1 I choꞌóbich ke max ka kʼibchonich ni tʼuꞌúl, xin junwal jelti jun i atá xi jikʼat u pakchunal xon ti kʼwajat ni ejattal, na Dios tu kóꞌontsalich tʼojojodh túꞌ walkʼiꞌ jun i atá xi yab jaykʼi neꞌech ka pakchun. Jechéꞌ an atá yab tʼajadh kʼal i iniktsik, tʼajadh kʼal a Dios. 2 Jaꞌich kʼal jechéꞌ tin kwenta tu itʼixbédhál ni tʼuꞌúl xi koꞌol techéꞌ ti chabál ani i léꞌakich max na Dios ti ku jalkʼuntsích an ti tʼuꞌúl kʼal xi tál walkʼiꞌ. 3 Jechéꞌ ni tʼuꞌúl xi tál walkʼiꞌ, jaꞌich xon ti neꞌech ka kʼwajay ni ejattal abal yab ka kʼwajay anchankʼi. 4 Pos anchanꞌ pé, xu kʼwajat ba jechéꞌ ni tʼuꞌúl xin junwal jelti jun i atá, u itʼixbél ani u tʼeꞌpinal. I léꞌak max yab ku wékʼontsat jechéꞌ an ti tʼuꞌúl, por i léꞌ jeye ku pidhanich an ti tʼuꞌúl xi tál walkʼiꞌ abal anchanꞌ, ka wixkʼiyatich ni tʼuꞌúl xu chemel ani ki kóꞌóch ni tʼuꞌúl xi neꞌech ka kʼwajay malilíl i kʼij. 5 Na Dios tu tʼajámal anchanꞌ abal ki ejto ki bachʼu ni ít tʼuꞌúl xi tál walkʼiꞌ ani tu pidhámalich an ti Tʼokat Ejattaláb jelti jun i okxintsixtaláb kʼal xowaꞌ neꞌech ki bachʼu tayíl.

6 Anchanꞌ pé, echʼekʼi u kʼwajat tsububudh i itsích. I choꞌób ke lejat u kʼwajat ba jechéꞌ ni tʼuꞌúl, yabél u kʼwajat xon ti kʼwajat an Ajátikláb; 7 ani jechéꞌ i choꞌób abal anchanꞌ, kom i belál, yab kʼal xowaꞌkʼi i chuꞌtal. 8 Por u kʼwajat tsububudh i itsích ani i léꞌakich max ki jilaꞌich jechéꞌ ni tʼuꞌúl xu chemel abal ku kʼaléch tu kʼwajíl kʼal an Ajátikláb. 9 Jaxtám, maske u kʼwajat ba ni tʼuꞌúl o u kʼwajat kʼal an Ajátikláb, ki tʼajál echʼekʼi xowaꞌ Jajáꞌ in léꞌ. 10 Pos ejtal wawáꞌ, koꞌol ku utey xon ti na Kristo neꞌech ti lújundhom. Pos juntsik tu éb, koꞌol ki bachʼu xowaꞌ i lujyal kʼal tin kwenta xowaꞌ alwaꞌ o yab alwaꞌ i tʼajámal tam tu kʼwajat ba ni tʼuꞌúl.

11 Jaxtám, kom i kóꞌontsal jun i pulek kʼakʼnaxtaláb an Ajátikláb, i pakabédhál an atiklábtsik abal kin belaꞌ an alwaꞌ tʼilab. I choꞌób alwaꞌ ke na Dios in choꞌób xantʼéy i éy ani i léꞌ ka choꞌóbnaꞌtsik teye xantʼéy i éy. 12 Yab exom i tujwal ki tʼilaꞌ tibáꞌ alwaꞌ, xowaꞌ i tʼajál, jaꞌich abal ka ejtotsik ka exlaꞌ xantʼéy i éy ani ki kulbétsik kʼal jechéꞌ. Anchanꞌ, neꞌech tám ka ejto ka tókʼoytsik xin tʼekʼáltsik tinbáꞌ kʼal xowaꞌkʼi in chuꞌtal ani yab kʼal xowaꞌ waꞌach tin itsích. 13 Max u kʼwajat jelti max yab u chalpadh, u kʼwajat anchanꞌ abal a Dios; max u chalpadh, u kʼwajat anchanꞌ abal tatáꞌtsik ta alwaꞌbíl. 14 Ejtal xowaꞌ i tʼajál, i tʼajál kom tu kʼanidhál na Kristo. Pos i chalpayal jechéꞌ: ke max jún chemech abal ejtalkʼijich, tám, jelti max ejtal chemech. 15 Na Kristo chemech abal xi xoꞌ kʼwajattsik ejat, yabich ka kʼwajaytsik ejat abal jajáꞌkʼi, ka kʼwajaytsik ejat abal na Kristo. Jechéꞌ na Kristo, jaꞌich xi chemech ani ejech ti ít abal jajáꞌtsik tin alwaꞌbíl. 16 Jaxtám, xoꞌ yabich i chuꞌtal ni jun xitaꞌ jelt xan tu chuꞌtáb techéꞌkʼi ti kʼayꞌlá; ani max na Kristo i exlámal xantikʼi tu exláb jun xitaꞌ xi techéꞌkʼi ti kʼayꞌlá, xoꞌ yabich anchanꞌ ti exlál. 17 Jaxtám, max jun xitaꞌ kʼwajatich kʼal na Kristo, in junwal jelti max waꞌchinékich ti ít: Ejtal xan ti xeꞌechwiꞌik, xoꞌ yabich anchanꞌ ti xeꞌech. Xoꞌ, ítich i xeꞌchintaláb in koꞌol.

18 Ejtal jechéꞌ, a Dios in tʼajál. Jechéꞌ na Dios, jaꞌich xi tu kʼwajbaꞌ alwaꞌ kʼal Jajáꞌ kʼal tin kwentakʼi na Kristo ani tu punkʼuntsi abal ki óltsi an atiklábtsik xan ti neꞌech kin ejto ka kʼwajay alwaꞌ kʼal na Dios. 19 Na Dios in kʼwajbál alwaꞌ kʼal Jajáꞌ an atiklábtsik kʼal tin kwentakʼi na Kristo ani yab in ódhantsal ti kwenta nin walastalábiltsik. Jechéꞌ na Dios, tu punkʼuntsámal abal ki óltsi jechéꞌ an ti káw an atiklábtsik abal ka kʼwajáchtsik alwaꞌ kʼal Jajáꞌ. 20 Wawáꞌ u tál jelti jun xitaꞌ xi abadh kʼal na Kristo, jelti max Jajáꞌ tʼajat na Dios ti pakabédháltsik kʼal tin kwenta xowaꞌ i ólnál. Tu pakabédháltsik tin bij na Kristo abal ki kʼwajaytsik alwaꞌ kʼal na Dios. 21 Na Kristo yab in tʼajámal ni jun i walastaláb; por kʼal wawáꞌkʼi ti kwenta, tʼajan kin kitnaꞌ kʼal na Dios ejtal ni walastalábil abal tam ku kʼwajách kʼal na Kristo, ku kʼwajách alwaꞌ kʼal na Dios tin kwentakʼi na Kristo.