5
Xan ti yejat ki kʼwajay kʼal xi más an belomtsik
Yab ka kʼwiyaꞌ an yejcheltsik, ka takʼiy tokot jelti max a tátaꞌ; ani an kwitóltsik, ka tʼajaꞌ jelti max a kidhábtsik. An áslábtsik, ka tʼajaꞌ jelti max a nánaꞌ ani an tsidhantsik, jelti max a ixámtsik, por kʼal yantam a tʼokat itsích.
Ka tolmiy an chemtsidh mímlábtsik xi tsubax lejtal ti kwetém. Por max jun i chemtsidh mímláb in koꞌol in chakámiltsik o in momobtsik, jajáꞌtsik yejat okʼox kin exlaꞌ xantʼéy yejat kin tʼajaꞌ kʼal nin pakéliltsik. Anchanꞌ, neꞌech tám kin ejto kin jalbintsitsik an ti kʼanidhaxtaláb xi kóꞌontsidh kʼal nin tátaꞌtsik, pos jechéꞌ jaꞌich na alwaꞌ ani jaꞌich nin kulbetnál na Dios. Por an chemtsidh mímláb xi tsubax lejtal ti kwetém ani yab xitaꞌ in koꞌol, in kʼwajbál nin aytsixtal ba na Dios ani yab in jilál kin pakabédhaꞌ. U ól akal i kʼij. An chemtsidh mímláb xi ka kʼwajay yab exbadh, kʼwajat ejat, por jáykʼi jelti max chemnek. Ka okʼtsitsik jeye jechéꞌ, abal yab ka waꞌchin ni jun xataꞌ xantʼokʼál ti ka kʼwiyantsik. Pos max jun xitaꞌ yab in tʼajál ti kʼij nin kidhtaltsik ani más, xu kʼwajíltsik bin kʼimáꞌ, in pojkálich an belomtaláb ani jechéꞌ, u kalelich jaꞌ más walbidh ké jun xitaꞌ xi yab u belom.
Ban úw xon ti dhutsadh nin bij an chemtsidh mímlábtsik, tokot yejat ka kʼwajay dhutsadh xin koꞌolichtsik watʼats ox inik i tamub ani tokot xi kʼwajinek alwaꞌ kʼal nin tomkíl. 10 Yejat ka exlomná kʼal tin kwenta an alwaꞌtaláb xin tʼajámal; jelti tam in pakedhámal i chakamtsik, max in bachʼúmal alwaꞌ an toneltsik xi ulnek tin kʼimáꞌ, max in tʼójontsám kʼal i chaꞌattaláb an belomtsik, jelti tam jun xitaꞌ in tʼaktsal tin akan nin at kidháb, max in tolmiyámal xi xeꞌechtsik ti chʼojontálbél o max in tʼajámal jeye kʼeꞌet xowaꞌkich xi alwaꞌ.
11 Por yab ka dhutsaꞌ an chemtsidh mímlábtsik xi bél tʼajat tsidhan; pos jachanꞌtsik, tam kin jalkʼuytsik nin chalab, u ówmédháb kʼál ba na Kristo ani in leꞌnál juní ka tomkintsik ti ít. 12 Anchanꞌ, u jilkʼonalich tám walbidhtsik abal yab in ejtowal kin tʼajaꞌ xan tin ulúmal. 13 Tám juní, u xeꞌchinaltsik túkʼi túkʼi ban atátsik. Anchanꞌ, u óbeméltsik; yab tokotkʼi u óbeméltsik, u tʼilmaꞌbéltsik, u ochꞌomtsik kʼal xowaꞌkich ani u xeꞌchinaltsik kin tʼilaꞌ xowaꞌ yab yejat. 14 Pos nanáꞌ u léꞌ ku chuꞌu ke an chemtsidh mímlábtsik xi bél tʼajat tsidhan ka tomkintsik, kin kóꞌoy i chakamtsik ani kin beletnaꞌtsik alwaꞌ nin kʼimáꞌ. Max kin tʼajaꞌ anchanꞌ, yab neꞌech ka tʼilan yab exbadh kʼal xi yabtsik u belom. 15 Taltsik an chemtsidh mímlábtsik, in jilámich kin belaꞌ na Kristo ani in wéwnámalich an lej atʼax.
16 Max jun i inik o i mímláb xu belomich, in koꞌol jun i chemtsidh mímláb bin kidhtal, yejat kin tolmiy; anchanꞌ, yabich tám yejat ka tolmiyat kʼal an belomtsik. An belomtsik neꞌech tám kin ejto kin tolmiy más alwaꞌ an chemtsidh mímlábtsik xi tsubax lejtal ti kwetém.
17 An yejcheltsik xin takʼyal alwaꞌ an belomtsik, yejat kin bachʼu i kʼakʼnaxtaláb, i tolmixtaláb ani más, xin wiláltsik nin takʼixtal na Dios ani u okʼtsixtsik. 18 Pos an Tʼokat Dhuslab in ulal enchéꞌ: “Yab ka busáliy an koꞌnél xi exom ti kwádhal.” Ani in ulal jeye: “An tʼojnal in tomnál kin bachʼu nin jalbíl.”
19 Yab ka tʼajaꞌ ti kʼij tam kʼwajat ti ólnáb jun i takʼix belomtsik, max yab waꞌach cháb o óx xu ólnaxtsik. 20 Por an takʼix belomtsik xin óntsal kin walaꞌ, ka kʼwiyaꞌ tin tamét ejtal an kidháblábtsik abal xi kʼeꞌet an takʼix belomtsik, kin jikʼnaꞌ jeye kin walaꞌtsik. 21 Tu punkʼuntsal tin tamét na Dios, tin tamét an Ajátikláb Jesukristo ani tin tamét jeye nin tʼokat abatwálejiltsik xin takwyámal abal ka éynaꞌ jechéꞌ an takʼixtaláb. Yab ka walbiy ni jun xitaꞌ tam yabél a choꞌób max walbidh ani ka éynaꞌ an takʼixtaláb kʼal ejtalkʼitsik, yab kʼal taltsikkʼi. 22 Yab ka aniꞌ puntsikʼi ta kʼubak jun xitaꞌ abal ka pidhaꞌ jun i punkʼuntsixtaláb ban belomtsik, abal yab táꞌ ki kale teye i walbidh kʼal nin walastalábil xi kʼeꞌettsik. Yab ka tʼajaꞌ xowaꞌ yab alwaꞌ.
23 Kom táyidh i yaꞌulmél kʼal na tsukul ani kʼal kʼeꞌet jeye an yawꞌláchtsik, yab ka uchʼaꞌ tokotkʼi i jaꞌ, ka uchʼaꞌ jeye wéꞌ i yajtsik uxnél abal ti ilálkʼi.
24 Nin walastalábil xi taltsik, tejwaꞌ tʼajat maske yabél júnadh xon ti neꞌech ti lújundháb; por nin walastalábil xi taltsik, yab u tejwaꞌmél asta tam okʼnékich ti lújundháb. 25 Anchanꞌ jeye, max ka tʼajan xowaꞌ alwaꞌ, tejwaꞌ tʼajat; ani maske yab tejwaꞌ, yab neꞌech ka jilkʼon echʼekʼi chinat.