kʼal na Jakobo ani más tayíl abal ka chuꞌtat kʼal xi más an abatwáletsik.

8 Tin okʼontal, tam ti ejtal jechéꞌ in chuꞌúmalichtsik, in xalkʼaꞌ tinbáꞌ abal ku chuꞌu neye ani ku belaꞌ maske tayílich. Jelt xan ti jun i chakam xu waꞌchinal tam watʼenekich i kʼij. 9 Pos nanáꞌ jaꞌich xi más kuxlek kʼal an abatwáletsik ani nibal in tomnál kin bijyat tin abatwále, pos u atʼax tʼajtsámaltsik tʼajat xin beláltsik na Dios. 10 Por xoꞌ, u bajúmalich kin kʼwajay xan tin kʼwajat kʼal nin alwaꞌtalkʼi na Dios; ani an alwaꞌtaláb xi tin kóꞌontsi, yab jilkʼon jelti max yab xataꞌ in jalbíl. Nanáꞌ más in tʼójnék ké xi más an abatwáletsik; maske xowaꞌ u tʼajámal, yab kʼal nanáꞌkʼi u cháp tu tʼajámal, na Dios, xi kʼwajat kʼal nanáꞌ, jaꞌich nin tʼajámal kʼal nin alwaꞌtal. 11 Por yab yejat ki ódhaꞌ ti kwenta xitaꞌ tʼójnék, max nanáꞌ o jajáꞌtsik; xowaꞌ na uluts, jaꞌich ke i tʼilámal an alwaꞌ tʼilab ba tatáꞌtsik ani a belámalichtsik.

12 Por max wawáꞌ i okʼtsixnál ke na Kristo ejnek ti ít, ¿jantʼókʼi pé tám taltsik xi tatáꞌtsik in ulal abal yabich u ejel ti ít an chemélomtsik? 13 Pos max an chemélomtsik yabak u ejeltsik ti ít, yabichak jeye ejnek ti ít na Kristo. 14 Ani max na Kristo yab ejnek ti ít, u kalelich jelti max yab xataꞌ in jalbíl xowaꞌ i okʼtsixnál ani xowaꞌ a beláltsik jeye. 15 Max anchanꞌ, u kalelich tám yab tsubax xowaꞌ i okʼtsixnál kʼal tin kwenta xowaꞌ na Dios in tʼajám. Pos in ulal ke na Dios in ejdhámal ti ít na Kristo ani max yabich u ejel ti ít an chemélomtsik, u kalelich tám yab tsubax ke na Dios in ejdhámal ti ít na Kristo. 16 Max an chemélomtsik yabichak u ejel ti ít, nibal na Kristo yabichak ejnek ti ít; 17 ani max na Kristo yab ejnek ti ít, an belomtaláb xa koꞌoltsik yab xataꞌ in jalbíl, bélkʼi i walbidhtsik ta kʼwajat. 18 Ani max anchanꞌ, xi chemnekichtsik ani in belámal na Kristo, kʼibchonék jeye ti kʼwajattsik. 19 Max tokotkʼi tam techéꞌ u kʼwajat ejat ti koꞌol an aytsixtaláb ba na Kristo, más waꞌ chʼojontál i chuꞌbíl ké xi kʼeꞌettsik.

20 Por xowaꞌ támnék, jaꞌich ke na Kristo ejech ti ít tam ti chemdhá; Jajáꞌ jaꞌich na jidhtal xi ejech ti ít abal kin xalkʼaꞌ ke xi chemnektsik neꞌech ka ejech ti ít. Anchanꞌ, in junwalich jelti nin jidhtal walíl jun i tʼayabláb. 21 Pos anchanꞌ xan ti an chemlá kʼal tin kwentakʼi jun i inik ti tujey ban kʼayꞌlá, anchanꞌ jeye kʼal tin kwentakʼi jun i inik ti neꞌech ka ejech ti ít an chemélomtsik. 22 Anchanꞌ jelti ejtal xu kidhtaláb kʼal na Adán u chemel, anchanꞌ jeye, ejtal xu dhabalábichtsik kʼal na Kristo neꞌech ka ejdhá ti ít. 23 Neꞌech ka ejdhá an chemélomtsik xowkʼi tin lujyal ka ejdhá. Okʼox ejdhá na Kristo abal ka kʼwajay jelti nin jidhtal walíl jun i tʼayabláb; ani tayíl, tam ka tsích na Kristo, neꞌech ka ejdhá xu dhabalábtsik kʼal Jajáꞌ. 24 Tam na Kristo kin wékʼóch ejtal an takʼixtsik, an awiltalábtsik, an cháplábtsik ani tam kin watʼbantsích ti takʼix na Dios an Tátaꞌláb, tám neꞌech ka tsích an pakwenib. 25 Pos na Kristo neꞌech ti takʼix tam ka átantsatich kʼal na Dios xitaꞌ kʼál tu atʼnal. 26 Xi neꞌech ka wixkʼá tin okʼontalich, jaꞌich an chemlá. 27 Pos na Dios in kʼwajbámalich ejtal abal ka kʼwajay takʼnél kʼal na Kristo. Por tam an Tʼokat Dhuslab in ulal ke ejtalich kʼwajbadh abal ka kʼwajay takʼnél kʼal na Kristo, jechéꞌ yab in léꞌ kin ulu ke na Dios kʼwajat jeye takʼnél kʼal na Kristo. Pos Jajáꞌ jaꞌich nin kʼwajbámal ejtal abal ka kʼwajay takʼnél kʼal na Kristo. 28 Por tam ejtalich kʼwajat takʼnél kʼal na Kristo, Jajáꞌ, xu Chakámláb kʼal na Dios, neꞌech jeye tám ka kʼwajách abal ka kʼwajay takʼnél kʼal na Dios, abal na Dios ka kʼwajay kʼal ejtalkʼi ani abal ejtalkʼi. Jechéꞌ na Dios, jaꞌich nin kʼwajbámal ejtal abal ka kʼwajay takʼnél kʼal na Kristo.

29 Aníl jeye, waꞌach taltsik xu pujnaltsik kʼal tin kwenta xi chemnekichtsik, ¿jantʼókʼi tin tʼajáltsik jechéꞌ? Max an chemélomtsik yabich u ejel ti ít, ¿jantʼókʼi tu pujnaltsik kʼal jajáꞌtsik tin kwenta?

30 Max an chemélomtsik yabich u ejel ti ít, jolatkʼi i watʼnál i yajtsiktaláb. 31 Kidháblábtsik, tsudhey ka tsudhey i tametnál an chemlá. Jechéꞌ tsubax tʼajat, jelti an kʼijidhtaláb xu achʼál kʼal tin kwenta abal a belálichtsik ni Ajátik Jesukristo. 32 Tam tin kʼwajat Efeso, in péjéxnék kʼal an iniktsik xi atʼaxtsik tʼajat, xin junwal jelti an padhumtsik; por, ¿jantʼéy u átámal kʼal jechéꞌ? Max tsubax lejtal ke an chemélomtsik yabich u ejel ti ít, u kalelich tám tsubax xin ulaltsik enchéꞌ: “Wana tu kʼapul ani tu uchʼal, ke kalám neꞌech ku chemech.”

33 Yab ka kʼambiytsik tabáꞌ, xitaꞌ u junkunal kʼal xin tʼajáltsik xowaꞌ yab alwaꞌ, neꞌech jeye ka chʼilkʼoyat. 34 Ka kóꞌoytsik na chalab alwaꞌ ani lujat, yabich ka walaꞌtsik. Pos taltsik xi tatáꞌtsik yab in exlál na Dios, u ulal jechéꞌ abal ki tidhebétsik.

35 Por neꞌech xónaꞌ ka konoxin jun xitaꞌ enchéꞌ: “¿Jan tu ejel ti ít an chemélomtsik? ¿Janti uwats nin tʼuꞌúl neꞌech kin kóꞌoy?” 36 Xitaꞌ in konyal anchanꞌ, yab lej chalpadh, pos tam u tʼaynal jun i iyaláb, jachanꞌ an iyaláb koꞌol ka chemech abal ka ixkʼan. 37 Max ka tʼayan i idhidh, yab jaꞌich an idhidh neꞌech ka kale, neꞌech ka kale an ém o xowaꞌ ka tʼayan. 38 Por na Dios in pidhál tin akan an tʼayabláb xan ti Jajáꞌ na Dios tin léꞌ; ani ejtal an iyalábtsik, kʼeꞌetich kʼeꞌetich in akan u pidhnal. 39 Ejtal xin koꞌol in tʼuꞌúl techéꞌ ti chabál, yab jununúl aniꞌ; nin tʼuꞌúl an iniktsik, kʼeꞌetich jeye; nin tʼuꞌúl an koꞌnéltsik, kʼeꞌetich jeye; nin tʼuꞌúl an toꞌoltsik, kʼeꞌetich jeye ani nin tʼuꞌúl an chʼichintsik, kʼeꞌetich jeye. 40 Waꞌach xin koꞌol in tʼuꞌúl abal ka kʼwajay walkʼiꞌ ani waꞌach xin koꞌol in tʼuꞌúl abal ka kʼwajay techéꞌ ti chabál; por kʼeꞌetich jeye nin labídh xi walkʼiꞌ ani kʼeꞌetich jeye nin labídh xi techéꞌ ti chabál. 41 Nin tajáx na kʼítsá, yab in junwal jelti nin tajáx na íchʼ, nibal in junwal jelti nin tajáx na óttsik. Na óttsik, kʼeꞌetich kʼeꞌetich tin koꞌol nin tajáx. 42 Anchanꞌ jeye u támnal tam u ejel ti ít an chemélomtsik. U jolyáb i tʼuꞌúl xu kʼachel ani tam ku ejech ti ít, u ejel kʼal jun i tʼuꞌúl xi yabich u kʼachel. 43 U jolyáb i tʼuꞌúl xi pojkantál ani tam ku ejech ti ít, u ejel kʼal jun i tʼuꞌúl xi labidh. U jolyáb i tʼuꞌúl xi yab likat ani tam ku ejech ti ít, u ejel kʼal jun i tʼuꞌúl xi likat. 44 U jolyáb i tʼuꞌúl xu pidhnék abal ku kʼwajay techéꞌ ti chabál ani tam ku ejech ti ít, u ejel kʼal jun i tʼuꞌúl xi jaꞌich abal ku kʼwajay walkʼiꞌ. Max waꞌach i tʼuꞌúl xi jaꞌich abal ku kʼwajay techéꞌ ti chabál, waꞌach jeye i tʼuꞌúl xi jaꞌich abal ku kʼwajay walkʼiꞌ.

45 An Tʼokat Dhuslab in ulal ke an jidhtal inik xin bij Adán, tʼajan ani pidhan tin ejattal. Por na Kristo, xin junwal jeye jelti na Adán, in koꞌol in ejattal xin pidhnál i xeꞌchintaláb xi yab in koꞌol in okʼontal. 46 Na Dios tu pidhámal okʼox ti tʼuꞌúl abal ku kʼwajay techéꞌ ti chabál ani tayíl neꞌech ti ku pidhaꞌ ti tʼuꞌúl abal ku kʼwajay walkʼiꞌ. 47 An jidhtal inik xi tʼajadh kʼal i kʼutʼ, techéꞌkʼi jaꞌ ti chabál; in chabtal an inik, xi jaꞌich an Ajátikláb, walkʼiꞌ Jaꞌ ti tál. 48 Nin tʼuꞌúl an iniktsik xi techéꞌ ti chabál, in junwal jelti an inik xi tʼajadh kʼal i kʼutʼ; por xitaꞌ kin belaꞌ na Kristo, neꞌech kin kóꞌoy in tʼuꞌúl jelti na Kristo. 49 Anchanꞌ xan ti koꞌol ni tʼuꞌúl xi techéꞌ ti chabál, anchanꞌ jeye ti neꞌech ki kóꞌoy ni tʼuꞌúl xi tál walkʼiꞌ.

50 Kidháblábtsik, tu utsáltsik, ke ni tʼuꞌúl yab neꞌech ka ochich xon tu takʼix na Dios; pos xu kʼachel yab neꞌech kin ejto ka kʼwajay xon ti kʼwajat xi yab jaykʼi u kʼachel. 51 Neꞌech tu utsaꞌtsik jun xataꞌ xi kʼwajat yab tejwaꞌ: Yab ejtal neꞌech ku chemech; por ejtal neꞌech ku jalkʼuyat. 52 Neꞌech ku jalkʼuyat jikʼatkʼi tʼajat, jelt tam ki mutʼúnaꞌ ani ki lamánaꞌ ni wal, tam ka achʼatmé ti jutsyáb an korneta tin okʼontal. Neꞌech ka jutsyat an korneta ani an chemélomtsik neꞌech ka ejdhá abal yabich más jaykʼi ka chemech ani wawáꞌ, neꞌech ku jalkʼuyat. 53 Pos ni tʼuꞌúl xu kʼachel, koꞌol ka jalkʼuyat kʼal xi yab jaykʼi u kʼachel; ani ni tʼuꞌúl xu chemel, neꞌech ka jalkʼuyat kʼal xi yab jaykʼi u chemel. 54 Tam ni tʼuꞌúl xu kʼachel ka jalkʼuyatich kʼal xi yab jaykʼi u kʼachel ani tam ni tʼuꞌúl xu chemel, ka jalkʼuyatich kʼal xi yab jaykʼi u chemel, támunich tám xowaꞌ kʼwajat dhutsadh ban Tʼokat Dhuslab xin ulal enchéꞌ: “Wékʼontsat tin awiltal an chemlá. 55 An chemlá yabich xoꞌ in koꞌol in awiltal abal ti ku yajlombédhaꞌ ani yabich jaykʼi neꞌech kin ejto ti ku átaꞌ.” 56 Xowaꞌ kʼál tu pidhnal ti awiltaláb an chemlá abal ti ku yajlombédhaꞌ, jaꞌich kʼal an walastaláb. Ani an walastaláb, u pidhnal tin cháp kʼal nin takʼixtal na Dios xin jilám dhutsadh na Moisés. 57 Por ki pidhál ti jalbintsixtaláb na Dios, xi tu tolmiyal ki átaꞌ jechéꞌ kʼal tin kwenta ni Ajátik Jesukristo.

58 Jaxtám, kidháblábtsik xi tu kʼanidháltsik tʼajat, yab ka jilaꞌtsik ka belaꞌ an Ajátikláb ani yab ka jálkʼúkʼliytsik na chalab. Ka óntsitsik ka tʼójontsi echʼekʼi an Ajátikláb, pos a choꞌóbichtsik ke an tʼojláb xa tʼajál abal an Ajátikláb, yab jolatkʼi.